އިންޓަރނެޓް ފްރީޑަމް ލިސްޓުގެ ފަސްވަނައިގައި ވާދަވެރި ޓައިވާނުން ހޯދިއިރު، މި ލިސްޓުގެ ފުލުގައި މިފަހަރުވެސް ޗައިނާ ހިމެނިއްޖެއެވެ.
މިއީ ހައުސް ފްރީޑަމްއިން ނެރޭ އިންޓަރނެޓް ފްރީޑަމް ލިސްޓުގެ ފުލުގައި ޖެހިޖެހިގެން ޗައިނާ ހިމެނުނު ހަތްވަނަ ފަހަރެވެ. އަނެއްކޮޅުން މިއީ ޓައިވާނު މި ލިސްޓުން ޖާގަ ހޯދި ފުރަތަމަ ފަހަރެވެ. ޓައިވާނުގެ އިތުރުން ކޮސްޓަރިކާއާއި ގާނާ އަދި ސަރބިއާވެސް ވަނީ މިއަހަރުގެ ލިސްޓުން ފުރަތަމަ ފަހަރަށް ޖާގަ ހޯދާފައެވެ.
ލިސްޓުގެ ފަސްވަނަ ޓައިވާނަށް ލިބުނުއިރު، އެގައުމު ވަނީ އޭޝިއާ ސަރަހައްދުން އެއްވަނަ ހޯދާފައެވެ. އެގައުމަށް ވަނީ ޖުމްލަ 80 ޕޮއިންޓް ލިބިފައެވެ. ލިސްޓުގެ އެއްވަނައިގައި އޮތް އައިސްލޭންޑަށް 96 ޕޮއިންޓް ލިބިފައިވާއިރު، ދެވަނައިގައި އޮތް އެސްޓޯނިއާއަށް 94 ޕޮއިންޓް ވަނީ ލިބިފައެވެ. އަދި ތިންވަނައިގައި އޮތް ކެނެޑާއަށާއި ހަތަރުވަނައިގައި އޮތް ކޮސްޓަރިކާއަށް 87 ޕޮއިންޓް ވަނީ ލިބިފައެވެ.
އިންޓަނެޓް ފްރީޑަމް ލިސްޓުން ޖާގަ ހޯދުމާއިއެކު ޓައިވާނުން ވަނީ މިއީ އެގައުމުގެ ރައްޔިތުންނަށް ލިބިގެންދިޔަ ކާމިޔާބީއެއްގެ ގޮތުގައި ސިފަކޮށްފައެވެ. އަދި އެގައުމަކީ ކަންކަމުގައި ހަރުކަށި ގައުމެއް ނޫންކަން މި ލިސްޓާއެކު ދުނިޔެއަށް ސާބިތުވެގެން ގޮސްފައިވާ ކަމަށް ޓައިވާނުން ބުނެއެވެ.
