މާލެ ސިޓީ ކައުންސިލުން 50 ސްކޮލަރޝިޕްގެ ފުރުސަތު
މި ތަމްރީން ޕްރޮގްރާމްތައް އޮންނާނީ ޕާކިސްތާނުގައި
މާލެސިޓީ ކައުންސިލްގެ ބައްދަލުވުމުގެ ތެރެއިން
މާލެ ސިޓީ ކައުންސިލުން މާލެ ސިޓީގެ ރައްޔިތުންނަށް، 50 ސްކޮލަރޝިޕްގެ ފުރުސަތު ހުޅުވާލައިފިއެވެ.
މަސައްކަތްތެރިކާމާއި ފަންނީ ތަމްރީނު ހޯދުމަށް ތަފާތު ހަ ދާއިރާ އަކުން ހުޅުވާލި މި ފުރުސަތުތަކަކީ މާލެ ސިޓީ ކައުންސިލާއި، ސްޓްރޯންގް ސިޓީސް ސައުތު އޭޝިއާ ރީޖަނަލް ހަބާ އެކު ވެފައިވާ އެއްބަސް ވުމެއްގެ ދަށުން މާލެ ސިޓީ ކައުންސިލުން ހޯދާފައިވާ ފުރުސަތުތަކެކެވެ.
15 އޭޕްރިލް 2025 ވަނަ ދުވަހު ހުޅުވައިލައިފައިވާ މި ސްކޮލަރޝިޕް ފުރުސަތު ތަކުގެ ތެރޭގައި، ސިއްހީ ދާއިރާއާއި، އިމާރާތް ކުރުމާއި، އިންޖެނިއަރިންގެ ދާއިރާއާއި، ތައުލީމީ ދާއިރާގެ އިތުރުން، އައިޓީ އަދި ޑިޖިޓަލް ދާއިރާ ހިމެނެއެވެ. މީގެ އިތުރުން ވެސް ވިޔަފާރީގެ ދާއިރާއާއި ހޮސްޕިޓަލިޓީ އަދި ކަސްޓަމަރ ކެއަރ ގެ އިތުރުން ދަނޑުވެރިކަމުގެ ދާއިރާއިން ފުރުސަތު ހުޅުވާލާފައިވެއެވެ.
3 މަހާއި 6 މަހާ ދެމެދުގެ މުއްދަތަކަށް ކުރިޔަށް ގެންދިޔުމަށް ހަމަޖެހިފައިވާ މި ތަމްރީން ޕްރޮގްރާމްތައް އޮންނާނީ ޕާކިސްތާނުގައެވެ. މި ޕްރޮގްރާމްތަކަށް ހޮވޭ ފަރާތްތަކަށް، މާލެއިން ޕާކިސްތާނަށް ދިއުމުގެ ދަތުރު ޚަރާދާއި، ހުރުމާއި ކެއުން އަދި ކޯސް ފީ ލިބިގެންދާނެ މާލެސިޓީ ކައުންސިލުން ބުނެއެވެ.
މި ސްކޮލަރޝިޕްތަކަށް މީހުން ހޮވުމުގައި އޯލެވެލް ނަތީޖާގެ އިތުރުން ޝޯޓްލިސްޓް ކުރެވޭ ފަރާތްތަކުގެ މެދުގައި ކުރެވޭ އިންޓަވިއު އިން ލިބޭ ނަތީޖާއަށް ބެލެވޭނެ ކަމަށް ސިޓީ ކައުންސިލުން ވަނީ ހަމަކޮށްފައެވެ.
މި ސްކޮލަރޝިޕްތަކުގައި ބައިވެރިވުމަށް ޝައުގުވެރިވާ ފަރާތްތަކުން، 28 އޭޕްރީލް 2025، އާދިއްތަ ދުވަހުގެ 13:00 ގެ ކުރިން ފޯމް ހުށަހަޅަންޖެހޭ ކަމަށް ކައުންސިލުން ބުނެއެވެ.
