އެމެރިކާގައި ކޮވިޑް ޖެހިގެން މަރުވި މީހުންގެ އަދަދު ހަތް ލައްކައަށް އަރައިފިއެވެ.

ހުކުރު ދުވަހު އެގައުމުގައި ކޮވިޑް ޖެހިގެން މަރުވި މީހުންގެ އަދަދު ހަތް ލައްކައަށް އެރިއިރު އެމެރިކާގައި އުމުރުން ދުވަސްވީ މީހުންނާއި ފުރާނަ ނުރައްކަލަށް ހުށަހެޅޭފަދަ ދާއިރާތަކުގައި މަސައްކަތްކުރާ މީހުންނަށް އަމާޒުކޮށްގެން ބޫސްޓަރ ޝޮޓް ޖަހަން ވަނީ ފަށާފައެވެ. އެމެރިކާގައި ފާއިތުވި ހަފްތާގައި ދުވާލެއްގެ މައްޗަށް ދެ ހާސް މީހުން ކޮވިޑް ޖެހިގެން މަރުވެފައިވެއެވެ.

އެމެރިކާއަކީ މުޅި ދުނިޔޭގައިވެސް އެންމެ ގިނަ އަދަދެއްގެ މީހުންނަށް ކޮވިޑް ޖެހި އަދި އެބަލީގައި މަރުވެގެން ރިޕޯޓްކުރަމުން އަންނަ ގައުމެވެ. އެގޮތުން މުޅި ދުނިޔޭގައި ކޮވިޑް ޖެހިފައިވާ މީހުންގެ 19 އިންސައްތަ އެމެރިކާއިން ހިއްސާކުރާއިރު އެބަލީގައި މަރުވަމުންދާ މީހުންގެ 14 އިންސައްތަ އެމެރިކާ ހިއްސާކުރެއެވެ. މުޅި ދުނިޔެއަށް ބަލާއިރު ކޮވިޑް ޖެހިގެން މަރުވި މީހުންގެ ޖުމްލަ އަދަދު 5 މިލިއަނަށް އަރަނީއެވެ.

ހަލުވި މިނުގައި ފެތުރެމުން އަންނަ ޑެލްޓާ ވޭރިއަންޓާއެކު އެމެރިކާގައި ކޮވިޑްގެ ހާލަތު ގޯސްވެގެންދިޔައެވެ. އަދި ސެޕްޓެމްބަރ މަހުގެ މެދު ތެރޭ ޕީކުގައި ހުރުމަށްފަހު މިހާރުވަނީ ކޭސްތަކުގެ އަދަދު ކުރިޔަށްވުރެ މަދުވެފައެވެ. ނަމަވެސް ފާއިތުވި ހަތް ދުވަހުގެ ޑާޓާތަކަށް ބެލިނަމަވެސް ދުވާލެއްގެ މައްޗަށް 117،625 މީހުންނަށް ވަނީ ކޮވިޑް ޖެހިފައެވެ.

އެމެރިކާގެ އިންފެކްޝިއަސް ޑިޒީސް އެކްސްޕަރޓް ޑރ އެންތޮނީ ފައުޗީ ވިދާޅުވެފައިވަނީ ކޮވިޑްގެ ޕެންޑަމިކް ނިމުމަކަށް ގެނެވޭނީ ދުވާލަކު ކޮވިޑް ޖެހޭ މީހުންގެ އަދަދު 10،000ށް ތިރިކުރެވިގެންކަމަށެވެ.

ފާއިތުވި ހަފްތާތަކުގައި ކޮވިޑް ޖެހިގެން ހޮސްޕިޓަލްތަކުގައި އެޑްމިޓްކުރާ މީހުންގެ އަދަދު ވަނީ ދަށްވެފައެވެ. ވަކިން ޚާއްސަކޮށް ކޭސްތަކުގެ އަދަދު އިތުރުވެ ސިއްހީ ނިޒާމަށް ބާރުބޮޑު ކުރި ދެކުނުގެ ބައެއް ސްޓޭޓްތަކުގައި މިހާރު ވަނީ ހާލަތު ރަނގަޅުވެފައެވެ.

އެމެރިކާގައި ކޮވިޑް ވެކްސިންގެ ބޫސްޓަރ ޑޯޒް ޖެހުން ކުރިޔަށްދާއިރު ހޯމަ ދުވަހު އެގައުމުގެ ރައީސް ޖޯ ބައިޑަން ވަނީ މިސާލު ދެއްކެވުމުގެ ގޮތުން ބޫސްޓަރ ޝޮޓް ޖައްސަވާފައެވެ.

ބޫސްޓަރ ޝޮޓް ޖެހުމާމެދު ސައިންސްވެރިންގެ މެދުގައި ވަނީ ޚިޔާލުތަފާތުވުންތައް އުފެދިފައެވެ. އެމެރިކާގެ ސައިންވެސްވެރިންގެ މެދުގައިވެސް އެކަމުގައި ޚިޔާލު ތަފާތުވުންތައް އުފެދިފައިވާއިރު އޮގަސްޓް މަހު އެގައުމުގައި ބޫސްޓަރ ޝޮޓް ދޭނެކަން ވަނީ ހާމަކޮށްފައެވެ. އެއީ ހަލުވި މިނުގައި ފެތުރެމުންދިޔަ ޑެލްޓާ ވޭރިއަންޓްގެ ސަބަބުން ކޮވިޑް ފެތުރުން ކޮންޓްރޯލްކުރުމުގެ ގޮތުންނެވެ.

އެމެރިކާގެ އާބާދީގެ 56 އިންސައްތަ މީހުން ވަނީ ވެކްސިންގެ ދެ ޑޯޒް ފުރިހަމަކޮށްފައެވެ. އަދި 65 އިންސައްތަ މީހުން ވަނީ ވެކްސިންގެ ފުރަތަމަ ޑޯޒް ޖަހާފައެވެ.