ޓެރަރިޒަމްއާއި ހަރުކަށިފިކުރު ހުއްޓުވުމަށް ޚާއްސަ މަސައްކަތު ބައްދަލުވުމެއް!
3 އޮކްޓޯބަރު 2021 | އާދީއްތަ 17:04ދީނީ އިލްމުވެރިންނާއި ތައުލީމީ ދާއިރާގައި މަސައްކަތްކުރާ ބޭފުޅުންގެ ދައުރާގުޅޭގޮތުން މައުލޫމާތު ހިއްސާކުރާނެ
މަސައްކަތު ބައްދަލުވުމުގެ ތެރެއިން
ޓެރަރިޒަމްއާއި ހަރުކަށިފިކުރު ހުއްޓުވުމަށް ޚާއްސަ މަސައްކަތު ބައްދަލުވުމެއް ފަށައިފިއެވެ.
"ދަ އިންޓަރނޭޝަނަލް ޕްރޮގްރާމް ފޮރ ކޮމްބެޓިންގ އެކްސްޓްރީމިޒަމް އެންޑް ޓެރަރިޒަމް"ގެ ނަމުގައި ކުރިއަށް ގެންދާ މި މަސައްކަތު ބައްދަލުވުން ބާއްވަނީ ދެބަޔަކަށް ބަހާލައިގެންނެވެ.
ހަތަރު ދުވަހުގެ މުއްދަތަށް ކުރިއަށްގެންދާ މި މަސައްކަތު ބައްދަލުވުމުގެ މަގުސަދަކީ ޓެރަރިޒަމްއާއި ހަރުކަށިފިކުރު ހުއްޓުވައި, ތަހައްމަލުކުރުމުގެ ސިފަތައް ލިބިފައިވާ އަމާން ބަދަހި މުޖުތަމައެއް ގާއިމުކުރުމުގައި ދީނީ އިލްމުވެރިންނާއި ތައުލީމީ ދާއިރާގައި މަސައްކަތްކުރާ ބޭފުޅުންގެ ދައުރާގުޅޭގޮތުން މައުލޫމާތު ހިއްސާކުރުމެވެ. އަދި މި މަސައްކަތުގައި ހަރަކާތްތެރިވާ ސަރުކާރުގެ މުއައްސަސާތަކާއި މަދަނީ ޖަމިއްޔާތަކުގެ އިންސާނީ ވަސީލަތް ތަރައްގީކުރުމެވެ. މި ހުރިހާ ދާއިރާއަކީ ވެސް ހަރުކަށިފުކުރު ހުއްޓުވުމަށް އެކުލަވާލާފައިވާ ނޭޝަނަލް އެކްޝަން ޕްލޭންގެ އެންމެ މުހިއްމު ދާއިރާތައް ކަމަށް އެމްއެންޑީއެފުން ބުނެއެވެ.
މަސައްކަތު ބައްދަލުވުން އިފްތިތާހުކުރުމުގެ ރަސްމިއްޔާތުގެ ކީނޯޓް ސްޕީޗް ދެއްވީ މިނިސްޓަރ އޮފް ހަޔަރ އެޑިޔުކޭޝަން ޑރ. އިބްރާހީމް ޙަސަންއެވެ.
މިނިސްޓަރު ވިދާޅުވީ ޓެރަރިސްޓް ޖަމާއަތްތަކުން މީހުން ރެކުރޫޓު ކުރުމަށާއި ހަމަލާތައް ރޭވުމަށް އިންޓަނެޓާއި ސޯޝަލް މީޑިޔާ ބޭނުން ކުރަމުންދާ ކަމަށާއި، އެކަމަށް ސަމާލުވާންޖެހޭ ކަމެއް ކަމަށެވެ. އަދި ތައުލީމީ ނިޒާމުގެ ތެރެއިން ކްރިޓިކަލް ތިންކިންގގެ ހުނަރުތައް އަށަގަންނުވާ، ޒުވާނުންނަން އަނިޔާވެރިކަމާއި ދުރުވުމަށާއި، ގާނޫނުތަކާއި އިންސާނީ ހައްގުތައް އުންގަންނައިދިނުމަކީ ވަރަށް މުހިއްމު ކަމެއް ކަމަށް މިނިސްޓަރު ވިދާޅުވިއެވެ.
މި މަސައްކަތު ބައްދަލުވުމުގެ ހުރިހާ ސެޝަންތަކެއް ނަންގަވައިދެއްވާނީ ނާއިފް އަރަބް ޔުނިވަރސިޓީގެ ފަންނީ މާހިރުންނެވެ. މި މަސައްކަތު ބައްދަލުވުމުގެ އިތުރުން، ދިވެހިރާއްޖޭގެ އިސްލާމީ ޔުނިވަރސިޓީ އާއި މި ސެންޓަރ ގުޅިގެން ބާއްވާ އޯޕަން ފޯރަމްއެއް 2021 އޮކްޓޯބަރު 4 ވަނަ ދުވަހުގެ ރޭ އޮންނާނެއެވެ.
ނާއިފް އަރަބް ޔުނިވަރސިޓީއާއި ގުޅިގެން 2019 ވަނަ އަހަރުވެސް މި ސެންޓަރުގެ ފަރާތުން ވަނީ މިފަދަ މަސައްކަތު ބައްދަލުވުމެއް ބާއްވާފައެވެ.
