ދަރިވަރުންނަށް ޖަވާބު ދިނުން ލަސްވަނީ ރޭވިފައިވާ ވަރަށްވުރެން ގިނައިން ލޯނުދޭން ޖެހުމުން: މިނިސްޓަރު ހައިދަރު
ޑިގްރީ ސްކީމްގެ މަސައްކަތް ކުރާ ސެކްޝަންތަކަށް ދުވާލެއްގެ މައްޗަށް 600އަށް ވުރެ ގިނަ އީމެއިލް ލިބޭ
ހަޔަރ އެޑިއުކޭޝަން މިނިސްޓަރު ޑރ. އަލީ ހައިދަރު
ދަރިވަރުން ފޮނުވާ އީމެއިލްއާއި ސިޓީތަކަށް ޖަވާބު ދިނުން ލަސްވަނީ މި އަހަރާއި، މިދިޔަ އަހަރު ކުރިން ރޭވިފައިވާ ވަރަށްވުރެން ގިނަ ދަރިވަރުންނަށް ލޯނުދޭން ހަމަޖެއްސުމުން ކަމަށް ހަޔަރ އެޑިއުކޭޝަން މިނިސްޓަރު ޑރ. އަލީ ހައިދަރު ވިދާޅުވެއްޖެއެވެ.
ބުދަ ދުވަހު ރައްޔިތުންގެ މަޖިލީހަށް ލިޔުމުން ދެއްވި ޖަވާބުގައި މިނިސްޓަރު ހައިދަރު ވިދާޅުވީ މިނިސްޓްރީގެ ސްކޮލަރޝިޕް ސެކްޝަނަށާއި، ލޯނު ސެކްޝަނާއި، ސަރުކާރު ހަރަދުކޮށްގެން ކިޔަވައިދޭ ފުރަތަމަ ޑިގްރީ ސްކީމްގެ މަސައްކަތްތައް ބަލަހައްޓަމުން ގެންދާ ސެކްޝަންތަކަށް ދުވާލެއްގެ މައްޗަށް 600އަށް ވުރެ ގިނަ އީމެއިލް ސިޓީ ލިބޭ ކަމަށާއި، ބައެއް ދުވަސްވަރަށް އެ އަަދަދު އެއަށްވުރެ ވެސް މައްޗަށްދާ ކަމަށެވެ.
މިނިސްޓަރު ހައިދަރު ވިދާޅުވީ ލޯނާއި، ސްކޮލަރޝިޕާއި، ފުރަތަމަ ޑިގްރީ ސްކީމްގައި ބައިވެރިވާ ދަރިވަރުންގެ އަދަދު އިތުރުވުމަކީ ވެސް ލިބޭ އިންކުއަރީޒް އިތުރުވާ ކަމެއް ކަމަށެވެ.
މިއަހަރާއި، މިދިޔަ އަހަރު ކުރިން ރޭވިފައިވާ ވަރަށްވުރެން ގިނަ ދަރިވަރުންނަށް ލޯނުދޭން ހަމަޖެއްސުމުން ދަރިވަރުންނާ ކުރަން ޖެހުނު މުއާމަލާތްތައް ވަރަށް ބޮޑުތަން އިތުރުވިކަން ފާހަގަކުރައްވައި މިނިސްޓަރު ހައިދަރު ވިދާޅުވީ ޝޯސަލް މީޑިއާގައި އެހެނިހެން ފްލެޓުފޯމުތަކުގައި ސަރުކާރުން އެހާ ގިނަ ދަރިވަރުންނަށް ފައިސާ ނުދެވޭނެކަމަށް ދެކެމުން ދިޔަ ވާހަކަތަކާއި، ގުޅިގެންނާއެކު އަދި ފައިސާ ލިބުމުގެ ކަންކަން އެކަމަށް ހޭދަވާނެ ކަމަށް އަންދާޒާކޮށް ދަރިވަރުންނަށް މައުލޫމާތުދީފައި އޮންނަ މުއްދަތަށްވުރެން މާކުރު މުއްދަތެއްގެ ތެރޭގައި ފައިިސާގެ ކަންކަން ހަމަޖެހިގެން ދިޔުން އެދި އެކިއެކި ފަރާތްތައް މެދުވެރިކޮށް ފޯނުންނާއި، އެހެނިހެން ވަސީލަތްތައް ބޭނުންކޮށްގެން ތަކުރާރުކޮށް ސުވާލު ކުރެވެމުން ދިޔުމުން ސެކްޝަންތަކުގެ މުވައްޒަފުންގެ މަސައްކަތްތައް ވަރަށް ބޮޑަށް އިތުރުވެ އެ ސެކްޝަންތަކުން ކުރުމަށް ކަނޑައަޅާފައިވާ މަސައްކަތްތައް ކުރަމުން ދުވާލަކަށް ލިބެމުންދާ އީމެއިލްތަކަށް ޖަވާބު ނުދެވޭ ކަމަށެވެ.
މީގެ އިތުރުން މިނިސްޓަރު ހައިދަރު ވިދާޅުވީ އެންމެ އިސްކަމެއްދީހެން މަސައްކަތް ކުރެވެމުން ގޮސްފައިވަނީ ދަރިވަރުންނަށް ފައިސާ ކުރުމުގެ ކަންކަން ކަމަށެވެ.
ނަތީޖާއެއް ގޮތުން މި ފާއިތުވީ އެއްވެސް އަހަރެއްގައި ދޫކުރެވިފައިނުވާ ފަދައިން މިދިޔަ އަހަރު ވަނީ 1.2 މިލިއަނަށްވުރެން ބޮޑު އަދަދެއްގެ ފައިސާވަނީ ދަރިވަރުންގެ ކޯސްފީ އާއި، ދިރިއުޅުމުގެ ހަރަދާއި، އެހެނިހެން ކަންކަމަށް ސީދާ ދަރިވަރުންގެ ނަމުގައި ދޫކުރެވިފައިވެއެވެ. ފައިސާ ދޫކުރުން އެއީ އެންމެ އިސްކަންދީގެން ކުރަމުން ގެންދާ މަސައްކަތް ނަމަވެސް މިނިސްޓްރީއަށް ލިބޭ ސިޓީއާއި އީމެއިލްތަކަށް އެންމެ ގިނަ ދުވަސް ވެގެން ވެސް 7 ދުވަހުގެ ތެރޭގައި ޖަވާބު ދެވޭތޯ ބަލަމުން ގެންދެވުނެއެވެ. އަދި މިހާރު މިނިސްޓްރީ ޓާގެޓްކޮށް، މަސައްކަތް ކުރަމުން ގެންދަނީ 3 ދުވަހުގެ ތެރޭގައި ސިޓީއާއި، އީމެއިލް އަށް ޖަވާބު ދެމުން ގެންދެވޭތޯ ބެލުމަށެވެ.ހަޔަރ އެޑިޔުކޭޝަން މިނިސްޓަރު ޑރ. އަލީ ހައިދަރު ލިޔުމުން ފޮނުވާފައިވާ ޖަވާބުގައި ވިދާޅުވި
ދަރިވަރުންނަށް ޖަވާބު ދިނުން އަވަސް ކުރުމަށް ކުރެވޭ މަސައްކަތްތަކާއި ގުޅޭގޮތުން މިނިސްޓަރު ހައިދަރު ލިޔުމުން ފޮނުއްވި ޖަވާބުގައި ވިދާޅުވީ ދަރިވަރުންނަށް ދޭ ޚިދުމަތްތައް އަވަސް ކުރުމަށް ދަރިވަރުންގެ މައުލޫމާތުތައް ބަލަހައްޓާނެ ޕޯޓަލްއެއް އުފެއްދުމުގެ މަސައްކަތްތައް މިހާރު ފެށި މިއަހަރުގެ އޮކްޓޫބަރުގެ ނިޔަލަށް އެޕޯޓަލް މެދުވެރިކޮށް ބެލެހެއްޓެން ފެށުުމުން ދަރިވަރުންގެ ރިކުއެސްޓްސް ޖަވާބު ދެވުން ވަރަށް ބޮޑުތަން އަވަސްވާނެ ކަމަށް ބެލެވޭ ކަމަށެވެ.
މިނިސްޓަރު ހައިދަރު ވިދާޅުވީ ކޮންމެ އަހަރެއްގެ ސެޕްޓެންބަރު މަހަކީ މިނިސްޓްރީ އިއުލާންކުރާ ސްޓޫޑެންޓް ލޯނު ސްކީމް ހޮވޭ ދަރިވަރުން ފައިސާއަށް އެދި ފޯމް ހުށަހަޅާން ފަށާ ދުވަސްވަރު ކަމަށްވުމާއެކު، މިދުވަސްވަރުގައި ފާހަގަކުރެވޭ ވަރަށް މަސައްކަތްތައް އިތުރުވެގެން ދާތީ، އަވަހަށް ޚިދުމަތްދިނުމަށް ސަރުކާރުގެ އެހެން އޮފީސްތަކުން ވެސް މުވައްޒަފުން ގެނެވޭ ކަމަށެވެ. އަދި އިންޓަރނުންގެ ގޮތުގައި ވެސް މުވައްޒަފުން ނަގައިގެން މަސައްކަތް ކުރެވޭ ކަމަށެވެ.
މީގެ އިތުރުން ދަރިވަރުންގެ ފަރާތުން އަންނަ ސުވާލުތަކަށް އަވަސްމިނެއްގައި ޖަވާބު ދާރީވުމަށް މިނިސްޓްރީގައި ކޯލް ސެންޓަރެއް އުފެއްދުމުގެ މަސައްކަތްތައް ވެސް މިހާރު ކުރިއަށްދާ ކަމަށް މިނިސްޓަރު ހައިދަރު ވިދާޅުވިއެވެ.
