ބަހްރެއިނުން އިސްރާއީލުގެ ފޮރިން މިނިސްޓަރަށް މަރުހަބާ ކިއުމުން އެކަމާ އީރާނުން ނުރުހުން ފާޅުކޮއްފިއެވެ.
އީރާންގެ ފޮރިން މިނިސްޓަރ ޙުސައިން އަމީރް ޢަބްދުއްލަހްޔާން ވިދާޅުވީ، ބަހްރެއިނުން އިސްރާއީލްގެ ފޮރިން މިނިސްޓަރަށް، އެގައުމަށް މަރުހަބާ ކިއުމަކީ ބަހްރެއިނުގެ ފަރާތުން ގަބޫލުނުކުރެވޭނެފަދަ އަމަލެއްކަމަށާއި، އެކަން އެގޮތަށް ކުރުމުން ބަހްރެއިނާއި މުޅި އެ ސަރަހައްދުގެ އެހެން ގައުމުތައްވެސް ނުރައްކަލަކަށް ހުށަހެޅޭނެކަމަށެވެ.
މި ވާހަކައަށް ބާރުދެމުން އީރާންގެ ފޮރިން މިނިސްޓްރީގެ ސްޕޯކްސްޕަރސަން ސަޢީދު ޚަޠީބްޒާދާ ވިދާޅުވީ އިސްރާއީލްގެ ފޮރިން މިނިސްޓަރ ބަހްރެއިނަށް ކުރި ޒިޔާރަތުން, ނުފުހެވޭނޭ ފަދަ ލައްގަނޑެއް ޕަރޝިއަން ގަލްފް ކޮމިއުނިޓީގެ ލީޑަރުންގެ ގަދަރަށް ޖެހިއްޖެކަމަށެވެ.
2020 ވަނަ އަހަރު އަބްރަހަމް އެކޯޑްސްގެ ނަމުން ނަންދީފައިވާ ލޭންޑްމާރކް އެގްރީމެންޓެއްގައި އިސްރާއީލް، ޔޫއޭއީ އަދި ބަހްރެއިންގެ މެދުގައި ސޮއިކުރެވިގެންދިޔައެވެ. އަދި ދުވަސްކޮޅެއް ނުވެ މި އެއްބަސްވުމުގައި މޮރޮކޯ އަދި ސޫދާންވެސް ވަނީ ބައިވެރިވެފައެވެ. މި އެއްބަސްވުމަކީ މިގައުމުތަކުގެ ތެރޭގައި ޑިޕްލޮމެޓިކް ގުޅުންތައް ވަރުގަދަ ކުރުމުގެ ބޭނުމުގައި ސޮއިކުރި އެއްބަސްވުމެކެވެ.
ޔަހޫދީން ގިނަ އިސްރާއީލަކީ އެގައުމުގެ ލާއިންސާނީ އަމަލުތަކުގެ ސަބަބުން ވަރަށް ގިނަ ގައުމުތަކެއްގެ ނުރުހުން އަމާޒުވެފައިވާ ގައުމެކެވެ. ބައެއް މުސްލިމް ގައުމުތަކާއި އަދި ދުނިޔޭގެ އެހެން ގިނަ ގައުމުތަކެއް ގުޅިގެން އިސްރާއީލަށް ދަތިކުރުމުގެ ފިޔަވަޅު އެޅުމުގެ ގޮތުން ވަނީ އެގައުމުތަކުން އިސްރާއީލްގެ މުދާ އަދި އެމުދާ ވިއްކާ ކުންފުނިތައް ބޮއިކޮޓްކޮއްފައެވެ.
