ރ.ދުވާފަރުގައި ކަރަންޓް އަޕްގްރޭޑް ކުރުމުގެ މަސައްކަތްތައް ކުރިއަށްދާ ކަމަށާއި، ކުރިއަށް އޮތް ރޯދަ މަހު ކަރަންޓުގެ އެއްވެސް މައްސަލައެއް ދިމާނުވާނެ ކަމަށް މޯލްޑިވްސް ވޯޓަރ އެންޑް ސެވެރޭޖް ކޮމްޕެނީ (އެމްޑަބްލިއުއެސްސީ) ގެ މެނޭޖިންގ ޑިރެކްޓަރު ހަސަން ޝާހު ވިދާޅުވެއްޖެއެވެ.
ދުވާފަރުގައި ޔޫޓިލިޓީ ހުރިހާ ޚިދުމަތްތަކެއް ފޯރުކޮށްދެމުންދަނީ އެމްޑަބްލިއުއެސްސީގެ ފަރާތުންނެވެ. އެގޮތުން ރައްޔިތުންނަށް ދެމުންދާ ޚިދުމަތްތައް ފުޅާކޮށް، ރަނގަޅު ޚިދުމަތެއް ފޯރުކޮށްދިނުމަށް ރައްޔިތުންނާއި ގުޅިގެން ގިނަ މަސައްކަތްތަކެއް ކުރިއަށްދާ ކަމަށް އެކުންފުނިން ބުނެއެވެ.
ދުވާފަރުގައި ކުރިއަށްގެންދާ މަސައްކަތްތަކާއި ގުޅޭގޮތުން ރާއްޖެޓީވީގެ ފަލަސުރުޚީ ޕްރޮގްރާމުގައި ޝާހު ވިދާޅުވީ މިދިޔަ ރޯދަ މަހު ކަރަންޓުގެ ޑިމާންޑް ވަރަށް ބޮޑުވި ކަމަށާއި، ހަވީރުގެ ވަގުތުގައި ވަރަށް ގިނައިން ކަރަންޓު ކެނޑިގެންދާ ކަމަށެވެ. މި މައްސަލައަށް ހެއްލު ގެނައުމަށް މަސައްކަތް ފަށާފައިވާކަން ފާހަގަކުރައްވައި ޝާހު ވިދާޅުވީ ކުރިއަށް އޮތީ ރޯދަ މަހަށްވުމާއެކު، އޭގެ ކުރިން މަސައްކަތް ނިންމުމަށް އަމާޒު ހިފައިވާ ކަމަށެވެ. އެގޮތުން މިހާރު އެރަށަށް އިތުރު ޖެން ސެޓާއި، ޓްރާންސްފޯމަރު ގެންދެވިފައިވާ ކަމަށް ޝާހު ވިދާޅުވިއެވެ.
ޝާހު ވިދާޅުވީ އިންޖިނިއަރުންގެ ޓީމުން ކަރަންޓުގެ ކެޕޭސިޓީ އިތުރު ކުރުމަށް ކުރަންޖެހޭ މަސައްކަތްތައް މިހާރު ކުރަމުންދާ ކަމަށާއި، ކުރިއަށް އޮތް ރޯދަ މަހު ކަރަންޓުގެ މައްސަލައެއް ދިމާނުވާނެ ކަމަށެވެ. އަދި މާޗް މަހުގެ މެދެއްހާ ހިސާބުގައި މަސައްކަތް ނިންމާލެވޭނެ ކަމަށް އޭނާ ވިދާޅުވިއެވެ.
ދުވާފަރުގައި ޔޫޓިލިޓީ ހުރިހާ ޚިދުމަތްތަކެއް އެމްޑަބްލިއުއެސްސީގެ ފަރާތުން ފޯރުކޮށްދެމުންދާއިރު، ތަރައްގީއަށް ކުރާ ހުރިހާ މަސައްކަތްތަކެއްގައި ރައްޔިތުންގެ ފުރިހަމަ އެއްބާރުލުން ލިބޭކަން އެކުންފުނިން ފާހަގަކުރެއްވިއެވެ. ރަށަށް އަންނަ ތަރައްގީއާއެކު، ޚިދުމަތްތައް ފުޅާވެ، އިތުރަށް ތަރައްގީވެގެންދާނެ ކަމަށް އެމްޑަބްލިއުއެސްސީން ބުނެއެވެ.
