މި އަހަރުގެ މިހާތަނަށް 100ށް ވުރެ ގިނަ ސްކޮލަރޝިޕް ފުރުސަތު ހުޅުވާލެވިފައިވޭ: ހަޔަރ އެޑިއުކޭޝަން މިނިސްޓަރ
ޚާއްސަ އެހީއަށް ބޭނުންވާ ދާއިރާތަކުން 46 ސްކޮލަރޝިޕް އިއުލާން ކޮށްފައިވޭ
ހަޔާ އެޑިޔުކޭޝަން މިނިސްޓަރު ޑރ.އިބްރާހިމް ހަސަން،
މިއަހަރުގެ މިހާތަނަށް 100ށް ވުރެ ގިނަ ސްކޮލަރޝިޕްގެ ފުރުސަތު ހުޅުވާލެވިފައިވާ ކަމަށް ހަޔަރ އެޑިއުކޭޝަން މިނިސްޓަރ ޑރ.އިބްރާހިމް ހަސަން ވިދާޅުވެއްޖެއެވެ.
ބުރާސްފަތި ދުވަހުގެ ރޭ ރާއްޖެޓީވީގެ ފަލަސުރުޚީ ޕްރޮގްރާމްގައި ހަޔަރ އެޑިއުކޭޝަން މިނިސްޓަރު ވިދާޅުވީ މިނިސްޓްރީގެ ވެބްސައިޓުން މިހާރު ވެސް ގިނަ ސްކޮލަރޝިޕްގެ ފުރުސަތުތައް ފެންނާނެ ކަމަށެވެ. އެކި ދާއިރާތަކުން ސްކޮލަރޝިޕްގެ ފުރުސަތުތައް ހުޅުވާލާއިރު، ޚާއްސަ އިސްކަމެއްދީގެން ލާނިން ޑިސެބިލިޓީ ދާއިރާއިން 46 ސްކޮލަރޝިޕް އިއުލާން ކޮށްފައިވާ ކަަމަށް މިނިސްޓަރު ވިދާޅުވިއެވެ.
އެއީ ކްލިނިކަލް ސައިކޮލޮޖީން 10 ފުރުސަތު، އެޑިކްޝަން މެނޭޖްމެންޓްގެ ދާއިރާއިން 5 ފުރުސަތު، މެންޓަލް ހެލްތްގެ ނާސިންގ ދާއިރާއިން 11 ފުރުސަތު، ސައިކޭޓްރިކް ދާއިރާއިން 2 ފުރުސަތު، ސައިކޯތެރަޕީގެ ދާއިރާއިން 10 ފުރުސަތު އަދި މާސްޓަރސް ލާނިން ޑިސެބިލިޓީ ދާއިރާއިން 8 ފުރުސަތު ކަމަށް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ މާސްޓާސް ފެންވަރުގެ މި ސްކޮލަރޝިޕް ތަކަށް މިމަހުގެ 30 ގެ ނިޔަލަށް ކުރިމަތިލެވޭނެ ކަމަށެވެ.
މިނިސްޓަރު ވިދާޅުވީ މެންޓަލް ހެލްތު ނުވަތަ ލަރނިން ޑިސެބިލިޓީގެ ދާއިރާއިން ރައްޔިތުންނަށް ފޯރުކޮށްދޭން ޖެހޭ ޚިދުމަތްތައް ވަރަށް ގިނަ ކަމަށެވެ. މި ޚިދުމަތްތައް އެންމެ ރަނގަޅު ގޮތުގައި ފޯރުކޮށްދިނުމަށް ގިނަ ބަޔަކު ތަމްރީނު ކުރުމަކީ ވަރަށް މުހިންމު ކަމެއް ކަމަށް މިނިސްޓަރު ވިދާޅުވިއެވެ. އަދި ވިދާޅުވީ އެއް ދާއިރާއަކުން ގިނަ ބަޔަކު ތަމްރީނު ކުރެވިއްޖެކަމުގައިވާނަމަ އެކަމުގެ ފައިދާ މުޅި ގައުމަށް ކުރާނެ ކަމަށެވެ.
މިނިސްޓަރު ވިދާޅުވީ މިހާރު ވެސް އެކި ދާއިރާތަކުން މީހުން ތަމްރީނު ކުރުމުގެ މަސައްކަތްތައް ކުރަމުންދާ ކަމަށާއި، ދިވެހި ދަރިވަރުންނަށް ފަހި ފުރުސަތުތައް ހޯދައިދޭ ކަމަށެވެ. އެގޮތުން މިއަހަރުގެ މިހާތަނަށް 108 ށްވުރެ ގިނަ ސްކޮލަރޝިޕްގެ ފުރުސަތުތައް ހުޅުވާލެވިފައިވާކަން މިނިސްޓަރު ފާހަގަކުރެއްވިއެވެ.
