ދިރާސާތަކުން ދައްކާގޮތުގައި މީހަކަށް ދުނިޔޭގައި އެންމެ ގިނަވެގެންވެސް އުޅެވޭނީ 150 އަހަރު ވަންދެންނެވެ. މިހާތަނަށް އައިއިރު އުމުރު ދިގު އެތައް ބަޔަކު ދުނިޔޭގައި އުޅެފައިވާއިރު، ދުނިޔޭގައި އެންމެ ގިނަ ދުވަސްވަންދެން އުޅުނު މީހާކަމަށް ރެކޯޑުކޮށްފައިވަނީ ޖީން ކަލްމަންޓް ނަމަކަށް ކިޔާ ފްރާންސްއަށް ނިސްބަތްވާ އަންހެނެކެވެ. އެމީހާ ދުނިޔޭގައި އުޅުނީ 122 އަހަރު ވަންދެންނެވެ. އެއީ 1875 ވަނަ އަހަރުން 1997 ވަނަ އަހަރަށެވެ. މިއީ ރަސްމީ ލިޔެކިޔުންތަކުން ބުނާ ގޮތެވެ.

ރަސްމީ ރެކޯޑުތަކުން ދައްކާގޮތުން މިވަގުތު ދުނިޔޭގައި ހުރި އެންމެ އުމުރުން ދުވަސްވީ މީހާއަކީ ޖަޕާނަށް ނިސްބަތްވާ އަންހެނެއް ކަމަށްވާ ކޭން ޓަނަކާއެވެ. ޓަނަކާ އުފަންވީ 2 ޖެނުއަރީ 1903 ވަނަ އަހަރުއެވެ. 2021 ވަނަ އަހަރު އޭނާއަށް 118 އަހަރު ފުރިއްޖެއެވެ.

މިއީ މިވަގުތު ދުނިޔޭގައި ހުރި އެންމެ އުމުރުން ދުވަސްވީ މީހާއަށްވާއިރު، 150 އަހަރަށްވުރެ ގިނަ ދުވަހު މީހަކު ދުނިޔޭގައި ހުރެދާނެކަމީ ގިނަ ބައެއްގެ ބުއްދި ގަބޫލުކުރާ ކަމެއް ނޫނެވެ. މި ވާހަކަ އެންމެ ބޮޑަށް ދެކެވެންފެށީ ޕާކިސްތާނަށް ނިސްބަތްވާ އަންހެނެއްގެ ވީޑިއޯއެއް ސޯޝަލް މީޑިއާގައި އާންމުވި ހިސާބުންނެވެ. މިއާއެކު އެމީހާ ކަމަށްބުނާ މީހެއްގެ ފޮޓޯތަކެއްވެސް ވަނީ އާންމުވެފައެވެ. ވީޑިއޯއާއި ފޮޓޯތަކުން ފެންނަ ފެނުމަށް އެމީހާއަކީ ވަރަށް އުމުރުން ދުވަސްވީ މީހެކެވެ. އޭގައި ބުނާގޮތުން އެމީހާގެ އުމުރަކީ 210 އަހަރެވެ.

މި ވީޑިއޯއާއި ގުޅިގެން އެކި މީހުން އެކި ވާހަކަތައް ދައްކަމުންދާއިރު، ކުރީ ޒަމާނަކީ އުފަން ތާރީޚާ އެފަދަ މައުލޫމާތުތައް ގަނޑެއްގައި ލިޔެގެން ރެކޯޑުކުރި ޒަމާނެއް ނޫނެވެ. އެހެންވުމުން އެމީހާގެ އުމުރު ކުރިން ނޭނގުނީ ކަމަށް ވެދާނެ ކަމަށް ބައެއް މީހުން ބުނެއެވެ. ޕާކިސްތާނުގެ ބައެއް މީހުން ބުނެފައިވާގޮތުގައި މިގޮތަށް ޕާކިސްތާނުގައި އުމުރު ނޭނގޭ ކިތަންމެ ބަޔަކު އެބަތިއްބެވެ. އަނެއްބަޔަކު ގެންދަނީ މިއީ ސީދާ ދޮގެއް ކަމަށް ބުނަމުންނެވެ. އަދި އެ ވީޑިއޯއިން ފެންނަ މީހާއަކީ 103 އަހަރުގެ މީހެއް ކަމަށް ބުނަމުންނެވެ.

މި ވީޑިއޯއާއިމެދު ސުވާލު އުފައްދައި ވާހަކަދެއްކި ގިނަ މީހުން ބުނިގޮތުގައި އާންމުވެފައިވާ ވީޑިއޯއާއި ފޮޓޯތަކުން ފެންނަނީ އެކި އަންހެނުންނެވެ. އަދި ދުނިޔޭގެ ރެކޯޑުތަކުން ދައްކާގޮތުން ދުނިޔޭގައި އެންމެ ގިނަ ދުވަސްވީ ޓަނަކާ ކަމަށް އެމީހުން ބުނެއެވެ. އަދި އެހާ ގިނަ ދުވަސްވަންދެން އެމީހާ ދުނިޔޭގައި ހުރިކަން މީގެ ކުރިން ނޭނގުނީ ކީއްވެތޯއާއި، އެމީހާގެ ލޮލުގެ ފެނުމާއި، އަޑު އިވުމުގެ ހިއްސަށް ކިހާ ބޮޑަކަށް އަސަރުކޮށްފައިވާނެތޯ މީހުން ސުވާލުކޮށްފައިވެއެވެ.

މިކަން މިހާރު ވަނީ މީޑިއާގެ ސަމާލުކަމަށްވެސް އައިސްފައެވެ. މިކަމުގެ ތެދު ދޮގު ބަލައި، ބޭރުގެ ބައެއް ނޫސްތަކުގައި ވަނީ މިކަން ދޮގުކޮށްފައެވެ. އެއީ 210 އަހަރުގެ މީހެއް ނޫން ކަމާއި، ފޮޓޯތަކުންނާއި، ވީޑިއޯތަކުން ފެންނަނީ އެކެއް ނޫން ކަމަށް އެމީހުންވެސް ބުނެފައިވެއެވެ. މިތަނުން އެއް ފޮޓޯއަކީ 256 އަހަރު ދުނިޔޭގައި އުޅުނުކަމަށް ބުނާ ޗައިނާއަށް ނިސްބަތްވާ ލީ ޗީ ޔޫން ގެ ފޮޓޯއެއް ކަމަށް ނޫސްތަކުން ބުނެއެވެ. ބައެއް ނޫސްތަކުން ވަނީ މިއީ ތެދަކަށްވުމާއި، ދޮގަކަށްވުންވެސް އެކަށީގެންވާ ކަމަށްބުނެ ރިޕޯޓުކޮށްފައެވެ. ސަބަބަކީ އެމީހާ އުފަންވި ތާރީޚް އެނގެން ނެތްކަމަށް ބުނަމުންދާތީއެވެ.

ކޮންމެއަކަސް މިވަގުތު މިކަމާއި ގުޅޭގޮތުން ދަނީ އެކި ވާހަކަތައް ދައްކަމުންނެވެ. ހުރިހާ އެންމެންގެ ސަމާލުކަން މިކަމަށް ހުއްޓިފައިވާއިރު، މި މީހާއާ ބެހޭ އިތުރު އެހެން މައުލޫމާތެއްވެސް އާންމުކޮށްފައިނުވާއިރު، މިއީ މީހުންގެ ސަމާލުކަން ހޯދުމަށް ބަޔަކު ކޮށްފައިވާ ކަމެކޭވެސް މީހުން ބުނެއެވެ. މުޅި ސޯޝަލް މީޑިއާވެސް އޮތީ ސުވާލު މާކެއްގެ ތެރޭގައެވެ. އެހެންނަމަވެސް މެޑިކަލް ގޮތުންނާއި، އެހެނިހެން ގޮތްގޮތުން ބެލިޔަސް މިއީ ބުއްދި ގަބޫލުކުރާ ކަމެއް ނޫނެވެ.