މިހާރު ކުރިއަށްދާ ޖެޓްސްކީ އިވެންޓަކީ މިފަދަ އިތުރު ހަރަކާތްތަކެއްގެ ފެށުން: ޓުއަރިޒަމް މިނިސްޓަރ
ދަތުރުގައި މިހާތަނަށް 7 އަތޮޅެއް ވަނީ ކަވަރު ކުރެވިފައި
ޖެޓްސްކީ ޑްރައިވަރުން މާލެ އައުން
މިހާރު ކުރިއަށްދާ ޖެޓްސްކީ ދަތުރުތަކާއެކު މިފަދަ އިތުރު ކުޅިވަރުތަކެއް އަންނާނެ ކަމަށް ޓުއަރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވެއްޖެއެވެ.
މުޅި ރާއްޖެ ހިމެނޭހެން ރާއްޖޭގެ އެންމެ އުތުރުން ދެކުނަށް ކުރާ ޖެޓްސްކީ ދަތުރުގެ ބައިވެރިން ވަނީ ހުކުރު ދުވަހުގެ ހަވީރު މާލެއަށް އައިސްފައެވެ. މިއީ މި ދަތުރުގެ ބައިވެރިން މަޑުކުރާ 7 ވަނަ އަތޮޅެވެ. ޖެޓްސްކީ ރައިޑަރުން މާލެއިން ރިސީވްކުރުމަށް ބޭއްވި ރަސްމިއްޔާތުގައި ޓުއަރިޒަމް މިނިސްޓަރ ޑރ. އަބްދުﷲ މައުސޫމާއި، މާލޭގެ މޭޔަރ ޑރ. މުހައްމަދު މުއިއްޒު ވެސް ވަނީ ބައިވެރިވެވަޑައިގެންފައެވެ.
މި ރަސްމިއްޔާތަށްފަހު ނޫސްވެރިންނަށް މައުލޫމާތުދެއްވަމުން ޓުއަރިޒަމް މިނިސްޓަރ ވިދާޅުވީ ދިވެހިރާއްޖޭގެ ބޮޑުބަޔަކީ މޫދަށް ވާއިރު، ސްޕޯޓްސް ޓުއަރިޒަމްގެ ތެރެއިން މޫދު ކުޅިވަރުތައް ކުރިއަރުވަން މަސައްކަތްކުރައްވާ ކަމަށެވެ. އަތޮޅުތެރޭގައިވެސް މި ކުޅިވަރު އިތުރަށް އާލާކުރުން މުހިންމު ކަމަށާއި އެމަގަށް މަސަައްކަތްކުރާނެ ކަމަށް މިނިސްޓަރ ވިދާޅުވިއެވެ.
މީގެ އިތުރުން މިހާރު ކުރިއަށްދާ ޖެޓްސްކީ ދަތުރާއެކު މިފަދަ އިތުރު ހަރަކާތްތަކެއް އަންނަ އަހަރަށްވެސް ރާވާފައިވާކަމަށް މިނިސްޓަރ މައުސޫމް ވިދާޅުވިއެވެ. އެގޮތުން އަންނަ އަހަރުގެ ޖެނުއަރީއަށް ޖެޓްސްކީ ދަތުރުތަކެއް ރާވާފައިވާނެ ކަމަށާއި އަދި މުބާރާތްތަކެއްވެސް ރާވާފައިވާނެ ކަމަށް މިނިސްޓަރ ވިދާޅުވިއެވެ.
މިދަތުރުގައި ބައިވެރިވާ ޖެޓްސްކީ ރައިޑަރުން ފާހަގަކުރި ގޮތުގައި މޫސުން ގޯސްވުމުގެ ސަބަބުން ބައެއް ގޮންޖެހުންތަކާ ކުރިމަތިލާންޖެހެއެވެ. ދަތުރު ތުރާކުނުން ފެށި އިރުވެސް މޫސުން ގޯސްކަން އެމީހުން ފާހަގަކުރިއެވެ. އެހެންނަމަވެސް ދަތުރު ނިންމަން ކަނޑައަޅާފައިވާ ދުވަހަށް ދަތުރު ނިމޭނެ ކަން އެމީހުން ފާހަގަކުރިއެވެ.
ފަތުރުވެރިކަމުގެ ދުވަހާއި ގުޅުވައިގެން ރާއްޖޭގެ އުތުރުން ދެކުނަށް ކުރާ ޖެޓްސްކީ ދަތުރުގައި މިހާރު ވަނީ 7 އަތޮޅަކަށް އައިސްފައެވެ. މި ދަތުރު ނިންމާލާނީ އައްޑޫއިންނެވެ. މިދަތުރުގައި 6 ޖެޓްސްކީ ރައިޑަރުން ހަރަކާތްތެރިވެއެވެ.
