ޖާބިރު ހައްޔަރުކުރުމަށް ކާށިދޫ ކައުންސިލުން ގޮވާލައިފި
މިހެން ބުނެފައިވަނީ ކާށިދޫ ކައުންސިލްގެ ފަސް މެމްބަރުން ސޮއިކުރައްވައި، ނެރުނު ގަރާރެއްގައި
ކާށިދޫ ދާއިރާގެ މެމްބަރު އަބްދުﷲ ޖާބިރު
ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރު އަބްދުﷲ ޖާބިރު، ރާއްޖޭގައި ދީނީ މިނިވަންކަން ދިނުމަށް ގޮވާލެއްވި މައްސަލައިގައި އޭނާ ހައްޔަރުކޮށް، ފިޔަވަޅު އެޅުމަށް އެރަށު ކައުންސިލުން ގޮވާލައިފިއެވެ.
ކާށިދޫ ކައުންސިލްގެ ފަސް މެމްބަރުން ސޮއިކުރައްވައި، ނެރުނު ގަރާރެއްގައި ބުނީ ދީނީ މިނިވަންކަން ދިނުމަށް ޖާބިރު ގޮވައިލެއްވުމުން އިސްލާމްދީނުގެ އުސޫލުތަކާއި ދިވެހިރާއްޖޭގެ، ގާނޫނުތަކާ ޚިލާފުވެފައި ވާތީ، އެ ކައުންސިލުން ޖާބިރުގެ ވާހަކަތައް ކުށްވެރިކުރާ ކަމަށާއި، އަދި ޖާބިރު ހައްޔަރުކޮށް މި މައްސަލަ ތަހުގީގުކޮށް، ގާނޫނީ ގޮތުން އެޅެން ހުރި ފިޔަވަޅުތައް އެޅުމަށް ސަރުކާރަށް ގޮވާލާކަމަށެވެ. އަދި ދިނީ މިނިވަންކަން ދިނުމަށް ގޮވާލައި ޖާބިރު ދެއްކެވި ވާހަކަފުޅަކީ، އެ ދާއިރާގެ ރައްޔިތުން ތަމްސީލުކޮށް އޭނާ ދައްކަވާފައިވާ ވާހަކަތަކެއް ކަމަށާއި، އެއީ އެ ދާއިރާގެ ރައްޔިތުން ބަލައިނުގަންނާނެކަމެއް ކަަމަށް ވެސް އެ ކައުންސިލުން ނެރުނު ގަރާރުގައިވެއެވެ. އަދި މަޖިލީހުގައި ވާހަކަ ދައްކަވާއިރު، ޒިންމާދާރުކަމާއެކު އެކަން ކުރެއްވުމަށް ޖާބިރަށް ނަސޭހަތްތެރިވާކަމަށް ވެސް ކައުންސިލުން ވަނީ ބުނެފައެވެ.
މި ގައުމުގައި ދީނީ މިނިވަންކަން އޮންނަން ޖެހޭނެކަމަށް ޖާބިރު ވިދާޅުވެފައިވަނީ މަޖިލީހުގެ ތަޅުމުގައި ހެއްކާބެހޭ ބިލަށް ވާހަކަފުޅު ދައްކަވަމުންނެވެ.
