ރާއްޖޭގެ ތާރީޚުގައި ފުރަތަމަ ފަހަރަށް ރައީސުލްޖުމްހޫރިއްޔާއަކު ކުނި ކޮށްޓެއް ހުޅުވައިދެއްވުމުގެ ޝަރަފު ރައީސް ޑރ. މުހައްމަދު މުޢިއްޒު ހޯއްދަވައިފި އެވެ.

މިގޮތުން ފ. ނިލަންދޫގައި މިނިސްޓްރީ އޮފް ޓުވަރިޒަމް އެންޑް އެންވަޔަރަމަންޓުން ވާރލްޑް ބޭންކުގެ އެހީގައި ތަރައްޤީކޮށްފައިވާ ކުނި އަދި ވަސީލަތް މެނޭޖްކުރާ މަރުކަޒު ހުޅުވުމަށް ހާއްސަ ރަސްމިއްޔާތެއް ވަނީ ބާއްވާފަ އެވެ. އެރަސްމިއްޔާތު ޝަރަފުވެރިކޮށްދެއްވާ ކުނި ކޮށި ހުޅުވައިދެއްވީ ރައީސް މުޢިއްޒު އެވެ.

1،500 އަށްވުރެ ގިނަ މީހުންގެ އާބާދީއެއް ދިރިއުޅޭ ނިލަންދޫގައި ތަރައްގީކޮށްފައިވާ މި މަރުކަޒުގެ މަސައްކަތް ވެހިކަން ބިލްޑަރސް އާއި ހަވާލުކުރެވުނީ 2023 ވަނަ އަހަރުގެ އޭޕްރީލް މަހުގެ 13 ވަނަ ދުވަހުއެވެ.

މި މަރުކަޒުން ކުނި މެނޭޖްކުރުމުގެ ޚިދުމަތް ފޯރުކޮށްދޭނީ ވޭސްޓް މެނޭޖްމަންޓް ކޯޕަރޭޝަން (ވެމްކޯ) އިންނެވެ. މިކަމާ ގުޅިގެން ވެމްކޯއާއި ނިލަންދޫ ކައުންސިލާ ދެމެދު ވަނީ އެއްބަސްވުމެއްގައި ސޮއިކޮށްފަ އެވެ.

ރައީސް މުޢިއްޒުގެ މި ދަތުރުފުޅުގައި ނިލަންދޫގެ ތަރައްޤީއަށް އިތުރު މަޝްރޫޢުތަކެއްވެސް ވަނީ ފައްޓަވާފައެވެ. މީގެ ތެރޭގައި ކައުންސިލްގެ އައު އިމާރާތާއި، ފުލުހުންގެ މަރުކަޒުގެ އައު އިމާރާތުގެ އިތުރުން ނަރުދަމާގެ މަޝްރޫޢު ހިމެނެއެވެ.

މި މަޝްރޫޢުތަކުގެ ސަބަބުން ނިލަންދޫގެ ރައްޔިތުންނަށް ލިބޭނެ ފައިދާތަކާ ބެހޭގޮތުން ވާހަކަފުޅު ދައްކަވަމުން ރައީސް މުޢިއްޒު ވިދާޅުވީ، ޚާއްޞަކޮށް ކުނި ކޮށި ހުޅުވުމުގެ ސަބަބުން ރަށުގެ ތިމާވެށި ރައްކާތެރިކޮށް، ސާފުތާހިރު މާހައުލެއް ޤާއިމްކުރެވިގެންދާނެ ކަމަށެވެ.