ދުވާފަރުގައި ކޮވިޑް-19އާ ގުޅިގެން އިއުލާނުކޮށްފައިވާ ކާފިއުގެ ވަގުތަށް ލުއި ދީފި

ރ.ދުވާފަރުގައި ކޮވިޑް-19އާ ގުޅިގެން އިއުލާނުކޮށްފައިވާ ކާފިއުގެ ވަގުތަށް ލުއި ދީފިއެވެ.

ދުވާފަރު ކައުންސިލުން ބުނީ ވޭތުވެދިޔަ 2 ހަފްތާގެ ސާމްޕަލްތަކުގެ ނަތީޖާއަށް ބެލުމަށްފަހު، ދުވާފަރުގައި ކޮވިޑް-19ގެ ބަލިމަޑުކަން ފެތުރުން ކޮންޓްރޯލްކުރުމަށް އަޅާފައިވާ ފިޔަވަޅުތަކުގެ ތެރެއިން، ކާފިއުވަގުތަށް ލުއި ދިނުމަށް ދުވާފަރު ޓާސްކްފޯހުން ނިންމާފައިވާ ކަމަށެވެ.

އެގޮތުން ސެޕްޓެމްބަރ 20ވީ ހޯމަ ދުވަހުން ފެށިގެން ކާފިއު ވަގުތަކީ ރޭގަނޑު 9:00ން ފަތިހު 4:00ށް ކަމަށާއި, އަދި މި ނުރައްކާތެރި ބަލި ފެތުރުން ކުޑަކުރުމަށް ކުރިންވެސް އަޅާފައިވާ ފިޔަވަޅުތައް ދެމި އޮންނާނެ ކަމަށް ކައުންސިލުން ބުނެއެވެ.

ކައުންސިލުން ބުނީ ކާފިއު ވަގުތުތައް ފިޔަވައި އެހެނިހެން ވަގުތުތަކުގައި ވެސް 3 މީހުންނަށް ވުރެ ގިނައިން އެއްވެ ނޫޅެވޭނެ ކަމަށާއި، މޮނިޓަރިންގ ހާލަތު އުވާލެވެންދެން ޖޯލިފަތިތަކާއި، ޕާކްތަކާއި، ފިނިމައިޒާންތަކާއި، ހަޓުތަކާއި، ބީޗްތަކާއި، ހިއްކިފަސްގަނޑު އަދި ދަތުރުވެރިންގެ ހިޔާ ފަދަ ތަންތަނަށް އެއްވެ އުޅުމަކީ މަނާކަމެއް ކަމަށެވެ. އަދި ޒަރޫރީ ހާލަތެއްގައި މެނުވީ އެއްގެއިން އަނެއް ގެއަށް ޒިޔާރަތްކޮށް ހެދުމަކީވެސް މަނާކަމެއް ކަމަށެވެ.

މީގެ އިތުރުން ކައުންސިލުން ބުނީ އާންމުންގެ ތެރެއަށް ނިކުމެ އުޅޭ ވަގުތުތަކުގައްޔާއި، ގޭތެރޭގައި އުޅޭ ވަގުތުތަކުގައި ވީހާވެސް ބޮޑަށް ރައްކާތެރިކަމުގެ ގޮތުން އެޅެންހުރި ފިޔަވަޅުތައް އަޅަންޖެހޭ ކަމަށާއި، ވަކިން ޚާއްސަކޮށް ބަލި މީހުންނާއި، ރޯގާގެ އަލާމާތްތައް ހުރި މީހުން ޚާއްސަ ސަމާލުކަމެއް ދޭން ޖެހޭ ކަމަށެވެ. އަދި ގިނަގިނައިން އަތް ދޮވެ, މާސްކް އެޅުމަށް އިލްތިމާސްކޮށްފައިވެއެވެ.

ކޮވިޑް-19 ކޮންޓްރޯލް ކުރުމަށް ޓާސްކްފޯހާއި ކައުންސިލުން އަޅަމުންގެންދާ ފިޔަވަޅުތަކަށް ރައްޔިތުންގެ ފަރާތުން ވަރަށް ބޮޑު އެއްބާރުލުމެއް ލިބޭ ކަމަށް ކައުންސިލުން ބުނެއެވެ.

ކޮވިޑް-19ގެ ކޭސްތަކާ ގުޅިގެން ދުވާފަރު މޮނިޓަރިންގ ހާލަތަށް ގެނެސްފައިވަނީ މެއި މަހު 25 ވަނަ ދުވަހުއެވެ.