އިނގިރޭސި ޕްރިމިއާ ލީގުގައި އާދީއްތަ ދުވަހުގެރޭ އެންމެ ފަހު ދެ ސީޒަން ޗެމްޕިއަނުން ކަމަށްވާ ލިވަޕޫލާއި މެންޗެސްޓާ ސިޓީ ބައްދަލުކުރި މެޗު އެއްވަރުވެއްޖެއެވެ.

ލިވަޕޫލުގެ ދަނޑުގައި ކުޅުނު މެޗު އެއްވަރުވީ 2-2 ގެ ނަތީޖާއަކުންނެވެ. މި މެޗުން ލިވަޕޫލް އެއްވަރުވި ނަމަވެސް، ލީގުގައި މިހާތަނަށް މެޗަކުން ބަލިނުވެ އޮތް ހަމައެކަނި ޓީމަކީ ލިވަޕޫލެވެ.

ލީގުގައި އާދީއްތަ ދުވަހުގެރޭ ކުޅުނު މެޗުގެ ފުރަތަމަ ހާފުގައި ލަނޑެއް ނުފެނުނު ނަމަވެސް، މި ހާފުގައި މެޗުގެ ކޮންޓްރޯލް ނަގައިގެން ކުޅުނީ ސިޓީންނެވެ. އެކަމަކު ދެވަނަ ހާފު ފަށައިގެން ލިވަޕޫލުން ކުޅުން ރަނގަޅުކުރިއިރު، މެޗުގެ 59 ވަނަ މިނެޓުގައި އެ ޓީމުން ވަނީ ލީޑު ނަގާފައެވެ. މުހައްމަދު ސަލާހު ދިން ޕާހަކުން މި ލަނޑު އެ ޓީމަށް ކާމިޔާބުކޮށްދިނީ ސަޑިއޯ މާނޭއެވެ. އެކަމަކު އޭގެ 10 މިނެޓު ފަހުން ގަބްރިއެލް ޖެސޫސް ދިން ބޯޅައަކުން ފިލް ފޯޑެން ވަނީ ލަނޑެއް ޖަހައި، ސިޓީއަށް ނަތީޖާ އެއްވަރުކޮށްދީފައެވެ.

މި މެޗުގައި ލިވަޕޫލުން ދެވަނަ ފަހަރަށް ލީޑު ނަގާފައިވަނީ މެޗުގެ 76 ވަނަ މިނެޓުގައެވެ. ސިޓީގެ ތިން ކުޅުންތެރިއެއް ކައިރިން ނައްޓާލުމަށްފަހު މި ލަނޑު އެ ޓީމަށް ކާމިޔާބުކޮށްދިނީ މެޗުގައި މޮޅު ކުޅުމެއް ދެއްކި ސަލާހެވެ. އެކަމަކު އޭގެ ފަސް މިނެޓު ފަހުން ކެވިން ޑި ބްރޭނާ ވަނީ އޭރިއާ ތެރެއިން ފޮނުވާލި ހަމަލާއަކުން ލަނޑެއް ޖަހައި، ސިޓީއަށް އަލުން ނަތީޖާ އެއްވަރުކޮށްދީފައެވެ.

އޭގެ ފަހުން މި މެޗުގައި ތިންވަނަ ފަހަރަށް ލީޑު ނަގަން ލިވަޕޫލުގެ ފަބީނިއޯއަށް ވަނީ ރަނުގެ ފުރުސަތެއް ލިބި ބޭކާރުވެފައެވެ. އެގޮތުން އޭރިއާ ތެރެއިން ފަބީނިއޯއަށް މުޅިން ހުސް ފުރުސަތެއް ލިބުނު ނަމަވެސް، އޭނާ ފޮނުވާލި ބޯޅަ ސިޓީގެ ރޮޑްރީ ވަނީ ދިފާއުކޮށްފައެވެ.

މި ނަތީޖާއާއެކު އެންމެ ބޮޑު ހިތްހަމަޖެހުމެއް ލިބޭނީ ތާވަލުގެ އެއްވަނައިގައި އޮތް ޗެލްސީއަށެވެ. އެގޮތުން ޗެލްސީއަށް ކުޅުނު ހަތް މެޗުން 16 ޕޮއިންޓް ލިބިފައިވާއިރު، ތާވަލުގެ ދެވަނައިގައި ލިވަޕޫލް އޮތީ ހަތް މެޗުން 15 ޕޮއިންޓް ހޯދައިގެންނެވެ. އަދި ތިންވަނައިގައި އޮތް ސިޓީ އާއި، ހަތަރުވަނައިގައި އޮތް މެންޗެސްތާ ޔުނައިޓެޑް އަދި ފަސްވަނައިގައި އޮތް އެވަޓަނަށް ވަނީ ހަތް މެޗުން 14 ޕޮއިންޓް ލިބިފައެވެ.