ސަލްމާން މިސްކިތް ހުޅުވަން ވަލީއަހުދު މުހައްމަދު ބިން ސަލްމާން ރާއްޖެ ވަޑައިގަންނަވާނެ ކަމަށް ރާއްޖޭގެ ސަފީރު ވިދާޅެއް ނުވޭ

ސައުދީ ސަރުކާރުގެ ހިލޭ އެހީގެ ދަށުން ރާއްޖޭގައި އިމާރާތްކޮށްފައިވާ ކިންގް ސަލްމާން މިސްކިތް ހުޅުވުމަށް ރާއްޖެ ވަޑައިގަންނަވާނީ ސައުދީ ވަލީއަހުދު މުހައްމަދު ބިން ސަލްމާން ކަމަށް ސައުދީއަށް ކަނޑައަޅުއްވާފައި ހުންނަވާ ރާއްޖޭގެ ސަފީރު މުހައްމަދު ޚަލީލު ވިދާޅުނުވާ ކަމަށް ރާއްޖޭގެ ފޮރިން މިނިސްޓްރީން ބުނެފިއެވެ.

ފޮރިން މިނިސްޓްރީން ބުނީ އަރަބް ނިއުސް އަށް ދެއްވާފައިވާ އިންޓަރވިއުއެއްގައި ސަފީރު ވިދާޅުވި ވާހަކަފުޅު އޮޅިފައިވާ ކަމަށާއި ސަފީރު އެގޮތަށް ވިދާޅުނުވާ ކަމަށެވެ. ކިންގް ސަލްމާން މިސްކިތަކީ ރާއްޖޭގައި އަޅާ އެންމެ ބޮޑު މިސްކިތަށްވާއިރު މިއީ ރާއްޖެއާ ސައުދީގެ ގުޅުން ރަމްޒުކޮށްދޭ މިސްކިތެކެވެ. އަދި މިއީ ރާއްޖޭގެ މިނިވަންކަމަށް 50 އަހަރު ފުރުމާ ދިމާކޮށް ހަދަމުން އަންނަ ތާރީޚީ މިސްކިތެކެވެ.

Advertisement

ސެޕްޓެމްބަރ މަހުގެ 1 ވަނަ ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ރައީސް އޮފީހުގެ ތަރުޖަމާން މަބްރޫކް އަޒީޒު ވިދާޅުވީ ސަލްމާން މިސްކިތް ކުރިއަށް އޮތް ރަމަޟާން މަހަށް ހުޅުވަން ނިންމާފައިވާ ކަމަށް އިސްލާމިކް މިނިސްޓްރީން މައުލޫމާތު ދީފައިވާ ކަމަށެވެ. އެގޮތުން މިހާރު ކުރިއަށް ދަނީ އެތަނަށް ބޭނުންވާ ފަރުނީޗަރާއި، މުއައްޒަފުން ހޯދުމުގެ މަސައްކަތް ކަމަށް މަބްރޫކް ވިދާޅުވިއެވެ.

މަބްރޫކް ވިދާޅުވީ ރަމަޟާން މަހަށް މިސްކިތް ހުޅުވަން ނިންމީ މިސްކިތް ހުޅުވުމަށް ސައޫދީގެ ފަރާތުން އައި ވަފުދާއެކު އޮގަސްޓް 30ވީ ހޯމަ ދުވަހު ބޭއްވި ބައްދަލުކުރެވުމުގައި މަޝްވަރާ ކުރުމަށްފަހު ކަމަށެވެ.

ކިންގް ސަލްމާން މިސްކިތަކީ ސަޢޫދީ ސަރުކާރުން ބޮޑު ހޭދައެއް ކޮށްގެން ބިނާކޮށްފައިވާ މިސްކިތަކަށްވާއިރު އެ މިސްކިތް ހުޅުވުމުގެ ރަސްމިއްޔާތުގައި ބައިވެރިވުމުގެ ޝައުގުވެރިކަން ސައޫދީ ސަރުކާރުން ވަނީ ފާޅުކޮށްފައެވެ.

މި މިސްކިތުގެ މަސައްކަތް ކޮށްފައި ވަނީ ތުރުކީވިލާތުގެ ޖޮއިންޓް ވެންޗަރ ކުންފުންޏެއްކަމަށްވާ އަލްކޭ-ޓަރމެކްސްއިންނެވެ. ޑިޒައިން އެންޑް ބިލްޑް އުސޫލުން މި މިސްކިތް ބިނާކުރުމުގެ މަސައްކަތް އެ ކުންފުންޏާ ހަވާލުކޮށްފައިވަނީ 28 ފެބްރުއަރީ 2017 ގައެވެ. މިސްކިތުގެ މަސައްކަތުގެ އަގަކީ 24 މިލިއަން ޑޮލަރު (370 މިލިއަން ރުފިޔާ) އެވެ.