މެމްބަރު އަސްލަމްގެ ގޭގައި ރޯކޮށްލަން ބަޔަކު މަސައްކަތްކޮށްފި

ހިތަދޫ އުތުރުދާއިރާގެ މެމްބަރު މުހައްމަދު އަސްލަމްގެ ގޭގައި ބަޔަކު ރޯކޮށްލަން މަސައްކަތް ކޮށްފިއެވެ.

ފުލުހުން ބުނީ، ހިތަދޫ ޝަރފުއްދީން ސްކޫލް ކައިރީގައި ހުންނަ އަސްލަމްގެ އަނބިކަނބަލުން ދިރިއުޅުއްވާ ގޭގައި ބަޔަކު އަލިފާން ރޯކޮށްލަން މަސައްކަތް ކޮށްފައިވާ ކަމުގެ މައުލޫމާތު ބުދަ ދުވަހުގެ ހެނދުނު ލިބުމާ ގުޅިގެން އެކަން ބަލަމުން އަންނަ ކަމަށެވެ.

އަލިފާން ރޯކޮށްލަން މަސައްކަތް ކޮށްފައިވަނީ ރޭގެ ވަގުތެއްގައެވެ. ގޭގެ ދޮރަށް ތެޔޮ އަޅައި އަލިފާން ރޯކޮށްލަން މަސައްކަތް ކޮށްފައިވާ ކަމަށް އެ ރަށުން "ރާއްޖެއެމްވީ"އާ ވާހަކަ ދެއްކި މީހަކު ބުންޏެވެ. އަންގާރަ ދުވަހުގެރޭ އެރަށަށް ވިއްސާރަވުމުގެ ސަބަބުން އަލިފާންގަނޑު ބޮޑަށް ރޯނުވެ ނިވުނީ ކަމަށް އެމީހާ ބުންޏެވެ.

އަސްލަމްގެ ގޭގައި ރޯކޮށްލަން ބަޔަކު މަސައްކަތް ކޮށްފައި މިވަނީ، ރައްޔިތުންގެ މަޖިލީހުގެ ހިތަދޫ ދެކުުނު ދާއިރާގެ އެމްޑީޕީ މެމްބަރު އިބްރާހީމް ނާޒިލް، މެމްބަރު މުހައްމަދު އަސްލަމަށް، ޖިންސީ ފުރައްސާރަކުރިކަމަށް ބުނާ މައްސަލައެއްވެސް ފެންމަތިވަފައިވަނިކޮށްފެވެ.

މައުލޫމާތު ލިބިފައިވާ ގޮތުގައި މިމައްސަލައަކީ އަސްލަމާމެދު ހިތްހަމަޖެހިވަޑައިނުގެން ނާޒިލް ޖިންސީ ފުރައްސާރައަކަށްވާ އަމަލެއް ކުރައްވައި "މި ވީޑިއޯ ކޮށްބަލާށޭ" ވިދާޅުވި މައްސަލައެކެވެ. މަޖިލީހުގެ އިދާރާގެ ތެރޭގައި ނާޒިލް އެގޮތަށް ކަންތައް ކުރެއްވުމުން އެ މައްސަލަ ބަލައިދޭން އެދިވަޑައިގެން ސެކްރެޓޭރިއަޓަށް ހުށަހެޅުއްވީ ހެންވޭރު ދެކުނު ދާއިރާގެ އެމްޑީޕީ މެމްބަރު ޙުސަައިން ޝަމީމް (އަނދުން ހުސައިން)އެވެ.