ރައީސް ނަޝީދުގެ ވެރިކަން ވައްޓާލި މައްސަލަ އިންތިގާލީ އިންސާފުގެ އޮމްބަޑްސްޕަރސަން އޮފީހުން ތަހުގީގު ކުރަން ޖެހޭ: ވަކީލު ނިޝާން

ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދުގެ ވެރިކަން ބަގާވާތަކުން ވައްޓާލި މައްސަލަ އިންތިގާލީ އިންސާފުގެ އޮމްބަޑްސްޕަރސަން އޮފީހުން ތަހުގީގު ކުރަން ޖެހޭ ކަމަށް މަޝްހޫރު ގާނޫނީ ވަކީލު މުހައްމަދު ނިޝާން އިބްރާހީމް ވިދާޅުވެއްޖެއެވެ.

ބުދަ ދުވަހުގެ ރޭ ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަމުން ނިޝާން ވިދާޅުވީ ރައީސް ނަޝީދުގެ ވެރިކަން ވައްޓާލާފައިވަނީ ހަރާމް ބަގާވާތަކުން ކަމަށާއި، މިހާރު އެމައްސަލަ ތަހުގީގުކޮށްފިނަމަ އެކަމުގައި އުޅުނު މީހުން ހޯދޭނެ ކަމަށެވެ. އެގޮތުން ޖިނާއީ ދައުވާ ކުރެވޭ މިންވަރަށް ހެކިތައް އެބަހުރި ކަމަށް ނިޝާން ވިދާޅުވިއެވެ. އަދި ވިދާޅުވީ ސާބިތު ކުރެވޭ މިންވަރަށް ވެސް ހެއްކާއި ގަރީނާ ލިބޭނެ ކަމަށެވެ.

ނިޝާން ވިދާޅުވީ އިންތިގާލީ އިންސާފުގެ އޮމްބަޑްސްޕަރސަން އޮފީހަކީ މިފަދަ މައްސަލަތައް ބެލުމުގެ ޒިންމާ މަތިކޮށްފައިވާ އޮފީސް ކަމަށްވާއިރު، އަމިއްލަ އިސްނެގުމުގެ މަތިން މި މައްސަލަ ބަލަން ޖެހޭޭ ކަމަށެވެ. އަދި މިއަދާ ހަމައަށް އައިރު މި މައްސަލަ ތަހުގީގުކުރުމުގެ ވިސްނުން ވެސް ނުގެންގުޅޭ ކަމަށާއި، އެކަން ކުއްވެރިކުރާ ކަމަށް ނިޝާން ވިދާޅުވިއެވެ.

ރައީސް ނަޝީދުގެ ވެރިކަން ބަގާވާތަކުން ވައްޓާލި މައްސަލައަކީ ރައްޔިތުންގެ މަސްލަހަތާ ގުޅިފައިވާ މައްސަލައެއްކަން ފާހަގަކުރައްވައި ނިޝާން ވިދާޅުވީ މިފަދަ މައްސަލައެއް ތަކުރާރުވިޔަ ނުދިނުމަށް މި މައްސަލަ ތަހުގީގު ކުރުމަކީ ވަރަށް މުހިންމު ކަމެއް ކަމަށެވެ. ނިޝާން ވިދާޅުވީ ތަހުގީގެއް ކުރަނީ ދެބޭނުމެއްގައި ކަމަށާއި، އެއްބޭނުމަކީ އެކަން ހިނގައިދިޔަ ގޮތް ހޯދުން ކަމަށެވެ. އަދި ދެވަނަ ބޭނުމަކީ އެފަދަ ކަމެއް ތަކުރާރުވެދާނެ ހުރިހާ ދޮރުތަކެއް ބަންދުކުރުން ކަމަށް ނިޝާން ވިދާޅުވިއެވެ.

ރައީސް ނަޝީދުގެ ވެރިކަން ބަގާވާތަކުން ވައްޓާލި މައްސަލަ އޮމްބަޑްސްޕަރސަން އޮފީހަށް ހުށަހަޅާފައިނުވި ނަމަވެސް 7 ފެބްރުއަރީ 2012ގައި ސަލާމަތީ ބާރުތަކުން ޓީވީ މޯލްޑިވްސްއަށް ވަދެ، އެތަނަށް ޓެރަރިސްޓު ހަމަލާއެއް ދިން މައްސަލަ އިންތިގާލީ އިންސާފުގެ އޮމްބަޑްސްޕަރސަން އޮފީހަށް ހުށަހަޅާފައިވެއެވެ.

މި މައްސަލަ އިންތިގާލީ އިންސާފުގެ އޮމްބަޑްސްޕަރސަން އޮފީހަށް ހުށަހަޅާފައިވަނީ ރައީސް ނަޝީދުގެ ފަރާތްޕުޅުން މާފަންނު މެދު ދާއިރާގެ މެންބަރު އިބްރާހިމް ރަޝީދު (ބޮންޑާ) އެވެ. ޓީވީއެމަށް ގަދަކަމުން ވަދެ ބްރޯޑްކާސްޓިން ހުއްޓުވައި، ތަން ހިސޯރު ކޮށްފައިވަނީ ރައީސް ނަޝީދުގެ ވެރިކަން ބަދަލުކޮށް އެއިރު އެކަމުގެ އަޑީގައި ތިބި ސިޔާސީ ބައެއްގެ އޯޑަރަށް ދިވެހި ފުލުހުންނާއި ސިފައިންނެވެ.

7 ފެބްރުއަރީ 2012 ވަނަ ދުވަހު, ރައީސުލްޖުމްހޫރިއްޔާއާއި އަދި ދިވެހި ދައުލަތާ ދެކޮޅަށް ބަޔަކު ނުކުމެ ވަނީ ގާނޫނު އަސާސީއާ ޚިލާފަށް އޭރުގެ ރައީސުލްޖުމްހޫރިއްޔާ މުޙައްމަދު ނަޝީދުގެ ވެރިކަން ބަދަލުކޮށް ސިޔާސީ ބައެއް ފަރާތްތަކުން ވަނީ ބަގާވާތެއް ކޮށްފައި ކަމަށް ގިނަ ބަޔަކު ބުނެއެވެ.

ރައީސް ނަޝީދުގެ ފަރާތްޕުޅުން މި މައްސަލަ އޮމްބަޑްސްޕާސަންގެ އޮފީހަށް ހުށަހަޅާފައިވާ އިރު، މި މައްސަލަ ރައްދުވާ ފަރާތެއްގެ ގޮތުގައި ހިމެނެނީ މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް)، މިނިސްޓްރީ އޮފް ޑިފެންސް އެންޑް ނެޝަނަލް ސެކިއުރިޓީ، މޯލްޑިވްސް ޕޮލިސް ސަރވިސް އަދި މިނިސްޓްރީ އޮފްް ހޯމްއެފެއާޒެވެ.