ރިހިވެލި އެއްބަސްވުން ބާތިލްކުރި މައްސަލައިގެ އިސްތިއުނާފު އަޑުއެހުން އަންނަ އާދީއްތަ ދުވަހު

ރިހިވެލި ރިސޯޓުގެ ސަބްލީޒް އެއްބަސްވުން ބާތިލްކުރީ ރަނގަޅަށް ކަމަށް ނިންމައި ސިވިލް ކޯޓުން ކޮށްފައިވާ ހުކުމުގެ އިސްތިއުނާފް އަޑުއެހުންތައް އަންނަ މި މަހުގެ 26 ވަނަ ދުވަހު ފެށުމަށް, ހައިކޯޓުގައި ތާވަލުކޮށްފިއެވެ.

އިސްތިއުނާފް އަޑުއެހުންތައް ފެށުމަށް ހަމަޖައްސާފައިވަނީ އާދީއްތަ ދުވަހުގެ ހެނދުނު 11:00 ޖަހާއިރުއެވެ. ކ. މަހާނައެޅި ހުރާގައި ތަރައްގީކޮށްފައިވާ ރިހިވެލި ރިސޯޓުގެ ސަބްލީޑް އެއްބަސްވުން ބާތިލްކުރި މައްސަލަ "ސޭވް ދަ ޑްރީމް މޯލްޑިވްސް"ގެ ފަރާތުން އިސްތިއުނާފަށް ހުށަހެޅީ މިމަހުގެ 6 ވަނަ ދުވަހުއެވެ.

Advertisement

ޝެއަރ ހޯލްޑަރުންގެ މެދުގައި ޚިޔާލުތަފާތުވުންތަކެއް އުފެދި, ރިސޯޓުގެ މައްސަލަ ހޫނުވެ, އެންމެ ފަހުން ރިސޯޓު ހިންގުމުގެ ލައިސަންސް ވަނީ ބާތިލުކޮށްފައެވެ. ސިވިލް ކޯޓުގެ އަމުރަށް ރިއާޔަތް ކުރުމަށްފަހު، ރިހިވެލި ބީޗް ރިސޯޓުގެ ހިންގުމުގެ ލައިސަންސް ބާތިލުކޮށްފައި ވަނީ 2 ސެޕްޓެމްބަރު ވީ ބުރާސްފަތި ދުވަހުއެވެ.

އެރިސޯޓުގެ ކުރީގެ މެނޭޖްމަންޓާ މިހާރުގެ މެނޭޖްމަންޓާ ދެމެދު ޖެހުނު މައްސަލައަކާ ގުޅިގެން ހަމަނުޖެހުން ހިންގި މައްސަލައެއް ފެންމަތިވެފައިވާއިރު، މާހަލް ޓުއަރސްއިން ބުނީ 14 ސެޕްޓެމްބަރ 2020ގައި އެ ކުންފުނިން ރިހިވެލި ބީޗް ރިސޯޓުގެ ސަބްލީޒް އެގްރީމެންޓް ބާތިލުކުރީ ރަނގަޅަށް ކަމަށް، 31 އޯގަސްޓް 2021ގައި ސިވިލް ކޯޓުގެ ނިންމާފައިވާ ކަމަށެވެ.

އެއްބަސްވުން ބާތިލްކުރި ސަބަބާ ގުޅޭގޮތުން މާހަލް ޓުއަރސްއިން ބުނީ ރިހިވެލި ބީޗް ރިސޯޓު ސަބްލީޒް ކުރުމުގެ ގޮތުން "ސޭވް ދަ ޑްރީމް މޯލްޑިވްސް ޕްރައިވެޓް ލިމިޓެޑް"އާއެކު 8 މެއި 2018ގައި އެކުންފުނިން ވި އެއްބަސްވުން ބާތިލުކުރީ ދައްކަން ޖެހޭ ހެޑްލީޒް ރެންޓާއި ސަބްލީޒް ރެންޓު ނުދެއްކުން ކަމަށެވެ. މާހަލް ޓުއަރސްއިން ބުނީ ހެޑްލީޒް ރެންޓުގެ ގޮތުގައި 323،188.79 ޔޫއެސް ޑޮލަރު (ތިންލައްކަ ތޭވީސްހާސް އެއްސަތޭކަ އަށްޑިހަ އަށް ޔޫއެސް ޑޮލަރު, ހަތްދިހަނުވަ ސެންޓް)، އަދި ސަބްލީޒް ރެންޓުގެ ގޮތުގައި އެއްމިލިޔަން ޔޫއެސް ޑޮލަރު ނުދައްކާ ކަމަށެވެ.

ރަށުގެ ހެޑްލީޒް ރެންޓު ނުދެއްކުމުން މީރާއިން ތަކުރާރުކޮށް ނޯޓިސްދެމުން ގޮސް މިހާރު ރެޑް ނޯޓިސް ފޮނުވާފައިވާ ކަމަށް މާހަލް ޓުއަރސްއިން ބުނެއެވެ. މާހަލް ޓުއަރސްއިން ބުނީ ކުލި ނުދެއްކުމުގެ އިތުރުން ސަބްލީޒް އެގްރީމެންޓް ބާތިލުކުރި ސަބަބުތަކުގެ ތެރޭގައި އެރަށް ވީރާނާވެ، އިމާރާތްތަކާއި ޖެޓީ ފަދަ ތަންތަން ވެއްޓޭ ހިސާބަށް ދިއުމާއި، ނަރުދަމާއާއި އަލިފާންނިވާ ނިޒާމާއި އިންޝުއަރެންސާއި ނުލައި ރަށް ހިންގުމާއި, އަދި އެތަކެއް މަސްދުވަސް ވަންދެން ތަނުގެ މުވައްޒަފުންނަށް މުސާރަ ނުދިނުމާއި ރަށުގެ ތިމާވެއްޓަށް ނޭދެވޭ އަސަރުކުރާ ފަދަ ގިނަގުނަ ކަންތައްތައް ކުރުން ހިމެނޭ ކަމަށެވެ.

އެކުންފުނީގެ އަމާޒަކީ ވީހާވެސް އަވަހަށް ސަރުކާރުން ގަބޫލުކުރާ މިންގަނޑަށް ރިހިވެލި ބީޗް ރިސޯޓުގެ އުމްރާނީ ހާލަތު ބަދަލުކޮށް، ދައުލަތަށް ދައްކަންޖެހޭ ޓެކުހާއި ފީތައް ދައްކައި އެރަށް އަވަހަށް ފަތުރުވެރިންނަށް ހުޅުވާލުން ކަމަށް މާހަލް ޓުއަރސްއިން ބުނެއެވެ.