ޓީޗަރުންގެ ވަޒީފާގެ އޮނިގަނޑުގެ މަގާމުތަކަށް މުވައްޒަފުން ހޮވުމާއި އައްޔަންކުރުމުގެ އުސޫލު ބަދަލުކޮށްފި
ލިބިފައިވާ ތައުލީމާއި ތަޖުރިބާ، ހުނަރު އަދި އިންޓަރވިއު އާއި ޕްރެކްޓިކަލްސް އަށް ބަލާނެ
ޓީޗަރަކު ކުލާހުގައި ކިޔަވާދެއްވަނީ
ޓީޗަރުންގެ މަގާމުތަކަށް ކުރެވޭ އިއުލާންތަކަށް މުވައްޒަފުން ހޮވުމާއި އައްޔަންކުރުމުގެ އުސޫލަށް ބަދަލުތަކެއް ގެނައުމަށްފަހު ސިވިލް ސަރވިސް ކޮމިޝަން (ސީއެސްސީ)ން އާންމުކޮށްފިއެވެ.
އެކަމާއި ގުޅޭގޮތުން ސީއެސްސީން ނެރެފައިވާ ބަޔާނުގައި ބުނެފައިވަނީ މި އުސޫލަކީ، ޓީޗަރުންގެ ވަޒީފާގެ އޮނިގަނޑުގައިވާ މަގާމުތަކަށް އިއުލާނުކޮށް އެ މަގާމުތަކަށް މުވައްޒަފުން އައްޔަންކުރުމުގެ މިންގަނޑު ބަޔާންކުރާ އުސޫލުކަމަށެވެ. އަދި އިޢުލާނުތަކަށް އިޖާބަދީ ހުށަހަޅާ އެޕްލިކޭޝަންތައް ޕްރޮސެސް ކުރާނީ މި އުސޫލާ އެއްގޮތްވާ ގޮތުގެ މަތިންކަމަށް ސީއެސްސީން ވަނީ ބުނެފައެވެ. މީގެއިތުރުން ޓީޗަރުންގެ އޮނިގަނޑުގައިވާ ހުސް މަގާމުތަކަށް އިއުލާންކުރުމުގައި އަދި މަގާމެއް ހުސްވުމުން ނުވަތަ، ހުސްވާނެކަން ކަށަވަރުވުމުން، އެ މަގާމަކަށް މުވައްޒަފަކު ހޯދުމުގެ މަސައްކަތް ކުރިޔަށްގެންދާނީވެސް މި އުސޫލާ އެއްގޮތަށް ކަމަށް ސީއެސްސީން ބުނެއެވެ.
ޓީޗަރުންގެ ވަޒީފާގެ އޮނިގަނޑުގެ މަގާމުތަކަށް މީހުން ހޮވުމާއި އައްޔަންކުރުމުގައި މި އުސޫލުގައި ބަޔާންކޮށްފައިވާ ކަންތައްތަކުގެ އިތުރުން، "ސިވިލް ސަރވިސްގެ ވަޒީފާތަކަށް މީހުން ހޮވުމާއި އައްޔަން ކުރުމުގެ މިންގަނޑުތަކާއި އުސޫލުތައް 2021 "ގައި ބަޔާންކޮށްފައިވާ ކަންތައްތަކާއި، ޓީޗަރުންގެ ވަޒީފާގެ އޮނިގަނޑުގައި ބަޔާންކޮށްފައިވާ ޚާއްސަ ކަންތައްތަކަށް އަމަލުކުރަންވާނެ ކަމަށްވެސް ސީއެސްސީން ބުނެއެވެ. އަދި ޓީޗަރުންގެ ވަޒީފާގެ އޮނިގަނޑުގައި ބަޔާންކުރާ މަގާމުތަކަށް އިއުލާންކޮށް މުވައްޒަފަކު އައްޔަނުކުރުމުގައި މި އުސޫލުގައި ބަޔާންކުރާ ހުރިހާ މަރުހަލާއެއް ފުރިހަމަ ކުރަން ވާނެކަމަށް ސީއެސްސީން ބުނެއެވެ.
ޓީޗަރުންގެ މަގާމުތަކަށް އިއުލާންކުރާނީ ހުރިހާ ރޭންކެއްގެ ހުރިހާ ގްރޭޑްތައް ހިމަނައިގެންކަމަށާއި މަގާމުތަކަށް އިއުލާންކުރުމުގައި ޝަރުތުގެ ގޮތުގައި ބޭނުންކުރަންވާނީ، ޓީޗަރުންގެ ވަޒީފާގެ އޮނިގަނޑުގައި ބަޔާންކޮށްފައިވާ ޝަރުތުތައްކަމަށް ސީއެސްސީން ވަނީ ބުނެފައެވެ. އަދި ސްކްރީން ކުރުމުގެ މަސައްކަތް ކުރިޔަށްގެންދާނީ "ސިވިލް ސަރވިސް ވަޒީފާތަކަށް މީހުން ހޮވުމާއި އައްޔަންކުރުމުގެ މިންގަނޑުތަކާއި އުސޫލުތައް 2021 "ގައި ބަޔާންކޮށްފައިވާ މިންގަނޑުގެ ތެރެއިންކަމަށް ވަނީ ބުނެފައެވެ.
މަގާމަށް އެންމެ ގާބިލު ފަރާތް ކަނޑައަޅާނީ، އެންމެ ގާބިލު ފަރާތް ހޮވުމަށް ކަނޑައަޅާފައިވާ، "މަގާމަށް ކުރިމަތިލީ ފަރާތްތަކަށް މާކުސް ލިބުނު ގޮތުގެ ޝީޓް" ފުރިހަމަ ކުރުމަށްފަހު، އޭގެ ތެރެއިން އެންމެ މަތިން މާކްސް ލިބޭ ފަރާތަކީ މަގާމަށް އެންމެ ގާބިލު ފަރާތްކަމުގައި ބަލައިގެންނެވެ. އެގޮތުން މާކްސް ދިނުމުގައި ކަނޑައަޅާފައިވަނީ އެމީހަކަށް ލިބިފައިވާ ތައުލީމާއި، މަސައްކަތުގެ ތަޖުރިބާ، ލިބިފައިވާ ހުނަރު އަދި އިންޓަރވިއު އާއި ޕްރެކްޓިކަލްސްގެ މައްޗަށެވެ.
ތައުލީމުގެ ބަޔަށް މާކްސް ދިނުމުގައި މަގާމުތަކަށް ކުރިމަތިލާ ފަރާތްތަކުން މަގާމުގެ އަސާސީ ޝަރުތު ހަމަވާނަމަ، ކްރައިޓީރިއާގައި އަސާސީ ޝަރުތު ހަމަވުމުން ދިނުމަށް ކަނޑައަޅާފައިވާ ޕޮއިންޓު ދޭންވާނެކަމަށް ވަނީ އުސޫލުގައި ބުނެފައެވެ. އެގޮތުން އަސާސީ ޝަރުތު ހަމަވުމުގެ ބައިގައި މާކްސް ދޭނެ ގޮތްކަމަށް އުސޫލުގައި ބުނެފައިވަނީ ސީ.އެސް 11 ރޭންކުން ޝަރުތު ފުރިހަމަވާކަމަށްވާނަމަ 25 ޕޮއިންޓެވެ. ސީ.އެސް 13 ރޭންކުން ޝަރުތު ފުރިހަމަވާކަމަށްވާނަމަ 30 ޕޮއިންޓެވެ. އަދި ސީ.އެސް 15 ރޭންކުން ޝަރުތު ފުރިހަމަވާކަމަށްވާނަމަ 35 ޕޮއިންޓެވެ. ތަޖުރިބާ އަށް ކަނޑައަޅާފައިވަނީ 5 ޕޮއިންޓެވެ. އެއީ އަސާސީ ޝަރުތަށްވުރެ އިތުރުވާ ތަޖުރިބާ އެވެ. ތަޖުރިބާއަށް މާކްސް ދިނުމުގައި ބަލާނީ ކުރިމަތިލާ މަގާމާ ގުޅުންހުރި ދާއިރާއަކުން ލިބިފައިވާ ތަޖުރިބާއަށެވެ. ކޮންމެ ކެންޑިޑޭޓަކަށްވެސް 5 ޕޮއިންޓަށްވުރެ އިތުރުނުވާނެގޮތަށް އަހަރަކަށް 1 ޕޮއިންޓުގެ މަގުން ތަޖުރިބާއަށް ޕޮއިންޓު ދޭންވާނެކަމަށް އުސޫލުގައި ބުނެފައިވެއެވެ. މަގާމުގެ އަސާސީ ޝަރުތު ހަމަކުރުމަށް ތަޖުރިބާގެ މުއްދަތު ބޭނުންވާނަމަ، އެ މުއްދަތު އުނިކުރުމަށްފަހު، ކޮންމެ ކެންޑިޑޭޓަކަށްވެސް 5 ޕޮއިންޓަށްވުރެ އިތުރުނުވާނެގޮތަށް އަހަރަކަށް 1 ޕޮއިންޓުގެ މަގުން ތަޖުރިބާއަށް ޕޮއިންޓު ދޭންވާނެއެވެ.
އިންޓަރވިއު އަށް ކަނޑައަޅާފައިވަނީ 25 ޕޮއިންޓެވެ. އަދި ޕްރެކްޓިކަލްސް އަށް 35 ޕޮއިންޓް ކަނޑައަޅާފައިވެއެވެ.
ސީއެސްސީން ބުނީ މަގާމުތަކަށް އައްޔަންކުރުމުގައި ވަޒީފާއަށް އެދިފައިވާ މީހާއަށް ހުރިހާ ބަޔަކުން ލިބުނު ޕޮއިންޓުގެ ޖުމްލަ %55 އަށްވުރެ މަތިވާންޖެހޭނެކަމަށެވެ. މިއުސޫލަށް 23 ސެޕްޓެމްބަރ އިން ފެށިގެން އަމަލުކުރަމުންދާނެ ކަމަށް ސީއެސްސީން ބުނެއެވެ.
