އިޓްލޮސްގެ ނިންމުން ރިވިއު ކުރުމާއި ގުޅޭގޮތުން ކޮމިޓީއެއް އެކުލަވާލައިފި
މި މައްސަލައާ ގުޅިގެން އެޅެން ހުރި ފިޔަވަޅުތަކަކީ ކޮބައިތޯ ބެލުމަށް ކުރަންޖެހޭ މަސައްކަތްތައް ފައްޓާފައިވާ ކަމަށް ބުނި
ބަންޑާރަ ނައިބު އަހުމަދު އުޝާމް
އިންޓަރނޭޝަނަލް ޓްރައިބިއުނަލް އޮން ލޯ އޮފް ދަ ސީ (އިޓްލޮސް) ގައި މޮރިޝަސް އިން ނިންމާފައިވާ ނިންމުން ބަދަލުކުރުމަށް ކުރަންޖެހޭ މަސައްކަތް ކުރުމަށް ބަންޑާރަ ނައިބުގެ އޮފީހާއި ހަވާލުކުރުމުން މި މައްސަލައާއި ގުޅޭގޮތުން ދިވެހިރާއްޖެއާއި ބައިނަލްއަޤްވާމީ އިސް މާހިރުންގެ ލަފާ ހޯދުމުގެ މަސައްކަތް ފަށާފައިވާ ކަމަށް ބަންޑާރަ ނައިބުގެ އޮފީހުން ބުނެފިއެވެ.
ދިވެހިރާއްޖޭގެ އެކްސްކްލޫސިވް އިކޮނޮމިކް ޒޯންގެ ދެކުނުން ފުށުއަރާކަމަށް ބުނެ އިންޓަރނޭޝަނަލް ޓްރައިބިއުނަލް އޮން ލޯ އޮފް ދަ ސީގައި މޮރިޝަސްގެ ފަރާތުން ހުށަހެޅި މައްސަލައިގެ ނިންމުން ރިވިއުކުރުމާ ގުޅޭގޮތުން ބަންޑާރަ ނައިބުގެ އޮފީހުން ކުރަމުންގެންދާ މަސައްކަތާ ގުޅޭގޮތުން އެ އޮފީހުން ނެރުނު ނޫސްބަޔާނުގައިވަނީ މި މައްސަލައާ ގުޅިގެން އެޅެން ހުރި ފިޔަވަޅުތަކަކީ ކޮބައިތޯ ބެލުމަށް ކުރަންޖެހޭ މަސައްކަތްތައް ވެސް ފައްޓަވާފައިވާ ކަމަށެވެ.
ބަންޑާރަ ނައިބުގެ އޮފީހުން ބުނީ މިމައްސަލައާ ގުޅިގެން ކުރިއަށް ގެންދާ ދިރާސާތަކާއި، މިމައްސަލައިގައި އައްޔަންކޮށްފައިވާ ދިވެހިރާއްޖޭގެ އަދި ރާއްޖެއިން ބޭރުގެ ކަމާބެހޭ މާހިރުންގެ ލަފާގެ މައްޗަށް ރިޢާޔަތްކޮށް ނިމިދިޔަ ސަރުކާރުގެ ފަރާތުން ދިވެހިރާއްޖޭގެ ޤާނޫނު އަސާސީ އާއި ޤާނޫނުތަކާ ފުށުއަރާގޮތަށް އަދި ދިވެހިރާއްޖޭގެ އެންމެމަތީ މަސްލަހަތު ގެއްލޭގޮތަށް ގެންގުޅުއްވާފައިވާ ޤާނޫނީ ޕޮޒިޝަނާއި އަމަލުކުރައްވާފައިވާގޮތާ ގުޅޭ ގޮތުން އެކުލަވާލާ ރިޕޯޓް ރައީސުލްޖުމްހޫރިއްޔާއަށާއި ރައްޔިތުންގެ މަޖިލީހަށް ފޮނުއްވާނެ ކަމަށެވެ. އަދި މިކަމާބެހޭ މަޢުލޫމާތު އާންމު ކުރުމަށް ބަންޑާރަ ނައިބު ނިންމަވާފައިވާ ކަމަށްވެސް އެ އޮފީހުން ބުންޏެވެ.
މި މައްސަލައާ ގުޅިގެން ކުރީގެ ރައީސް އިބްރާހީމް މުހައްމަދު ސާލިހުގެ ފަރާތްޕުޅުން މޮރިޝަސްގެ ބޮޑު ވަޒީރަށް ފޮނުއްވި ސިޓީގެ ކޮޕީއާއި އެސިޓީގެ ޖަވާބުގައި މޮރިޝަސްގެ ބޮޑުވަޒީރު ފޮނުއްވާފައިވާ ސިޓީގެ ކޮޕީ ބަންޑާރަ ނައިބުގެ އޮފީހަށް ލިބިފައިވާ ކަމަށް އެ އޮފީހުން ވަނީ ބުނެފައެވެ.
