ބްރެންޓްފޯޑާ އެއްވަރުވެ ލިވަޕޫލުން ފުރުސަތު ނަގާލައިފި

އިނގިރޭސި ޕްރިމިއާ ލީގުގައި ހޮނިހިރު ދުވަހުގެރޭ ކުޅުނު މެޗުގައި ބްރެންޓްފޯޑާ އެއްވަރުވެ، ތާވަލުގެ އެއްވަނައިގައި ލީޑު ފުޅާކުރަން ލިބުނު ފުރުސަތު ލިވަޕޫލުން ނަގާލައިފިއެވެ.

ބްރެންޓްފޯޑުގެ ދަނޑުގައި ކުޅުނު މެޗު އެއްވަރުވީ 3-3 ގެ ނަތީޖާއަކުންނެވެ.

ފޯރިގަދަ ކުޅުމެއް ފެނިގެންދިޔަ މި މެޗުގައި އެންމެ ފުރަތަމަ ލަނޑު ޖަހައި ލީޑު ނަގާފައިވަނީ ބްރެންޓްފޯޑުންނެވެ. މެޗުގެ 27 ވަނަ މިނެޓުގައި އޭރިއާ ތެރެއިން ލިބުނު ބޯޅައަކުން މި ލަނޑު އެ ޓީމަށް ކާމިޔާބުކޮށްދިނީ އީތަން ޕިނޮކެވެ. އެކަމަކު އޭގެ ހަތަރު މިނެޓު ފަހުން ޖޯޑަން ހެންޑަސަން ނަގައިދިން ހުރަހަކުން ޑިއޯގޯ ޖޮޓާ ވަނީ ލަނޑެއް ޖަހައި، ލިވަޕޫލަށް ނަތީޖާ އެއްވަރުކޮށްދީފައެވެ. އަދި ފުރަތަމަ ހާފު ނިމުމުގެ ކުރިން ލީޑު ނަގަން ޖޮޓާ ނުރައްކާތެރި ހަމަލާއެއް ފޮނުވާލި ނަމަވެސް، ބްރެންޓްފޯޑުގެ ގޯލްކީޕަރު ޑޭވިޑް ރާޔާ ވަނީ އެ ހަމަލާ ހުއްޓުވާފައެވެ.

ލިވަޕޫލުން މި މެޗުގައި ލީޑު ނަގާފައިވަނީ ދެވަނަ ހާފު ފަށައިގެން ނުވަވަނަ މިނެޓުގައެވެ. ފަބީނިއޯ ދިން ބޯޅައަކުން މި ލަނޑު އެ ޓީމަށް ކާމިޔާބުކޮށްދިނީ މުހައްމަދު ސަލާހެވެ. ސަލާހު ޖެހި ލަނޑަކީ އޮފްސައިޑު ލަނޑެއް ކަމަށް ރެފުރީ އެންމެ ފުރަތަމަ ނިންމި ނަމަވެސް، ވީޑިއޯ އެސިސްޓަންޓް ރެފުރީ (ވީއޭއާރް) އިން ވަނީ އެއީ ރަނގަޅު ލަނޑެއް ކަމަށް ނިންމާފައެވެ.

މި ލަނޑަކީ ޕްރިމިއާ ލީގުގައި ލިވަޕޫލަށް ސަލާހު ޖަހައިދިން 100 ވަނަ ލަނޑެވެ. އެއާއެކު ސަލާހު ވެފައިވަނީ ލީގުގައި ލިވަޕޫލަށް އެންމެ އަވަހަށް 100 ލަނޑު ހަމަކުރި ކުޅުންތެރިޔާއަށެވެ. އޭނާ 100 ލަނޑު ހަމަކޮށްފައިވަނީ ލިވަޕޫލަށް ކުޅެދިން 151 މެޗުންނެވެ.

ސަލާހުގެ ލަނޑުން ލިވަޕޫލުން ލީޑު ނެގި ނަމަވެސް، މެޗުގެ 63 ވަނަ މިނެޓުގައި ވިޓަލީ ޔަނެލްޓް ވަނީ ބްރެންޓްފޯޑަށް ނަތީޖާ އެއްވަރުކޮށްދީފައެވެ. އެކަމަކު އޭގެ ތިން މިނެޓު ފަހުން ލިވަޕޫލުން އަލުން ލީޑު ނެގިއިރު، އޭރިއާ ބޭރުން ފޮނުވާލި ބާރު ހަމަލާއަކުން މި ލަނޑު އެ ޓީމަށް ކާމިޔާބުކޮށްދިނީ ކާޓީސް ޖޯންސްއެވެ. މި މެޗުގައި ބްރެންޓްފޯޑުން އަލުން ނަތީޖާ އެއްވަރުކޮށްފައިވަނީ މެޗު ނިމެން އަށް މިނެޓަށް ވެފައި ވަނިކޮށެވެ. އޭރިއާ ތެރެއިން ލިބުނު ބޯޅައަކުން މި ލަނޑު އެ ޓީމަށް ކާމިޔާބުކޮށްދިނީ ޔޮއާން ވިސާއެވެ.

ބްރެންޓްފޯޑާ ވާދަކޮށް ލިވަޕޫލް އެއްވަރުވިއިރު، މި މެޗުން މޮޅުވެގެން ތާވަލުގެ އެއްވަނައިގައި ތިން ޕޮއިންޓުގެ ލީޑެއް ނެގުމުގެ ފުރުސަތު ލިވަޕޫލަށް އޮތެވެ. އެކަމަކު މެޗު އެއްވަރުވުމާއެކު، ތާވަލުގެ އެއްވަނައިގައި ލިވަޕޫލް އޮތީ އެންމެ ޕޮއިންޓެއްގެ ފަރަގަކާއެކުއެވެ. އެގޮތުން ކުޅުނު ހަ މެޗުން ލިވަޕޫލަށް 14 ޕޮއިންޓް ލިބިފައިވާއިރު، ދެވަނައިގައި އޮތް މެންޗެސްޓާ ސިޓީ އާއި، ތިންވަނައިގައި އޮތް ޗެލްސީ އާއި، ހަތަރުވަނައިގައި އޮތް މެންޗެސްޓާ ޔުނައިޓެޑް އަދި ފަސްވަނައިގައި އޮތް އެވަޓަނަށް ވަނީ ހަ މެޗުން 13 ޕޮއިންޓް ލިބިފައެވެ.