އެމްޑީޕީން ކަންކަން ނިންމާނީ ވޯޓުން: ރައީސް ނަޝީދު
މިއަދަކީ ގައުމިއްޔަތު ބިނާ ކުރުމުގައި އަނެއްކާވެސް ފަޚުރުވެރި ކާމިޔާބީއެއް ހޯދޭ ދުވަހެއް
އެމްޑީޕީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު
މޯލްޑިވިއަން ޑިމޮކްރަޓިކް ޕާޓީ (އެމްޑީޕީ)ން ކަންކަން ނިންމާނީ ވޯޓުން ކަމަށް އެމްޑީޕީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
އެމްޑީޕީގެ ގައުމީ މަޖިލީހުގެ އިންތިޚާބާ ގުޅިގެން ރައީސް ނަޝީދު ވިދާޅުވީ މިއަދަކީ ގައުމިއްޔަތު ބިނާ ކުރުމުގައި އަނެއްކާ ވެސް ފަޚުރުވެރި ކާމިޔާބީއެއް ހޯދޭ ދުވަހެއް ކަމަށެވެ. އަދި ވިދާޅުވީ އެންމެންގެ ބައިވެރިވުމާއެކު ވޯޓު ފޮށިން ކަންކަން ނިންމުމަކީ އެމްޑީޕީގެ އެންމެ މުހިންމު އަމާޒު ކަމަށެވެ.
ގައުމީ މަޖިލީހުގެ އިންތިޚާބު ކުރިއަށްދާއިރު، މެއި 6 ގައި އެމަނިކުފާނަށް އަމާޒުކޮށް ދިން ހަމަލާއާ ގުޅިގެން ރައީސް ނަޝީދު މިވަގުތު ހުންނެވީ އިނގިރޭސިވިލާތުގައެވެ.
ހޮނިހިރު ދުވަހުގެ ހެނދުނު 09:00ން ގައި ވޯޓުލުން ފެށޭނެ ކަމަށް އެމްޑީޕީން ބުނި ނަމަވެސް އޮފިޝަލުން ނެތުމާއި ގުޅިގެން ބައެއް ދާއިރާތަކުގެ ވޯޓުލުން ފަށާފައިވަނީ ވަރަށް ލަހުންނެވެ.
ހަވީރު 5:00އާ ހަމައަށް ވޯޓުލުން ކުރިއަށް ގެންދާއިރު، އެގަޑީގައިވެސް ސަފުގައި މީހުން ވޯޓުނުލެވި ތިބިނަމަ، ސަފުގައި ތިބި މެމްބަރުންނަށް ވޯޓުލުމުގެ ފުރުސަތު ލިބިގެންދާނެއެވެ.
ވޯޓުލުން ކުރިޔަށް ގެންދިއުމަށް ހަމަޖެހިފައިވަނީ މާލޭގެ 15 ސްކޫލާއި، ސޯޝަލް ސެންޓަރުގެ އިތުރުން، މޮނިޓަރިންގެ ހާލަތުގައި ނެތް ރަށްރަށުގެ ތެރެއިން 3 ރަށް ފިޔަވާ އެހެން ހުރިހާ ރަށެއްގައިވެސް އެރަށެއްގެ ސްކޫލުގައެވެ. ވޯޓުލުމަށްޓަކައި މެމްބަރުން ދާއިރުގައި ފޮޓޯ ޖެހި އައިޑީއެއް ހިފައިގެން ދިއުމަށާއި، ވޯޓުލާ ނިމުމުން އެ މެމްބަރެއްގެ އިނގިލީގައި ފާހަގައެއް ޖަހާނެކަން ވަނީ ފާހަގަކޮށްފައެވެ.
މިފަހަރުގެ އިންތިޚާބުގައި 733 ކެންޑިޑޭޓުން ވާދަކުރާއިރު ވޯޓުލުމުގެ ހައްގު ލިބިފައިވާ މީހުންގެ އަދަދު 93،000ން މައްޗަށް އަރައެވެ.
