އިންޑިޔާގެ އެހީތެރިކަމުގައި ތަމްރީނުކޮށްފައިވާ ދިވެހި ސިފައިން ވަރަށް އަވަހަށް މަތިންދާ ބޯޓު ދުއްވަން ފަށާނެކަމަށް އެމްއެންޑީއެފުން ބުނެފިއެވެ.

އެމްއެންޑީއެފްގެ މީޑިޔާ އޮފިޝަލް ވިދާޅުވީ އެމީހުންނަށް އެޕޮއިންޓްމަންޓް ހަވާލުކުރުމާއި އެހެނިހެން އިދާރީ ކަންކަމާއި ވާންޖެހޭ ތައްޔާރީތައް ދަނީ ވަމުންކަމަށެވެ. ނަމަވެސް މިކަމާއި ގުޅިގެން އިތުރު ތަފްސީލެއް އެމްއެންޑީއެފުން ހާމަކޮށްފައެއްނުވެއެވެ.

އެމްއެންޑީއެފުން މިހެން ބުނެފައިމިވަނީ އިންޑިޔާ ސަފީރު ސަންޖޭ ސުދިރު, އިންޑިޔާއިން ހަދިޔާކޮށްފައިވާ ހެލިކޮޕްޓަރާއި ޑޯނިއާ މަތިންދާ ބޯޓު ދުއްވުމަށް ދިވެހި ޕައިލެޓުން ތަމްރީންކުރަމުން އަންނަކަމަށާއި އޭގެތެރެއިން ތިން ޕައިލެޓުން މިހާރު ތަމްރީނުކޮށް ނިމިފައިވާކަމަށް ވިދާޅުވެފައިވަނިކޮށެވެ.

އިންޑިޔާއިން ރާއްޖެއަށް ހަދިޔާކޮށްފައިމިވާ ޑޯނިއާ ބޯޓުތަކަކީ އަސްކަރީ ސަރވައިލެންސް މަސައްކަތްތަކަށް ބޭނުންވާ ވަސީލަތްތައް ގާއިމު ކޮށްފައިވާ އުޅަނދުތަކެކެވެ. މަތިންދާބޯޓާއި ހެލިކޮޕްޓަރު އޮޕަރޭޓް ކުރަން އިންޑިއާގެ ޕައިލެޓުންނާއި ޓެކްނިކަލް މީހުން ހަރަކާތްތެރިވާތީ ސަރުކާރަށް ވަނީ ބޮޑެތި ފާޑުކިޔުންތައް އަމާޒުވެފައެވެ. އެ އުޅަނދުތައް އޮޕަރޭޓްކުރަން އިންޑިއާ ސިފައިން ތިބެނީ ދިވެހިން އަދި ތަމްރީނު ނުވާތީ ކަމަށް ސަަރުކާރުން ވަނީ ކުރިން ބުނެފައެވެ.

އެމްއެންޑީއެފުން ބުނީ މި މަތިންދާ ބޯޓު ބޭނުން ކުރުމަށް ހަމަޖެހިފައިވަނީ އެމްއެންޑީއެފްގެ ކޯސްޓްގާޑްގެ ބެލުމުގެ ދަށުން، ރާއްޖޭގެ ކަނޑުގެ ސަރަހައްދު ބެލެހެއްޓުމަށާއި، ރާއްޖޭގެ މަސްކަނޑުތަކުން ގަވާއިދާ ޚިލާފަށް މަސްވެރިކަން ކުރާ ފަރާތްތައް މޮނިޓަރ ކުރުމަށާއި، ރާއްޖޭގެ ކަނޑުގެ ސަރަޙައްދު ބޭނުންކޮށްގެން ކުރެވޭ ޑްރަގްސްއާއި މަނާ އެހެނިހެން ތަކެތީގެ ވިޔަފާރިއާއި އިންސާނީ ވަގުފާރި ހުއްޓުވުމަށާއި، ކަނޑުމަތީގައި ހާލުގައިޖެހޭ ފަރާތްތައް ހޯދުމަށް ކަމަށެވެ.

މި ފްލައިޓް ރާއްޖޭގައި އުދުހޭނީ ރާއްޖޭގެ ދިދައާއި ކުލަތަކާއެކު، އެމްއެންޑީއެފްގެ ޕައިލެޓުން ވެސް ހަރަކާތްތެރިވާ ގޮތަށް ކަމަށް އެމްއެންޑީއެފުން ބުނެފައިވެއެވެ.