ނެޝަނަލް ޑައެބިޓީސް ސެންޓަރުގައި މިހާތަނަށް ރަޖިސްޓްރީކޮށްފައިވަނީ 855 މީހުން ކަމަށް އެ ސެންޓަރުން ބުނެފިއެވެ.

ނެޝަނަލް ޑައެބިޓީސް ސެންޓަރަށް 1 އަހަރު ފުރުމާ ގުޅިގެން ރާއްޖެއެމްވީއަށް ދެއްވި އިންޓަވިއުގައި ޑރ. އަޙުމަދު އަޝްރަފް ވިދާޅުވީ މިހާތަނަށް ސެންޓަރުގައި 855 މީހުން ރަޖިސްޓްރީކޮށްފައިވާ ކަމަށާއި އޭގެތެރޭގައި އައުޓްރީޗް ސެންޓަރުން ފަރުވާ ހޯދާ މީހުންނާއި ސެންޓަރަށް އައިސް ފަރުވާ ހޯދާ މީހުން ހިމެނޭ ކަމަށެވެ. ބަލިވެއިނުމާ ގުޅިގެން ޑައެބިޓީސް މެދުވެރިވާ 65 މީހުން ރަޖިސްޓްރީ ކުރެވިފައިވާއިރު ޓައިޕް ޓޫގެ 714 މީހުން އަދި ޓައިޕް ވަންގެ 17 މީހުން ރަޖިސްޓްރީ ކުރެވިފައިވާ ކަމަށެވެ.  

ރާއްޖޭގެ ހުރިހާ ހިސާބަކަށްވެސް މި ސެންޓަރުގެ ޚިދުމަތް ފޯރުކޮށްދިނުމަކީ އަމާޒުކަން ފާހަގަކުރައްވައި ޑރ. އަޝްރަފް ވިދާޅުވީ, ދާދިފަހުން ހދ. ކުޅުދުއްފުށީގައި ބޭއްވި ސްކްރީނިންގ ޕްރޮގްރާމުގެ ތެރެއިން 52 މީހުންނަށް ޚިދުމަތް ފޯރުކޮށްދީފައިވާ ކަމަށެވެ.

ސްކްރީނިންގެ އިތުރު ޕްރޮގްރާމުތަކެއް ރާއްޖޭގެ އެކި ހިސާބުތަކުގައި ކުރިއަށް ގެންދިޔުމަށް ރާވާފައިވާ ކަމަށް ވެސް ވިދާޅުވިއެވެ. އެގޮތުން ލ. އަތޮޅާއި ގދ. އަތޮޅުގައި މި ޕްރޮގްރާމުތައް ވަރަށް އަވަހަށް ފެށިގެންދާނެ ކަމަށް ޑރ. އަޝްރަފް ވިދާޅުވިއެވެ.

ޑރ. އަޝްރަފް އިތުރަށް ވިދާޅުވީ އެންމެ ބޮޑު ގޮންޖެހުމެއް ދިމާވަނީ ހަކުރުބައްޔަށް އާންމުންގެ ހޭލުންތެރިކަން އިތުރު ކުރުމަށް ކަމަށާއި ބައްޔަށް ބޭސްކުރާ މީހުންގެ ތެރޭގައި ވެސް ދިމާވެދާނެ ނުރައްކާތެރިކަމަށް ހޭލުންތެރިކަން ކުޑަކަމަށް ވިދާޅުވިއެވެ.

ފަރުވާ ހޯދަން ޖެހޭ މީހުން ސެންޓަރުގައި ރަޖިސްޓްރީ ކުރުމާއި ބޭސް ލިބޭނެ ފަސޭހަ ނިޒާމެއް ގާއިމުކޮށްދިނުމަށް ސެންޓަރުން ގިނަ މަސައްކަތްތަކެއް ކުރާ ކަމަށް ވެސް ޑރ. އަޝްރަފް ވިދާޅުވިއެވެ.

މަގުސަދަކީ ޑައެބިޓީސް ހުންނަ ހުރިހާ މީހުން ސެންޓަރުގައި ރަޖިސްޓްރީކޮށް، ފަސޭހަކަމާއެކު ސެންޓަރުން ޚިދުމަތް ލިބޭނެ މަގުފަހިކޮށްދިނުން ކަމަށާއި ދެ ތިން ދުވަސް ތެރޭގައި ޚިދުމަތް ހޯދާ ބަލިމީހުންނަށް ޑޮކްޓަރަށް ދެއްކޭނެ އިންތިޒާމު ހަމަޖެއްސުން ކަމަށް ވެސް ވިދާޅުވިއެވެ.

ޑައެބިޓީސް އަކީ ވަރަށް ގިނަ އެހެނިހެން ބަލިތަކަށް މަގުފަހިކޮށްދޭ ބައްޔެކެވެ. އަދި ބަލި ކޮންޓްރޯލް ނުކުރެވިއްޖެނަމަ ބައެއް ބަލިތައް ކަމުގައިވާ ހިތުގެ ބަލި ޖެހުމާއި ސްޓްރޯކް ޖެހުމަށް މަގުފަހިވެގެންދެއެވެ.  

ނެޝަނަލް ޑައެބިޓީސް ސެންޓަރުން ބުނީ ރާއްޖޭގައި އެންމެ ގިނައިން ޓައިޕް ޓޫގެ ޑައެބިޓީސް ކަމަށާއި އެހެންނަމަވެސް މިފަދަ މީހުންނަށް ބޭސް ބޭނުންކޮށްގެން ހަކުރު ހުންނަ މިންވަރު ކޮންޓްރޯލް ކުރެވޭނެ ކަމަށެވެ.