ސްޓެލްކޯގެ އިންޖީނުތަކުގެ ސަބަބުން ވާ އުނދަގޫތަކަށް ދާއިމީ ހައްލެއް ހޯދުމަށް އެ އިންޖީނުތައް ސައުންޑް ޕްރޫފްކޮށް، ދުންހޮޅިތައް އުސްކުރަން އެންގުމަށް ރައްޔިތުންގެ މަޖިލީހުގެ ސްޓޭޓް އޯންޑް އެންޓަރޕްރައިޒަސް ކޮމިޓީ އާއި އެންވަޔަރުމެންޓް އެންޑް ކްލައިމެޓް ޗޭންޖް ކޮމިޓީގެ ޖޮއިންޓް ކޮމިޓީން ފާސްކޮށްފިއެވެ.
ސްޓެލްކޯ ހުންނަ ސަރަައްދުގައި ދިރިއުޅޭ މީހުންނަށް އެ ކުންފުނީގެ އިންޖީނުތަކުގެ ސަބަބުން ވާ އުނދަގޫތަކަށް ދާއިމީ ހައްލެއް ހޯދުމަށް ގަލޮޅު ދެކުނު ދާއިރާގެ މެމްބަރު މީކާއިލް ނަސީމް ހުށަހަޅުއްވާފައިވާ ގަރާރު ދިރާސާކޮށް، އެ ކަން ހައްލުކުރުމަށް ސަބް ކޮމިޓީއަކުން ފާއިތުވި ހަފުތާގައި ރިކޮމެންޑޭޝަންތަކަކާއެކު ރިޕޯޓް ވަނީ ހުށަހަޅާފައެވެ.
މީހުން ދިރިއުޅޭ ސަރަހައްދާ މާ ކައިރީގައި ސްޓެލްްކޯގެ ޖަނަރޭޓަރުތައް ބެހެއްޓުމުގެ ސަބަބުން އާންމުންނަށް ލިބޭ ގެއްލުންތަކަށް ހައްލު ހޯދައިދިނުމަށް ހުށަހެޅި ގަރާރު ދިރާސާ ކުރުމަށްފަހު އެކުލަވާލި ރިޕޯޓު ދިރާސާކުރުމަށް ބުދަ ދުވަހު ބޭއްވި ތިމާވެއްޓާ ބެހޭ ކޮމެޓީ އާއި އެސްއޯއީގެ ޖޮއިންޓް ކޮމިޓީން އިސްލާހުތަކެއް ހުށަހަޅާފައި ނުވެއެވެ.
ކޮމިޓީން ފާސްކުރި ރިޕޯޓުގައި ހިމެނެނީ، އިންޖީނުތައް ސައުންޑް ޕްރޫފް ކުރުމާއި ވައިބްރޭޝަން ކުޑަކުރާ ސިސްޓަމެއް ހަރުކޮށް، ދުންހޮޅިތައް އުސްކުރަން އެންގުމެވެ. އެ މަސައްކަތް 2022 ގެ ނިޔަލަށް އެންމެ ލަސްވެގެން ކުރުމަށެވެ. އެ ރިޕޯޓް މަޖިލީހުން ފާސްކުރާތާ 45 ދުވަހުގެ ތެރޭގައި ބެކަޕް ޕަވަރ ހައުސްތައް އަޕްގްރޭޑް ކުރާނެ ގޮތުގެ ޕްލޭނާއި ވަގުތީ ތާވަލެއް ސްޓެލްކޯ އިން އެކުލަވާލައި އެސްއޯއީ ކޮމިޓީ އަށް ފޮނުވަން ޖެހެއެވެ.
ސްޓެލްކޯގެ އިންޖީނުގެ އެހެން ތަނަކަށް ބަދަލު ނުކުރެވޭނަމަ އެ ސަަރަހައްދުގައި އުޅޭ އާންމުންނަށް އެހެން ގޮތެއް ހޯދައި ދިނުމަށްވެސް ރިޕޯޓުގައި ހިމަނާފައިވެއެވެ. މުސްތަގުބަލުގައި މާލެއަށް ކަރަންޓުދޭން ރާވާފައިވަނީ ތިލަފުއްޓާއި ހުޅުމާލެއިން ކަމަށްވާތީ، އެކަން ކުރުމަށް ކަނޑައަޅާފައިވާ ސުންގަނޑިތަކަށް އެ މަސައްކަތް ނިންމުން އަވަސްކުރަން ކަމާބެހޭ އިދާރާތަކަށް އަންގަން ޖެހެއެވެ.
އެ މައްސަލައަށް ދާއިމީ ހައްލެއް ހޯދުމަށް ސަރުކާރުން ޕޮލިސީ ލެވެލެއްގައި ގޮތްތަކެއް ނިންމުމަށް އެންގުމާއި، ސްޓެލްކޯގެ ގޯތިތެރޭގައި ހުރި ތެޔޮ ތާނގީތަކުން ނުރައްކާތެރި ހާދިސާއެއް ދިމާނުވާނެ ކަން ކަށަވަރުކުރުމާއި ގަވާއިދާ އެއްގޮތަށް ހުރިތޯ ބަލަން އެންގުންވެސް ހިމެނެއެވެ. އަދި ކޮމިޓީގެ ރިޕޯޓު ސްޓެލްކޯ އިން ތަންފީޒު ކުރަމުންދޭތޯ އެސްއޯއީ ކޮމިޓީން ގަވާއިދުން މޮނިޓާކުރުމަށްވެސް ވަނީ ހިމަނާފައެވެ.
މި މައްސަލަ ހައްލުކޮށްދެއްވުމަށް އެދި ޖޫން މަހު މީކާއިލް މަޖިލީހަށް ހުށަހެޅުއްވި ގަރާރުގައި ވިދާޅުވެފައި ވަނީ އިންޖީނުގެ އެހެން ތަނަކަށް ބަދަލުކުރުން އަވަސް ކުރުމަށާއި އެ މަސައްކަތް ނިމެންދެން ވަގުތީ ހައްލެއް ހޯދައިދެއްވުމަށެވެ.
