ކުރީގެ ފިރިމީހާ މަރާލި ކަމުގެ ކުށުގައި އުމުރަށް ޖަލަށް ލުމަށް ކްރިމިނަލް ކޯޓުން ކުރި ހުކުމަށް ހައިކޯޓުންވެސް ތާއީދުކޮށްފައިވާ ހެންވޭރު ބައިކެނޑިގޭ މަރިޔަމް ނަޒާހާގެ ފަރާތުން ސުޕްރީމް ކޯޓުގައި އިސްތިއުނާފު ކުރި މައްސަލަ ބަލައިނުގަތުމުން އޭނާގެ ފަރާތުން ހުށައެޅި އިޖުރާއީ މައްސަލައިގެ އަޑުއެހުމެއް ސުޕްރީމް ކޯޓުގައި ކުރިއަށް ގެންގޮސްފިއެވެ.

ނަޒާހާގެ ކުރީގެ ފިރިމީހާ ހަސަން ޝާހިދު 2010 ވަނަ އަހަރުގެ ޖޫން މަހުގެ 22 ވަނަ ދުވަހުގެ މެންދުރުފަހު 3:00 އެހާކަންހާއިރު މަރުވީ، ނަޒާހާ އޭނާގެ ބުރަކަށްޓަށް ވަޅިހެރުމުން ލިބުނު ޒަޚަމްތަކުގެ ސަބަބުންކަން ސާބިތުވެ ދަށު ކޯޓުން ކުރި ޙުކުމަށް ހައިކޯޓުން ވަނީ ތާއީދުކޮށްފައެވެ. އެ ނިންމުން އޭނާގެ ފަރާތުން ސުޕްރީމް ކޯޓުގައި އިސްތިއުނާފު ކުރުމުން، މައްސަލަ ބަލައިނުގަތުމަށް ވަނީ ނިންމާފައެވެ. އެއާއެކު އޭނާގެ ފަރާތުން ރަޖިސްޓަރާގެ އެ ނިންމުން އިސްތިއުނާފު ކޮށްފައިވާތީ ބުދަ ދުވަހު ބޭއްވި އަޑުއެހުމަކީ އެކަމާ ގުޅޭ އިޖުރާއީ އަޑުއެހުމެކެވެ.

ސުޕްރީމް ކޯޓުގައި މި މައްސަލަ ބައްލަވާ ފަނޑިޔާރުންގެ ބެންޗުގައި ހިމެނިވަޑައިގަންނަވަނީ ފަނޑިޔާރު އަލީ ރަޝީދު ހުސައިން، ޑރ އަޒްމިރަލްދާ ޒާހިރު އަދި މުޙައްމަދު އިބްރާހިމްއެވެ.

ކުރީގެ ޑެޕިއުޓީ ޕީޖީ ނަޒާހާގެ ވަކީލަކަށް

އަޑުއެހުން ފައްޓަވަމުން ދައުލަތުގެ ވަކީލުން ވަނީ ނަޒާހާގެ ވަކީލަކީ 2016ން 2019ށް ޕީޖީ އޮފީހުގައި މަސައްކަތް ކުރައްވާފައިވާ ފަރާތެއްކަން ފާހަގަ ކުރައްވައި، މި މައްސަލަ އޭރު ކުރިއަށްދިޔައިރުވެސް އޭނާ ޕީޖީ އޮފީހުގައި އުޅުއްވިކަމަށް ވިދާޅުވެފައެވެ. ވުމާއެކު ޝަރީއަތް ކުރުމާބެހޭ ޖިނާއީ އިޖުރާއަތުގެ ޤަވާއިދުގެ ދަށުން އޭނާއަށް މި މައްސަލައިގައި ވަކީލެއްގެ ގޮތުން ތަމްސީލު ނުކުރެވޭނެކަމަށް ދައުލަތުގެ ވަކީލު ވިދާޅުވިއެވެ. އެގޮތުން މި މައްސަލައިގައި ނަޒާހާގެ ވަކީލެއްގެ ގޮތުގައި އިންނެވީ ކުރީގެ ޑެޕިއުޓީ ޕީޖީ މަރިޔަމް ނިހާޔަތުއެވެ. އޭރު ނިހާޔަތު ޙަވާލުވެވަޑައިގެން ހުންނެވީ ޕީޖީ އޮފީހުގެ އެޕީލް ޔުނިޓާކަމަށް ދައުލަތުގެ ވަކީލު ވިދާޅުވިއެވެ.

ވަކީލު އިތުރަށް ވިދާޅުވީ، އެޕީލް ޔުނިޓާ ޙަވާލުވެ ހުންނެވި ފަރާތެއްގެ ހައިސިއްޔަތުން ނިހާޔަތަކީ ހައިކޯޓުގެ ނިންމުން އޭރު ސުޕްރީމް ކޯޓުގައި އިލްތިމާސް ކުރުމާއި ނުކުރުމާމެދު ގޮތެއް ނިންމުމުގެ އިޚުތިޔާރުވެސް އޮތް ފަރާތެއް ކަމަށެވެ. އެކަން ފާހަގަކުރައްވައި ސުޕްރީމް ކޯޓަށް ސިޓީއެއްވެސް ފޮނުވާފައިވާއިރު، ޝަރީއަތުން ވަނީ އެ ސިޓީގެ ޖަވާބުވެސް ފޮނުވާފައިވާނެކަން ފާހަގަކޮށްފައެވެ. އެގޮތުން ފަނޑިޔާރު އަލީ ރަޝީދު ހުސައިން ވިދާޅުވީ، ނިހާޔަތު ޕިޖީ އޮފީހުގެ މަޤާމަށް ވަޑައިގެންފައިވަނީ މި މައްސަލަ ހައިކޯޓުން ނިންމިފަހުން ކަމަށެވެ.

މި މައްސަލަ ހައިކޯޓުން ނިންމާފައިވަނީ 31 މެއި 2015 ގައެވެ. އަލީ ރަޝީދު ވިދާޅުވީ، ސުޕްރީމް ކޯޓަށްވެސް މި މައްސަލަ ހުށައަޅާފައިވަނީ ނިހާޔަތު ޕީޖީ އޮފީހުން ވަކިވެވަޑައިގެން ފަހުން ކަމަށެވެ. ވުމާއެކު މި މައްސަލައިގައި ނަޒާހާގެ ވަކީލެއްގެ ގޮތުން ނިހާޔަތު އިންނެވުމަކީ މައްސަލައެއް ނޫންކަމަށް ފަނޑިޔާރުންގެ ބެންޗަށް ޤަބޫލު ކުރެވޭކަމަށްވެސް އަލީ ރަޝީދު ވިދާޅުވިއެވެ.

ނަޒާހާގެ ފަރާތުން ފާހަގަކުރި ކަންކަން:

ނަޒާހާގެ ވަކީލު ނިހާޔަތު ވިދާޅުވީ، ނަޒާހާއަކީ ގިނަ އަހަރުތަކެއް ވަންދެން އޭނާގެ ފިރިމީހާގެ ފަރާތުން ގެވެށި އަނިޔާ ލިބެމުންދިޔަ ފަރާތެއް ކަމަށެވެ. އެކަން ސިއްޙީ ރެކޯޑުތަކުންވެސް ދައްކާކަން ނިހާޔަތު ފާހަގަ ކުރެއްވިއެވެ. އެހެންނަމަވެސް މިއަދާ ހަމައަށްވެސް އޭނާއަށް ކުރިމަތިވި އަނިޔާތަކާއި ނަފްސާނީ ގެއްލުން ވަޒަން ކުރުމަށް އެއްވެސް ވަރަކަށް އެސެސްމަންޓެއް ހެދިފައިނުވާކަން ފާހަގަ ކުރައްވައި ނިހާޔަތު ވިދާޅުވީ، އޭނާ މިހާތަނަށްވެސް ނަފްސާނީ އަނިޔާތައް ތަޙައްމަލު ކުރަމުންދާ ކަމަށެވެ. އަދި އޭރު ނަޒާހާގެ ދަރިއަކުވެސް ހުރި ކަމަށާއި، ދަރިފުޅުގެ ޙައްޤުގައިވެސް ވިސްނަންޖެހޭ ކަންކަން ހުރި ކަމަށް ނިހާޔަތު ވިދާޅުވިއެވެ.

ނިހާޔަތު ވިދާޅުވީ، ހައިކޯޓުގެ މަރުޙަލާގައިވެސް ނަޒާހާގެ ފަރާތުން ގިނަ މަސައްކަތްތަކެއް ކުރި ކަމަށާއި، އޭނާއަށް ކޯޓުގެ ނިންމުމާއެކު ބޮޑު މާޔޫސްކަމެއް ލިބިގެންދިޔަ ކަމަށެވެ. އޭރުވެސް މި މައްސަލައާއި ގުޅުވައި ނަޒާހާގެ ދަރިފުޅާއި އޭނާގެ އާއިލާއަށް އެކިކަހަލަ ފުރައްސާރަ ކުރިމަތިވިކަން ފާހަގަ ކުރައްވައި ވަކީލާ ވިދާޅުވީ އެމީހުންނަށް އިތުރު ތަކުލީފެއް ނުދިނުމަށް އޭރު އޭނާ މިކަމުގައި ކުރިއަށް ނުދިޔައީ ކަމަށެވެ. ނަމަވެސް މިހާރު ދަރިފުޅު ބޮޑުވެ، ކަންކަން ވިސްނޭވަރު ވެއްޖެ ކަމަށާއި، ލަހުން ނަމަވެސް، އޭނާގެ އަޑު ޝަރީއަތަށް އިއްވަންޖެހޭކަން ނަޒާހާއަށް ޤަބޫލު ކުރެވޭ ކަމަށް ވަކީލު ވިދާޅުވިއެވެ.

ނަޒާހާ ފާހަގަކުރި ކަންކަން:

އަޑުއެހުމުގައި ވާހަކަ ދައްކަމުން ނަޒާހާ ބުނީ، މަރުގެ މައްސަލައެއް ނަމަވެސް މިއީ އާއިލީ ބޮޑު މައްސަލައެއް ކަމަށެވެ. އެގޮތުން މައްސަލައިގެ ސަބަބުން ދަރިފުޅަށް ސުކޫލުންނާއި އެހެން ދަރިވަރުންގެ ފަރާތުން ކުރިމަތިވި ކަންކަމާއި، އާއިލާ މީހުންނަށް ވަޒީފާގެ މާހައުލުގައި ކުރިމަތިވި ކަންކަން ނަޒާހާ ވަނީ ހިއްސާކޮށްފައެވެ. އަދި ދަރިފުޅަށް އެއްވެސް ކަހަލަ ނަފްސާނީ މައްސަލައެއް ކުރިމަތިވާން ނޭދޭތީއާއި، ދަރިފުޅު ބޮޑުވުމުން ވިސްނައިދިނުމަށްފަހު އެކަމުގައި ކުރިއަށްދާން މަޑުކުރީކަން ނަޒާހާ ފާހަގަ ކުރިއެވެ.

ދައުލަތުން ފާހަގަކުރި ކަންކަން:

ދައުލަތުގެ ވަކީލާ ވިދާޅުވީ، މި މައްސަލަ ހައިކޯޓުން ނިންމިއިރު އިސްތިއުނާފު ކުރުމަށް 60 ދުވަހުގެ މުއްދަތެއް ދީފައިވާ ކަމަށެވެ. އަދި އެ މުއްދަތަށް އިސްތިސްނާއެއް އަންނަނީ އަމިއްލަ ބާރު ނުފޯރާ ކަމެއް މެދުވެރިވެގެން އެ މުއްދަތުގައި ހުށަނޭޅޭ މައްސަލަތައް އެކަނި ކަމަށެވެ. ނަޒާހާގެ ފަރާތުން މި މައްސަލަ އިސްތިއުނާފު ކުރަން ހުށައެޅީ މައްސަލަ ނިންމިތާ 6 އަހަރާއި، 1 މަހާއި 5 ދުވަސް ފަހުން 5 ޖުލައި 2021 ގައެވެ. އަދި އޭނާ ހުށައަޅާފައިވާ ސަބަބުތަކަކީ އެކަށީގެންވާ އަދި އަމިއްލަ ބާރު ނުފޯރުވޭފަދަ މަޤްބޫލު ސަބަބެއްކަމަށް ދައުލަތަށް ނުފެންނަކަން ވަކީލާ ފާހަގަ ކުރެއްވިއެވެ.

މި މައްސަލައިގައި ނަޒާހާގެ މައްޗަށް ކޮށްފައިވާ ޙުކުމާއި ގުޅިގެން އޭނާ ވަނީ ކްލެމެންސީ ބޯޑަށް އަދަބު ލުއިކޮށްދިނުން އެދި ސިޓީއެއްވެސް ހުށައަޅާފައެވެ. ނަޒާހާ އުމުރަށް ޖަލަށްލުމަށް ހުކުމް ކޮށްފައި ވަނީ ޝާހިދުގެ ވާރުތަވެރިންގެ ތެރެއިން އެކަކު މަރަށްމަރު ހިފަން ބޭނުން ނުވާ ކަމަށް ބުނުމުންނެވެ. އެގޮތުން މިހާރު އޭނާ ޖަލުގައި 11 އަހަރާއި 3 މަސް ހޭދަކޮށްފައިވާއިރު، ޙުކުމުގެ ބާކީ އޮތް މުއްދަތުން 5 އަހަރު އުނިކުރުމަށް ކްލެމެންސީ ބޯޑުން ވަނީ ނިންމާފައެވެ.

މި މައްސަލައިގައި ދެފަރާތުން ފާހަގަކުރި ކަންކަމަށް ފަނޑިޔާރުންގެ މެދުގައި ބަހުސް ކުރެއްވުމަށްފަހު، ނިންމަވާ ގޮތެއް ލިއުމުން އަންގަވާނެކަމަށް ޝަރީއަތުން ފާހަގަކުރިއެވެ.