އަންގާރަ ދުވަހު ކޮވިޑަށް ޕޮޒިޓިވްވި މީހުންގެ ޖުމްލަ އަދަަދަކީ 220

އަންގާރަ ދުވަހު ކޮވިޑަށް ޕޮޒިޓިވްވި ޖުމްލަ މީހުންގެ އަދަދު 220ށް އަރައިފިއެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ)އިން އާންމު ކުރި ތަފާސްހިސާބުތަކުން ދައްކާ ގޮތުގައި އިތުރަށް ޕޮޒިޓިވްވި 220 މީހުންގެ ތެރޭގައި އަތޮޅުތަކުގެ ރަށްތަކުން 164 މީހަކު ޕޮޒިޓިވްވެފައިވާއިރު މާލެސަރަހައްދުން 45 މީހަކު ވަނީ ޕޮޒިޓިވްވެފައެވެ. އަަދި ރިސޯޓުތަކުން 5 މީހަކު ޕޮޒިޓިވްވެފައިވާއިރު ލިވްއަބޯޑްތަކުން 6 މީހަކު ވެސް ވަނީ ޕޮޒިޓިވްވެފައެވެ.

އެޗްޕީއޭއިން އާންމުކޮށްފައިވާ މައުލޫމާތުން ހޯމަ ދުވަހުގެ އިރުއޮއްސި 6:00އިން އަންގާރަ ދުވަހުގެ އިރުއޮއްސި 6:00އާ ދެމެދު 5،166 ސާމްޕަލްއެއް ވަނީ ޓެސްޓުކޮށްފައެވެ.

އެޗްޕީއޭއިން ބުނީ ކޮވިޑަށް ޕޮޒިޓިވްވި ކަމަށް ރާއްޖެއިން ރެކޯޑުކުރެވުނު މީހުންގެ ޖުމްލަ އަދަދު 83،875އަށް އަރާފައިވާ ކަމަށެވެ. ޕޮޒިޓިވްވި މީހުންގެ ތެރެއިން މިހާތަނަށް ބަލިން ފަސޭހަވެފައިވަނީ 81،939 މީހުންނެވެ.

އެކްޓިވް ކޭހުގެ ގޮތުގައި 1،694 ކޭސް ގުނަމުންދެއެވެ. އަދި 20 މީހަކަށް ހޮސްޕިޓަލުތަކުގައި އެޑްމިޓުކޮށްގެން ފަރުވާދެމުންދާކަމަށް އެޗްޕީއޭއިން ވަނީ ބުނެފައެވެ. މިހާތަނަށް ރާއްޖެއިން ކޮވިޑް ބަލީގައި ނިޔާވެފައިވަނީ 229 މީހުންނެވެ.

ކޮވިޑްގެ ހަތަރު ވަނަ ރާޅަށް ފަހު ރާއްޖޭގައި ކޮވިޑްގެ ހާލަތު ވަނީ ވަރަށް ބޮޑަށް ކޮންޓްރޯލްވެފައެވެ. ނަމަވެސް އަދިވެސް ކޮވިޑުން ރައްކާތެރިވުމަށް އަޅަންޖެހޭ ފިޔަވަޅުތަކަށް ސަމާލުކަންދިނުމަށް ކަމާބެހޭ ފަރާތްތަކުން އަންނަނީ އިރުޝާދު ދެމުންނެވެ.