ސަރުކާރުން ކުރިއަށް ގެންދާ މަޝްރޫއުތައް ލަސްވާނަމަ ފިޔަވަޅު އަޅަނީ!

ސަރުކާރުން ކުރިއަށް ގެންދާ މަޝްރޫއުތަކުގެ މަސައްކަތް ނުފެށި، ލަސްވާނަމަ ފިޔަވަޅު އަޅާނެ ކަމަށް ފިނޭންސް މިނިސްޓަރު އިބްރާހީމް އަމީރު ވިދާޅުވެއްޖެއެވެ.

ވޯލްޑް ބޭންކުން ބޭއްވި "ޕޯޓްފޯލިއޯ ޕާފޯމަންސް ރިވިއު" ނިންމުމުގެ ރަސްމިއްޔާތުގައި މިނިސްޓަރު އަމީރު ވިދާޅުވީ، ކަނޑައަޅާ ޓައިމްލައިންތަކާ އެއްގޮތަށް މަސައްކަތްތައް ކުރެވި، މަޝްރޫއުތައް ނިންމަން ޖެހޭ ކަމަށާއި، އެއީ ވަރަށް މުހިންމު ކަމެއް ކަމަށެވެ. އަދި އެކަން އެގޮތަށް ނުވާނަމަ ޕްރޮޖެކްޓް މެނޭޖްމެންޓް ޔުނިޓް (ޕީއެމްޔޫ) ގައި ތިބޭ މުވައްޒަފުން ވަކިކޮށް، އާ މުވައްޒަފުންނާ އެމަޝްރޫއެއް ހިންގަން ހަވާލު ކުރާނެ ކަމަށް މިނިސްޓަރު އަމީރު ވިދާޅުވިއެވެ.

މިނިސްޓަރު އަމީރު ވިދާޅުވީ މިއީ ގެންނަން ޖެހޭ މުހިންމު ބަދަލެއް ކަމަށާއި، މިބަދަލު ނުގެންނަ ކަމަށްވާނަމަ މަޝްރޫއު ހިންގަން ހަވާލުކުރާ މީހުންނަށް އެކަމުގެ މުހިއްމު ކަމެއް ނުވިސްނޭނެ ކަމަށެވެ. އަދި ފިޔަވަޅެއް ނާޅާނަމަ އެ މީހުން ކޮންމެ މަހެއްގެ މުސާރަ ނަގައިގެން އެގޮތުގައި ތިބޭނެ ކަމަށާއި، އެކަން އާއްމުކަމެއްގެ ގޮތުގައި ހަދާނެ ކަމަށް މިނިސްޓަރު ވިދާޅުވިއެވެ. ގެއްލޭ ކޮންމެ ދުވަހަކީ އެކަމުގެ ނޭދެވޭ އަސަރު ރައްޔިތުންނާއި ސަރުކާރަށް ކުރާނެ ދުވަހެއްގެ ގޮތުގައި މިނިސްޓަރު ސިފަކުރެއްވިއެވެ.

މީގެ އިތުރުން މިނިސްޓަރު ވިދާޅުވީ ދެފުށް ފެންނަ ނިޒާމެއްގެ ތެރެއިން މަސައްކަތް ކުރަމުންދާއިރު، ނިޒާމު އިތުރަށް ހަރުދަނާ ކުރަން ޖެހޭ ކަމަށެވެ. އެގޮތުން ސަރުކާރުގެ މަޝްރޫއުތައް ކުރިއަށް ގެންދިޔުމުގައި މިހާރަށް ވުރެ ދެފުށް ފެންނަ ނިޒާމެއްގެ ތެރެއިން ކަންކަން ކުރިއަށް ގެންދަން ޚާއްސަ އިސްކަމެއް ދޭނެ ކަމަށް މިނިސްޓަރު ވިދާޅުވިއެވެ.

މިނިސްޓަރު އަމީރު ވިދާޅުވީ ކުރިއަށް އޮތްތަނުގައި މަޝްރޫއުތައް ހިންގުމުގައި ވޯލްޑް ބޭންކްގެ ރެކޮމެންޑޭޝަންތަކާ އެއްގޮތަށް ގެންނަން ޖެހޭ ބަދަލުތައް ގެންނާނެ ކަމަށެވެ.