ރޭވިގެން އުޅުނީ ބަޣާވާތެއް ކުރަން: ރައީސް މުއިއްޒު

ރުފިޔާ ކާޑުން ޑޮލަރު ނުލިބޭ ގޮތް ބޭންކް އޮފް މޯލްޑިވްސް (ބީއެމްއެލް) އިން ހެދުމާ ގުޅިގެން ސީދާ ބަޣާވާތެއް ހިންގަން އުޅުނު ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.

"މިއީ ރޭވިގެން ކުރި ކަމެއް،" ހޯމަ ދުވަހުގެރޭ ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ހަރުގެ ޖަލްސާގައި ވާހަކަ ދައްކަވަމުން މުއިއްޒު ވިދާޅުވިއެވެ.

ބަޣާވާތެއް ހިންގަން އުޅުނު ކަމުގެ ހެކި ހުރުމުން ފުލުހުން ތަހުގީގު ފަށާފައި ވާކަމަށާއި ފުލުހުން ކުރާނީ ޕްރޮފެޝަނަލް މަސައްކަތެއް ކަމަށާއި، މި ސަރުކާރުން ފުލުހުންގެ އިދާރާއަކަށް އަދި ސިފައިންގެ އިދާރާއަކަށް ސިޔާސީ ނުފޫޒެއް ނުފޯރުވާނެ ކަމަށް ރައީސް މުއިއްޒު ވިދާޅުވިއެވެ.

ފުލުހުން ކުރާ ޕްރޮފެޝަނަލް މަސައްކަތުން ފެންނަ ކަމެއް ފެނުނީމާ، އެ ދާނީ ރައްޔިތުންނާ ވެސް ހިއްސާ ކުރަމުން ކަމަށް ރައީސް ވިދާޅުވިއެވެ.

ރައީސް ޑރ މުއިއްޒު ވިދާޅުވީ ބަޣާވާތް ހިންގަން އުޅުނީ އެމްޑީޕީން އިސްވެ އޮވެގެން ކަމަށާއި އޭގެ އަޑީގައި ތިބި ބަޔަކު ހޯދާ އަދަބު ދޭނެ ކަމުގައެވެ.

"އެހެންވީމާ ސަރުކާރު ޣައިރު ގާނޫނީ ގޮތަށް ބަދަލު ކުރުމަށް، އަދި އެ ނޫން ވެސް ގައިރު ގާނޫނީ ގޮތަކަށް ރައްޔިތުންގެ ނިންމުން ބަދަލުކުރަން ކުރާ މަސައްކަތް، ގާނޫނުއަސާސީގައި އޮންނަ ގޮތަކަށް ކުރަން ޖެހޭ ކޮންމެ ކަމެއް ކުރުމުގައި ފުރިހަމަ ބާރާއި އެކުގައި، ގާނޫނުއަސާސީގައި އޮންނަ ގޮތަށް ހުރިހާ ކަމެއް އަޅުގަނޑުމެން ކުރާނަން،" ރައީސް ބަޣާވާތާ ބެހޭ ގޮތުން ވާހަކަފުޅު ދައްކަވަމުން ވިދާޅުވިއެވެ.

"މިކުރި ކަންތައް، ސަލާމަތް ބުއްދި ހުރި ކޮންމެ މީހަކު ވިސްނާލީމާ ހުރިހާ ޑޮޓްތަކެއް ގުޅިގެންދާކަން އެނގޭނެ....، މި ވާނީ އެޓެމްޕްޑެޓް ކޫއަކަށް،" ރައީސް ވިދާޅުވި އެވެ.

މި ޖަލްސާގައި ރައީސް މުއިއްޒުގެ ފިޝަރީޒް މިނިސްޓަރ އަހްމަދު ޝިޔާމް ވަނީ މިއީ "މާލީ ބަޣާވާތެއް" ކަމަށް ވިދާޅުވެފައެވެ. ޝިޔާމް ވެސް ވަނީ އެކަން އެމްޑީޕީގެ ބޮލުގައި އަޅުވާފައެވެ.

ޑޮލަރު ލިބުން ތާށިވެފައިވާތީ އެކަން ހައްލު ކުރުމަށް އެތައް މަޝްވަރާތަކެއް ސަރުކާރާ އެކު ބޭންކުން ކުރިކަމަށް އާދިއްތަ ދުވަހު ރައީސް އޮފީހުގައި އޮތް ނޫސް ކޮންފަރެންސްގައި ފިނޭންސް މިނިސްޓަރ މުހައްމަދު ޝަފީގު ވިދާޅުވި ނަމަވެސް، ސަރުކާރުން ބުނަމުން ދަނީ ބޭންކުގެ ނިންމުމަކީ ސަރުކާރުން ދިން ލަފަޔާ ދެކޮޅަށް ނިންމި ނިންމުމެއް ކަމަށެވެ.