ރައީސް އުންމީދު ކުރައްވާ ވަރުގެ ރިޔާސަތަކަށް ހެއްދެވުމަށް މަސައްކަތް ކުރާނަން - ޝާހިދު
ޒުވާނުންގެ ދައުރު އިތުރުކުރުމަށް ރައީސް ކުރައްވާ މަސައްކަތްޕުޅުގައި އުންމީދު ކުރައްވާވަރުގެ ނަތީޖާއެއް ނެރެދެއްވުމަށް މަސައްކަތްޕުޅު ކުރައްވާނެ
އދގެ އާއްމު މަޖިލީހުގެ 76ވަނަ ސެޝަންގެ ރައީސް އަބްދުﷲ ޝާހިދު ރާއްޖެ ވަޑައިގަތުން
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިޙް އުންމީދު ކުރައްވާ ވަރުގެ ރިޔާސަތަކަށް ހެއްދެވުމަށް މަސައްކަތްކުރައްވާނެ ކަމަށް އދ.ގެ އާއްމު މަޖިލީހުގެ 76 ވަނަ ސެޝަންގެ ރައީސް އަބްދުﷲ ޝާހިދު ވިދާޅުވެއްޖެއެވެ.
ރިޔާސަތާ ހަވާލުވެވަޑައިގަތުމަށްފަހު ކުރައްވާ ފުރަތަމަ ރަސްމީ ދަތުރުފުޅުގައި ބުދަ ދުވަހު ރާއްޖެ ވަޑައިގެން ރައީސާއެކު ބޭއްވެވި މަޝްވަރާ ބައްދަލުވުމަށްފަހު ދެއްވި ގުޅިފައިވާ ބަޔާނުގައި ޝާހިދު ވިދާޅުވީ، މިއަދު ރާއްޖޭގައި މި ފާހަގަކުރަނީ ޚާރިޖީ ސިޔާސަތުގައި ކާމިޔާބީއެއް ކަމަށެވެ. އެ މަނިކުފާނުގެ އުންމީދުގެ ރިޔާސަތުގައި ހިމެނޭ 5 ދޯދި ފެށެނީ ރާއްޖެއިން ކަމަށާއި، ދިވެހިންގެ ނަމާއި ފަޚުރު ދެމެހެއްޓުމަށް މަސައްކަތް ކުރައްވާނެ ކަމަށެވެ.
ދިވެއްސަކަށް މިފަދަ ފުރުސަތު ލިބިގެން މި ދިޔައީ ރައީސްގެ ޚާރިޖީ ސިޔާސަތުގެ ހަރުދަނާ ކަމުން ކަމަށް ޝާހިދު ވިދާޅުވިއެވެ. ރައީސްގެ ދުރު ވިސްނުންފުޅާއެކު ދުނިޔޭގެ ގައުމުތަކާ ގުޅުން ބަދަހި ކުރެއްވުމާއި، ޑިމޮކްރެސީ ވަރުގަދަ ކުރެއްވުމަށް ކުރެއްވި މަސައްކަތްޕުޅުތަކުގެ ސަބަބުން ކަމުގައި ޝާހިދު ވިދާޅުވިއެވެ. ރާއްޖެ ކުޑަ ނަމަވެސް ފަޚުރުވެރިކަމާއެކު ބައިނަލްއަގުއާމީ މުޖުތަމަޢުގައި ބަސްބުނަން ކެރޭ ގައުމަކަށް ރާއްޖެ ހެއްދެވުމަށް ރައީސް ކުރެއްވި މަސައްކަތްޕުޅުތަކުގެ ނަތީޖާ ކަމުގައި ވިދާޅުވިއެވެ.
މިންތީގެ ހަމަހަމަކަން ގާއިމުކުރުމާއި، ޒުވާނުންގެ ދައުރު އިތުރުކުރުމަށް ރައީސް ކުރައްވާ މަސައްކަތްޕުޅުގައި އުންމީދު ކުރައްވާވަރުގެ ނަތީޖާއެއް ނެރެދެއްވުމަށް މަސައްކަތްޕުޅު ކުރައްވާނެ ކަމަށް ޝާހިދު ވިދާޅުވިއެވެ.
އެމަނިކުފާނު އދ.ގެ ރިޔާސަތާ ހަވާލުވެވަޑައިގެންނެވީ، ސެޕްޓެމްބަރު މަހުގެ 15 ވަނަ ދުވަހުއެވެ. ރާއްޖެއަށް ކުރައްވާ ދަތުރުފުޅުގައި ޑިފެންސް މިނިސްޓަރާއި، މަޖިލީހުގެ ނައިބް ރައީސާއި، އުއްތަމަ ފަނޑިޔާރާ ވެސް ބައްދަލުކުރެއްވުމަށްވަނީ ހަމަޖެހިފައެވެ. އަދި ޒުވާނުންގެ އުންމީދުތަކާއި، ކަންބޮޑުވުންތަކާ ގުޅޭ ގޮތުން ޒުވާނުންނާއެކު ވެސް މަޝްވަރާ ކުރައްވާނެއެވެ.
