އިޓާލިއަން ލީގުގައި އާދީއްތަ ދުވަހުގެރޭ ކުޅުނު މެޗުން އެޓަލާންޓާ ބަލިކޮށް ތާވަލުގެ ކުރިއަށް އޭސީ މިލާން ޖެހިލައިފިއެވެ.

ރަށުން ބޭރުގައި ކުޅުނު މެޗުން މިލާން މޮޅުވީ 3-0 ގެ ނަތީޖާއަކުންނެވެ.

މި މެޗުގެ ފުރަތަމަ ހާފުގައި މިލާނުން ވަނީ ދެ ލަނޑުގެ ލީޑެއް ނަގާފައެވެ. އެގޮތުން މެޗު ފަށައިގެން ފުރަތަމަ މިނެޓުގައި ކެޕްޓަން ޑޭވިޑޭ ކަލާބްރިއާ ވަނީ ލަނޑެއް ޖަހައި، މިލާނަށް ލީޑު ނަގައިދީފައެވެ. އަދި ފުރަތަމަ ހާފު ނިމެން ދެ މިނެޓަށް ވެފައި ވަނިކޮށް އެޓަލާންޓޭގެ ރެމޯ ފްރެއުލާ ހެދި ގޯހެއްގެ ފައިދާ ނަގައި، ސަންޑްރޯ ޓޮނާލީ ވަނީ މިލާނަށް ލީޑު ފުޅާކޮށްދީފައެވެ.

މި މެޗުގައި މިލާނުން ޖެހި ތިންވަނަ ލަނޑު މެޗުގެ 78 ވަނަ މިނެޓުގައި ތެއޯ ހެނާންޑޭޒް ދިން ބޯޅައަކުން ކާމިޔާބުކޮށްދިނީ ރަފައެލް ލެއާއޯއެވެ. އެކަމަކު އޭގެ ފަހުން އެޓަލާންޓާއިން ވަނީ ކުޅުން ރަނގަޅުކޮށް ދެ ލަނޑު ޖަހައި، ފަރަގު ކުޑަކޮށްފައެވެ.

އެގޮތުން މެޗު ނިމެން ހަތަރު މިނެޓަށް ވެފައި ވަނިކޮށް ލިބުނު ޕެނަލްޓީއަކުން އެޓަލާންޓާގެ ފުރަތަމަ ލަނޑު ޖަހައިދިނީ ޑުވާން ޒަޕާޓާއެވެ. މިއީ އޭރިއާ ތެރެއިން މިލާނުގެ ޖޫނިއާ މެސިއަސްގެ އަތުގައި ބޯޅަ ޖެހުމުން، ވީޑިއޯ އެސިސްޓަންޓް ރެފުރީ (ވީއޭއާރް) ބެލުމަށްފަހު ދިން ޕެނަލްޓީއެކެވެ. އަދި މެޗުގެ އިތުރު ވަގުތުގައި ޒަޕާޓާ ތަނަވަސްކޮށްދިން ފުރުސަތަކުން މާރިއޯ ޕަސަލިޗް ވަނީ އެޓަލާންޓާއަށް ފަރަގު ކުޑަކޮށްދީފައެވެ.

މި މޮޅާއެކު ތާވަލުގެ ދެވަނައަށް މިލާން ޖެހިލިއިރު، އެ ޓީމަށް ވަނީ ކުޅުނު ހަތް މެޗުން 19 ޕޮއިންޓް ލިބިފައެވެ. ތާވަލުގެ އެއްވަނައިގައި އޮތް ނާޕޮލީއަށް ހަތް މެޗުން 21 ޕޮއިންޓް ލިބިފައިވާއިރު، އެންމެ ފަހުގެ ޗެމްޕިއަން އިންޓަ މިލާން އޮތީ ތާވަލުގެ ތިންވަނައިގައި ހަތް މެޗުން 17 ޕޮއިންޓާއެކުއެވެ.