މި އަހަރުގެ ޖުލައި 1ން ފެށިގެން ސެޕްޓެމްބަރު މަހުގެ 30 ގެ ނިޔަަލަށް 203 މައްސަލައެއްގެ ގާނޫނީ ލަފާ އެޓާނީ ޖެނެރަލްގެ އޮފީހުން ދީފިއެވެ.

އެ އޮފީހުން އާންމުކުރި ތަފާސް ހިސާބުތަކަށް ބަލާއިރު ދައުލަތުގެ މުއައްސަސާތަކުން ލަފާ ހޯދުމަށްޓަކައި ޖުމްލަ 210 މައްސަލައެއް ހުށަހަޅާފައިވާއިރު 203 ކަމަކާ ގުޅޭ ގޮތުން ލަފާ ދީފައިވެއެވެ.

އޭގެތެރެއިން ބިލް ތަސްދީގު ކުރުމާ ގުޅޭ ގޮތުން 5 ލަފާދީފައިވާއިރު އެއްބަސްވުންތަކުގައި ސޮއި ކުރުމާ ގުޅޭ ގޮތުން 60 ލަފާ ވަނީ ދީފައެވެ. ގަވާއިދުތަކާ ގުޅޭ ގޮތުން 42 ލަފާ ދީފައިވާއިރު އުސޫލުތަކާ ގުޅޭ ގޮތުން 8 ލަފާ ވަނީ ދީފައެވެ. އަދި އެހެނިހެން ކަންކަމާ ގުޅޭ ގޮތުން 8 ލަފާ ވަނީ ދީފައެވެ.

މިދިޔަ އަހަރު އޭޖީ އޮފީހުން ގިނަ މަސައްކަތްތަކެއް ވަނީ ކޮށްފައެވެ. އެގޮތުން ދައުލަތުގެ މުއައްސަސާތަކުން ލަފާ ހޯދުމަށްޓަކައި ޖުމްލަ 842 މައްސަލައެއް ހުށަހަޅާފައިވާއިރު 841 ކަމަކާ ގުޅޭ ގޮތުން މިދިޔަ އަހަރު ވަނީ ލަފާ ދީފައެވެ. އޭޖީ އޮފީހުގެ މަސައްކަތްތަކާ ބެހޭގޮތުން މިދިޔަ އަހަރު އެޓާނީ ޖެނެރަލް އިބްރާހީމް ރިފްއަތު ވިދާޅުވެފައިވަނީ އެ އަހަރަކީ ހުރިހާ ގޮތަކުން ވެސް ދަތި އުނދަގޫވި ދުވަސްވަރެއް ކަމަށެވެ. އެގޮތުން މަސައްކަތްތައް އައު ގޮތްތަކަކަށް ބައްޓަން ކުރަން ޖެހުނު ކަމަށާއި ޤާނޫނީ ލަފާ ދިނުމާއި މައްސަލަތަކާ ގުޅިގެން މުވައްޒަފުން ކުރި މަސައްކަތަށް ވެސް ތަޢުރީފު ޙައްޤު ކަމަށް ވިދާޅުވިއެވެ.

އޭޖީ އޮފީހުން ގިނަ މައްސަލަތަކަށް ލަފާ ދީފައިވާއިރު މިދިޔަ އަހަރު ވަނީ މޯލްޑިވްސް އިންޓަރނޭޝަނަލް އާބިޓްރޭޝަން ސެންޓަރު (އެމްއައިއޭސީ) ޤާއިމުކޮށް ޚިދުމަތް ދޭން ފަށާފައެވެ.

އާބިޓްރޭޝަން ސެންޓަރަކީ ރާއްޖޭގައި އާބިޓްރޭޝަން ކުރިއަރުވައި، އެކަމަށް މަގުފަހިކޮށްދިނުމާއި އެކަމާބެހޭ އުސޫލުތައް ކަނޑައަޅާ ސެންޓަރެވެ.