އިސްރާއީލުން ހިފާފައިވާ ފަލަސްތީނުގެ ބިންތަކުގައި އިސްރާއީލު ސިފައިން ދެމުންގެންދާ ހަމަލާތަކުގައި ތިން މީހުން ޝަހީދުކޮށްލައިފިއެވެ.
މި ތިން މީހުން ޝަހީދުކޮށްލާފައިވަނީ ފަލަސްތީނުގެ 3 ސަރަހައްދެއްގައި ދިން ހަމަލާތަކެއްގައެވެ. އެ ތިން ސަރަހައްދަކީ ހުޅަނގު އައްސޭރި އަވަށެއް ކަމުގައިވާ ބުރްގިން، ޖޭރުއްސަލާމް އަދި ޣައްޒާއެވެ. މިތަނުން އެންމެ ފުރަތަމަ ހަމަލާދީފައިވަނީ ހުޅަނގު އައްސޭރީގެ އަވަށެއްގައެވެ. އެސަރަހައްދުން އިސްރާއީލުން ހަމަލާދީ ޝަހީދުކޮށްލާފައިވަނީ އުމުރުން 22 އަހަރުގެ އަލާ ނަސީރު މުހައްމަދު ޒައްޔޫދުއެވެ.
ފަލަސްތީނުގެ މީޑިޔާތަކުން ރިޕޯޓްކޮށްފައިވާ ގޮތުގައި ޒައްޔޫދު ޝަހީދުކޮށްލާފައިވަނީ އިސްރާއީލު ސިފައިން އެސަރަހައްދުގެ ގެތައް ބަލާފާސްކުރުމާ ގުޅިގެން ކުރިޔަށްދިޔަ ހަމަނުޖެހުންތަކެއްގައެވެ. އިސްރާއީލުގެ އަސްކަރިއްޔާއިން ކުރިޔަށްގެންދިޔަ މި ބަލާ ފާސްކުރުމަކީ މީހުން ހައްޔަރުކުރުމަށް ކުރިޔަށްގެންދިޔަ ބަލާފާސްކުރުންތަކެކެވެ.
ފަލަސްތީނުގެ ހެލްތު މިނިސްޓްރީން ބުނެފައިވަނީ ޒައްޔޫދުގެ ހަށިގަނޑަށް ހަތަރު ވަޒަނެއް އަރާފައިވާކަމަށެވެ. އެތަނުން ދެ ވަޒަން އަރާފައިވަނީ އޭނާގެ މެޔަށް ކަމަށާއި އަނެއް ވަޒަން ކަރަށް އަދި ހަތަރު ވަނަ ވަޒަން އަރާފައިވަނީ ކަނާތު ފައިގެ ފަލަމަސްގަނޑަށްކަމަށެވެ.
މަންޒަރުދުށް މީހުންނާ ހަވާލާދީ މީޑިޔާތަކުން ރިޕޯޓްކޮށްފައިވާ ގޮތުގައި ޒައްޔޫދުގެ ގަޔަށް ބަޑިޖަހާފައިވަނީ ވަރަށް ކައިރިންނެވެ. އަދި އެއަށްފަހު އެމީހުން ޒައްޔޫދުގެ ކައިރިއަށް އައިސް އޭނާ ވަށާލިކަމަށާއި އޭނާ ކައިރިއަށް އެމްބިޔުލަންސްއަށް ނާދެވޭގޮތަށް ހުރަސް އެޅިކަމަށް ބުނެފައިވެއެވެ. އަދި އެމްބިޔުލަންސަށް ޒައްޔޫދާ ހަމައަށް އާދެވުނީ އިސްރާއީލް ސިފައިން އޭނާ މަރުވި ކަމަށް ޔަގީންކުރުމަށްފަހު ކަމަށް ވެސް މަންޒަރުދުށް މީހުންނާ ހަވާލާދީ މީޑިޔާތަކުގައި ވަނީ ރިޕޯޓްކޮށްފައެވެ.
މި ހަމަލާތަކުގައި އިތުރު ދެ މީހަކު ޒަޚަމްވެފައިވެއެވެ. އެމީހުންނަށް ހޮސްޕިޓަލްގައި އެޑްމިޓްކޮށްގެން ފަރުވާދެމުންދާއިރު އިތުރު ދެމީހުން ހައްޔަރުކޮށްފައިވާކަމަށް ރިޕޯޓްތައް ބުނެއެވެ.
ދެވަނަ އަށް އިސްރާއީލުން ޝަހީދުކޮށްލާފައިވަނީ ޖޭރުއްސަލާމް ސަރަހައްދުން އުމުރުން 30 އަހަރުގެ އިސްރާ ޚުޒައިމާއެވެ. އިސްރާއަކީ ތިން ކުދިންގެ މަންމައެކެވެ. އިސްރާއީލުން ބުނެފައިވަނީ އިސްރާގެ ގަޔަށް ބަޑިޖެހީ އިސްރާއީލުގެ އޮފިސަރަކަށް ހަމަލާދިނުމަށް މަސައްކަތްކުރުމުންކަމަށެވެ.
ބުރާސްފަތި ދުވަހު ތިން ވަނައަށް ޝަހީދުކޮށްލި މީހަކީ އުމުރުން 41 އަހަރުގެ މުހައްމަދު އަބްދުލް އައްމާރުއެވެ. މީނާ ޝަހީދުކޮށްލާފައިވަނީ ޣައްޒާގައެވެ. ޣައްޒާގެ ހެލްތު މިނިސްޓްރީން ބުނެފައިވަނީ މުހައްމަދު ޝަހީދުވީ އިސްރާއީލުން އޭނާއަށް ދިން ހަމަލާގައި ލިބުނު ޒަޚަމްތަކަށް ފަރުވާދެމުން ދަނިކޮށްކަމަށެވެ. މުހައްމަދަކީ ދޫނި މަރާ މީހެކެވެ.
ބުރާސްފަތި ދުވަހު ހިނގާދިޔަ ތިން ހާދިސާގައި ފަލަސްތީނުގެ ތިން މީހަކު ޝަހީދުކޮށްލާފައި މިވަނީ މިފަހުން އިސްރާއީލުން ފަލަސްތީނުގެ ރައްޔިތުންނަށް އަމާޒުކޮށްދޭ ހަމަލާތައް އިތުރުވެފައި ވަނިކޮށެވެ. އެގޮތުން އާދިއްތަ ދުވަހު އިސްރާއީލުން ވަނީ ފަލަސްތީނުގެ ފަސް މީހަކު ޝަހީދު ކޮށްލާފައެވެ.
ފާއިތުވި މަސްތަކުގައި އިސްރާއީލުން އަންނަނީ ކޮންމެ ދުވަހަކުވެސް ފަލަސްތީނުގެ ރައްޔިތުން ދިރިއުޅޭ ސަރަހައްދުތަކުގައި ބަލައި ފާސްކުރުމުގެ ނަމުގައި މީހުން ދިރިއުޅޭ ގެތަކަށް ވަދެ ހަމަނުޖެހުންތައް ހިންގަމުންނެވެ.
