އިޓްލޮސްގައި ކުރިއަށްދާ މައްސަލާގައި ސިޔާސީ އެއްވެސް ކަމެއް ނުހިމެނޭ: މިއުވާން
ސްޓޭންޑްގެ ތަފާތު އައިސްގެން އިޓްލޮސްގައި ކުރިއަށްދާ މައްސަލައާ ގުޅުވައިގެން ދެކެވެނީ ރަނގަޅު ވާހަކަތަކެއް ނޫން
ރައީސް އޮފީހުން ބޭއްވި ނޫސްވެރިންގެ ބައްދަލުވުމުގެ ތެރެއިން
ރާއްޖޭގެ ސަރަހައްދީ އިން ކަނޑައެޅުމާ ގުޅޭގޮތުން އިންޓަރނޭޝަނަލް ޓްރައިބިއުނަލް ފޮރ ދަ ލޯ އޮފް ދަ ސީ (އިޓްލޮސް)ގައި ކުރިއަށްދާ މައްސަލާގައި އެއްވެސް ސިޔާސީކަމެއް ނުހިމެނޭކަމަށް، ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވެއްޖެއެވެ.
ހޯމަ ދުވަހުގެ ރޭ ރައީސް އޮފީހުން ބޭއްވި ނޫސްވެރިންގެ ބައްދަލުވުމުގައި މިއުވާން ވިދާޅުވީ، މި މައްސަލަ ކުރިއަށް ގެންދަވަނީ ސަރުކާރުގެ އިދާރާތަކުގެ އެކްސްޕަރޓް ލެވެލްގެ ބޭފުޅުންކަމަށެވެ. އަދި އެއްވެސް ކަމެއް ނޭނގި ނުހިނގާކަމަށާއި، ސަރުކާރުގެ ކަމާގުޅޭ އިދާރާތަކާ މަޝްވަރާ ކުރެވިގެން، ރާއްޖޭގެ ލީގަލް ޓީމާއި އިންޓަރނޭޝަނަލް ލީގަލް ޓީމާއެކު މަޝްވަރާ ކުރެވިގެން މައްސަލަ ކުރިއަށްދާކަމަށެވެ.
ސްޓޭންޑްގެ ތަފާތު އައިސްގެން އިޓްލޮސްގައި ކުރިއަށްދާ މައްސަލައާ ގުޅުވައިގެން ދެކެވެނީ ރަނގަޅު ވާހަކަތަކެއް ނޫންކަމަށްވެސް މިއުވާން ވިދާޅުވިއެވެ.
މި ނޫސްވެރިންގެ ބައްދަލުވުމުގައި، ކަނޑުގެ އިމުގެ މައްސަލާގައި ރާއްޖޭގެ ލީޑް ކައުންސެލް ޕްރޮފެސަރ ޕަޔަން އަޚަވަންވެސް ވަނީ އޮންލައިންކޮށް ބައިވެރިވެވަޑައިގެންފައެވެ. އޭނާ ވިދާޅުވީ، މި މައްސަލައިގެ އަޑުއެހުމުގައި ރާއްޖޭގެ ފަރާތުން ރަނގަޅު ޕަރފޯމަންސެއް ދައްކާފައިވާ ކަމަށެވެ. އަދި މިހާރު ހިމެނޭ ވަކީލުންގެ ޓީމުން މީގެކުރިންވެސް މިފަދަ މައްސަލަތަކުގައި ވަކާލާތު ކުރައްވާފައިވާކަމަށާއި، މި ޓީމަކީ ތަޖުރިބާކާރު ޓީމެއްކަމަށް ޕަޔަން ވިދާޅުވިއެވެ.
ޗާގޮސްގެ މައްޗަށް ދިވެހިރާއްޖޭގެ ސިޔާދަތީ ބާރު އޮތްކަމަށް އެއްވެސް އިރެއްގައި ދިވެހިރާއްޖެއިން ދައުވާއެއް ނުކުރާކަމަށްވެސް ރައީސް އޮފީހުން ވަނީ ބުނެފައެވެ.
ޗާގޮސްގެ މައްޗަށް އޮތް މޮރިޝަސްގެ ސިޔާދަތީ ބާރާ ބެހޭގޮތުން އައިސީޖޭއިން ނިންމާފައިވާ ނިންމުމަށް އދ.ގައި ރާއްޖެއިން ތާއީދުކުރަން ނިންމި މައްސަލައާއި، ރާއްޖޭގެ ސަރަހައްދީ އިން ކަނޑައެޅުމާ ގުޅޭގޮތުން އިޓްލޮސްގައި ކުރިއަށްދާ މައްސަލައަކީ ތަފާތު ދެ މައްސަލައެކެވެ.
ރާއްޖޭގެ ދެކުނުން، ރާއްޖޭގެ އިގުތިސާދީ ސަރަހައްދުގެ ބައެއް ޗާގޮސްގެ ސަރަހައްދަށް ވަންނަކަމަށް މޮރިޝަސްއިން ބުނާ މައްސަލާގައި، އިޓްލޮސްގައި ދިވެހިރާއްޖެއިން ނަގާފައިވާ ސްޓޭންޑް ބަދަލުނުވާކަންވެސް ރައީސް އޮފީހުން ފާހަގަކުރެއެވެ.
ޖަރުމަނުގައި ހުންނަ، އިންޓަރނޭޝަނަލް ޓްރައިބިއުނަލް ފޮރ ދަ ލޯ އޮފް ދަ ސީ (އިޓްލޮސް)ގައި މިހާރު ކުރިއަށް އެ ދަނީ ދިވެހިރާއްޖެއާއި ޗާގޮސްއާ ދެމެދު އޮތް ކަނޑުގެ ސަރަހައްދުގެ ތެރެއިން ފުށުއަރާ ސަރަހައްދާގުޅޭ މައްސަލައެކެވެ. އެއީ މޮރިޝަސްގެ ފަރާތުން ހުށަހެޅި މައްސަލައެކެވެ.
ޔުނައިޓެޑް ނޭޝަންސް ކޮންވެންޝަން އޮން ދަ ލޯ އޮފް ދަ ސީ (މުއާހަދާ)ގެ ދަށުން، މައްސަލަ މައުލޫއީގޮތުން އިޓްލޮސްއިން ބަލައި، އެ މުއާހަދާގައި ބަޔާންކޮށްފައިވާ އުސޫލުތަކާ އެއްގޮތަށް، ފުށުއަރާ ކަނޑުގެ ސަރަހައްދުތަކުގެ ބައުންޑަރީ ކަނޑައަޅާނެއެވެ. ބައިނަލްއަގުވާމީ އުސޫލުތަކަށް ރިއާޔަތްކުރާއިރު، އާންމު އުސޫލެއްގެގޮތުން މިފަދަ ބައުންޑަރީތައް ކަނޑައަޅަނީ އިކުއިޑިސްޓެންސްގެ ހަމަހަމަ އުސޫލަށް ބިނާކޮށްގެންނެވެ. އޭގެ ނަތީޖާއަކަށްވާނީ، މުއާހަދާގައި ބަޔާންކޮށްފައިވާ ހަމަތަކާ އެއްގޮތަށް ދިވެހިރާއްޖޭގެ ކަނޑުގެ ސަރަހައްދުތަކުގެ ބައުންޑަރީ ކަނޑައެޅި، ދިވެހިރާއްޖެއަށް އެ ސަރަހައްދުތަކުގެ މައްޗަށް ސިޔާދަތީ ހައްގުތައް ލިބިގެން ދިއުމެވެ.
