އެމްއޭސީއެލްގެ މުވައްޒަފުންގެ މުސާރަ އަންނަ މަހުން ފެށިގެން ބޮޑުކުރަނީ

މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ މުވައްޒަފުންގެ މުސާރަ އަންނަ މަހުން ފެށިގެން ބޮޑުކުރަން ނިންމައިފިއެވެ.

އެމްއޭސީއެލުން ނެރުނު ބަޔާނެއްގައި ބުނީ މުވައްޒަފުންގެ މުސާރަ ބޮޑު ކުރާނީ ފަސް އިންސައްތައިން ފެށިގެން 20 އިންސައްތައާ ހަމައަށް ކަމަށެވެ. އެގޮތުން ދަށް މުސާރަ ލިބޭ މީހުންގެ މުސާރަ އަށް 20 އިންސައްތަ އިތުރުކޮށްދޭއިރު ބޮޑެތި މުސާރަތައް ލިބޭ މީހުންނަށް އިތުރުކޮށްދޭނީ ފަސް އިންސައްތައަށް ކަމަށް ވަނީ ބުނެފައެވެ.

އެ ކުންފުނިން ބުނީ މުސާރައަށް ގެންނަ ބަދަލަކީ ކޮވިޑް-19ގެ ތެރޭގައި އެ ކުންފުނީގެ މުވައްޒަފުން ކުރި ބުރަ މަސައްކަތުގެ އަގުވަޒަން ކުރުމުގެ ގޮތުން ގެންނަ ބަދަލެއް ކަމަށާއި، މިއީ ރާއްޖޭގެ އެންމެ ބޮޑު އެއް ކުންފުނީގެ ހައިސިއްޔަތުން މުވައްޒަފުންގެ މުސާރަ ވަކި މިންގަނޑެއްގައި ހިފެހެއްޓުމަށް ގެންނަން ޖެހޭ މުހިންމު ބަދަލެއް ކަމަށެވެ.

އެމްއޭސީއެލްގެ މުވައްޒަފުންގެ މުސާރަތަކަށް ބަދަލު އައި ނަމަވެސް ސީނިއަރ މަގާމުތަކުގައި ތިބި ބިދޭސީ މުވައްޒަފުންގެ މުސާރައަށް އެއްވެސް ބަދަލެއް ނާންނާނެ ކަމަށް އެ ކުންފުނިން ބުންޏެވެ.

ކޮވިޑުގެ ހާލަތުގައި ދަތިތައް ކުރިމަތިވިކަމުގައިވީ ނަމަވެސް އާންމު ރައްޔިތުންގެ ސަލާމަތާއި ރައްކާތެރިކަމަށް އިސްކަންދީ،، ހެލްތް ޕްރޮޓެކްޝަން އެޖެންސީ (އެޗްޕީއޭ)ގެ ގައިޑްލައިންތަކާ އެއްގޮތަށް ރައްޔިތުންނަށް ޚިދުމަތް ފޯރުކޮށްދީފައިވާ ކަމަށް އެ ކުންފުނިން ވަނީ ބުނެފައެވެ.

އެގޮތުން ފަތުރުވެރިންނާއި އެހެނިހެން ދަތުރުވެރިންނަށް ރައްކާތެރި ގޮތެއްގެ މަތިން ޚިދުމަތް ފޯރުކޮށްދޭ ތަނަކަށް ހެދުމަށް ހަރުދަނާ ފިޔަވަޅުތަކެއް އަޅާފައިވާކަން ފާހަގަކޮށް އެ ކުންފުނިން ބުނީ ދަތުރުވެރިންނަށް ވީހާވެސް ތަކުލީފު ކުޑަވާނެ ގޮތަކަށް އިންތިޒާމުތައް ހަމަޖެއްސި ކަމަށެވެ.