އާންމު ގަވާއިދުތަކުގެ ގާނޫނުގައިވާ ބައެއް ގަވާއިދުތަކަށް އަމަލުކުރުން 14 ވަނަ ފަހަރަށް ފަސްކުރުމަށް ކޮމިޓީން ނިންމައިފި
އެންމެފަހުން މިގަވާއިދުތަކަށް އަމަލުކުރުމުގެ މުއްދަތު ފަސްކުރުމަށް ރައްޔިތުންގެ މަޖިލީހުން ފާސްކޮށްފައިވަނީ މިދިޔަ އަހަރުގެ ޑިސެމްބަރ މަހު
ގަވާއިދު ކޮމިޓީގެ ބައްދަލުވުމުގެ ތެރެއިން
އާންމު ގަވާއިދުތަކާއި ބެހޭ ޤާނޫނުގެ ޖަދުވަލު 1 އަދި 2 ގައި ބަޔާންކޮށްފައިވާ ގަވާއިދުތަކަށް އަމަލުކުރުމުގެ މުއްދަތު 14 ވަނަ ފަހަރަށް ފަސްކުރުމަށް ގަވާއިދު ކޮމިޓީން ފާސްކޮށްފިއެވެ.
އެންމެފަހުން މިގަވާއިދުތަކަށް އަމަލުކުރުމުގެ މުއްދަތު ފަސްކުރުމަށް ރައްޔިތުންގެ މަޖިލީހުން ފާސްކޮށްފައިވަނީ މިދިޔަ އަހަރުގެ ޑިސެމްބަރ މަހުއެވެ. އެމުއްދަތު ހަމަވަނީ ހިނގަމުންމިދާ ސެޕްޓެމްބަރ މަހުގެ ނިޔަލަށެވެ. އެހެންކަމުން ގަވާއިދު ކޮމިޓީން ވަނީ މިކަމުގައި އަމަލުކުރާނެ ގޮތެއް އަނެއްކާވެސް ދިރާސާކޮށްފައެވެ. އެއަށްފަހު ކޮމިޓީން އެކުލަވާލި ރިޕޯޓްގައި ބުނެފައިވަނީ އާންމު ގަވާއިދުތަކާއި ބެހޭ ގާނޫނުގެ ޖަދުވަލު 1 އަދި 2 ގައި ބަޔާންކޮށްފައިވާ ގަވާއިދުތަކާއި ގުޅޭގޮތުން މަޝްވަރާކުރުމަށްފަހު އެގާނޫނުގެ ޖަދުވަލު 1 އަދި 2 ގައި ބަޔާންކުރާ ގަވާއިދުތަކަށް އަމަލުކުރުމުގެ މުއްދަތު 2022 ވަނަ އަހަރުގެ ސެޕްޓެމްބަރ މަހުގެ ނިޔަލަށް އިތުރުކުރުމަށް ނިންމާކަމަށެވެ.
މީގެއިތުރުން މިމުއްދަތުގެ ތެރޭގައި އާންމު ގަވާއިދުތަކާއި ބެހޭ ގާނޫނުގެ ޖަދުވަލު 1 އަދި 2 ގައި ހިމެނޭ ގަވާއިދުތަކާއި ގުޅިގެން އެކުލަވާލަންޖެހޭ ބިލުތަކުގެ ތެރެއިން މިއަހަރުގެ އޮގަސްޓްމަހުގެ 29 ވަނަ ދުވަހު އެޓަރނީ ޖެނެރަލް އޮފީހުން ފޮނުވާފައިވާ ސިތީގައި ބަޔާންކޮށްފައިވާ ނުނިމި ހުރި ބިލްތަކުގެ މަސައްކަތް ނިންމަވައި ވީހާވެސް އަވަހަކަށް ރައްޔިތުންގެ މަޖިލީހަށް ފޮނުއްވައިދެއްވުމަށް އޭޖީ އޮފީހުގައި ދެންނެވުމަށްވެސް ކޮމިޓީން ވަނީ ނިންމާފައެވެ. އަދި އެގަވާއިދުތަކަށް އަމަލުކުރުމަށް އިތުރުކުރެވޭ މުއްދަތުގެ ތެރޭގައި ބިލްތަކުގެ މަސައްކަތް ނިންމަވައި ރައްޔިތުންގެ މަޖިލީހުން ފާސްވެ ތަސްދީގުކޮށް ނިމެންޖެހޭ ގޮތަށް މަސައްކަތްކުރުމަށް ކަމާގުޅުންހުރި ހުރިހާ މުއައްސަސާތަކެއްގައި ދެންނެވުމަށްވެސް ކޮމިޓީން ވަނީ ނިންމާފައެވެ.
މިފަހަރު ކޮމިޓީން ނިންމާފައިވަނީ ޖަދުވަލު 1 ގައިވާ ދެ ގަވާއިދެއް އުވާލުމަށެވެ. އަދި ޖަދުވަލް 1 ގައި ހިމެނޭ 16 ގަވާއިދެއް އަދި ޖަދުވަލް 2 ގައި ހިމެނޭ 3 ގަވާއިދަކާއެކު ޖުމްލަ 19 ގަވާއިދަކަށް އަމަލުކުރާ މުއްދަތު އެއް އަހަރުގެ މުއްދަތަށް ފަސްކުރުމަށެވެ.
އެންމެ ފަހުން މަޖިލީހުން ފާސްކޮށްފައިވަނީ ދެ ގަވާއިދެއް އުނިކުރުމަށެވެ. އަދި ޖަދުވަލް 1 ގައި ހިމެނޭ 18 ގަވާއިދެއް އަދި ޖަދުވަލް 2 ގައި ހިމެނޭ 3 ގަވާއިދެއް ހިމެނޭގޮތަށް ޖުމްލަ 21 ގަވާއިދަކަށް އަމަލުކުރުމުގެ މުއްދަތު އިތުރުކުރުމަށް ވަނީ ފާސްކޮށްފައެވެ.
މިއީ މިހާރު އަމަލުކުރަމުން އަންނަ އައު ގާނޫނުއަސާސީ އައުމާއެކު ކުރިން އަމަލުކުރަމުންދިޔަ ގަވާއިދުތަކަށް އަމަލުކުރުމުގެ ގާނޫނީ ބާރެއް ދިނުމަށްޓަކައި އެކުލަވާލާފައިވާ ގާނޫނެކެވެ. މި ޤާނޫނުގެ ދަށުން ހުރި ގަވާއިދުތަކަށް އަމަލުކުރަމުން އަންނާނީ އެގަވާއިދަކާއި ގުޅުންހުރި ގާނޫނެއް ވުޖޫދުވަންދެންނެވެ. އެގާނޫނެއް ވުޖޫދުވަންދެން ގަވާއިދުތަކަށް އަމަލުކުރުމުގެ މުއްދަތު އަންނަނީ އިތުރުކުރަމުންނެވެ. އެގޮތުން މީގެކުރިން ރައްޔިތުންގެ މަޖިލީހުން ވަނީ 13 ފަހަރަށް އެމުއްދަތު އިތުރުކޮށްދީފައެވެ.
