އަންނަ އޮކްޓޯބަރު މަހު ރާއްޖޭގައި ބާއްވާ ދެކުނު އޭޝިއާ ސަރަހައްދުގެ އެންމެ ބޮޑު ފުޓްބޯޅަ މުބާރާތް ކަމަށްވާ ސާފް ޗެމްޕިއަންޝިޕުގެ ޓައިޓަލް ސްޕޮންސަރަކަށް އުރީދޫ މޯލްޑިވްސް ހަމަޖައްސައިފިއެވެ.
މި އަހަރުގެ ސާފް ޗެމްޕިއަންޝިޕް ރާއްޖޭގައި ބޭއްވުމަށް ތާވަލުކޮށްފައިވަނީ އަންނަ އޮކްޓޯބަރު މަހުގެ އެއްވަނަ ދުވަހުން ފެށިގެން 16 ވަނަ ދުވަހުގެ ނިޔަލަށެވެ. މި މުބާރާތުގެ ޓައިޓަލް ސްޕޮންސާޝިޕް އުރީދޫން ނެގުމާއެކު، މި ފަހަރުގެ މުބާރާތް ކުރިއަށްދާނީ "އުރީދޫ ސާފް ޗެމްޕިއަންޝިޕް 2021" ގެ ނަމުގައެވެ.
މި މުބާރާތުގެ ޓައިޓަލް ސްޕޮންސަރަކަށް އުރީދޫ ހަމަޖެއްސުމަށް އެއްބަސްވުމުގައި ސޮއިކޮށްފައިވަނީ ހޯމަ ދުވަހު ގައުމީ ފުޓްބޯޅަ ދަނޑުގައި ބޭއްވި ޚާއްސަ ރަސްމިއްޔާތެއްގައެވެ. މި އެއްބަސްވުމުގައި ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ފަރާތުން ސޮއިކުރެއްވީ އެ އެސޯސިއޭޝަނުގެ ރައީސް ބައްސާމް އަދީލް ޖަލީލެވެ. އަދި އުރީދޫގެ ފަރާތުން އެއްބަސްވުމުގައި ސޮއިކުރެއްވީ ޗީފް ކޮމާޝަލް އޮފިސަރު ހުސައިން ނިޔާޒެވެ.
އެއްބަސްވުމުގައި ސޮއިކުރެއްވުމަށްފަހު ދިން އިންޓަވިއުއެއްގައި ބައްސާމް ވިދާޅުވީ އުރީދޫއަކީ އަބަދުވެސް އެފްއޭއެމާ ވަރަށް ގާތުން މަސައްކަތްކުރާ ކުންފުންޏެއް ކަމަށާއި، އަދި ފުޓްބޯޅައިގެ ކުރިމަގަށްވެސް އުރީދޫން ވަރަށް ބޮޑު އެއްބާރުލުމެއް ދެމުން އަންނަ ކަމަށެވެ. އަދި މި ފަހަރުގެ ސާފް ޗެމްޕިއަންޝިޕް ރާއްޖޭގައި ބާއްވާއިރު، މި އުފާވެރި ކާނިވަލުގައި ބައިވެރިވުމަށް އުރީދޫން ޓައިޓަލް ސްޕޮންސާޝިޕް ނެގުމުން، ދިވެހި ފުޓްބޯޅަ އާއިލާގެ ނަމުގައި ވަރަށް ޚާއްސަ ޝުކުރެއް އެ ކުންފުންޏަށް ދަންނަވާ ކަމަށްވެސް ވިދާޅުވިއެވެ.
އުރީދޫގެ ޗީފް ކޮމާޝަލް އޮފިސަރު ހުސައިން ނިޔާޒް ވިދާޅުވީ އުރީދޫއަކީ އަބަދުވެސް ކުޅިވަރަށް ވަރަށް ބޮޑު އިސްކަމެއް ދޭ ކުންފުންޏެއް ކަމަށާއި، އެގޮތުން ފުޓްބޯޅައަކީ އުރީދޫ ގްރޫޕުގައިވެސް ވަރަށް މަގުބޫލު ކުޅިވަރެއް ކަމަށެވެ. އަދި އެފްއޭއެމާއެކު ވެވުނު އެއްބަސްވުން ދެކެނީ ގައުމީ ކަމެއްގެ ގޮތުގައި ކަމަށާއި، އެގޮތުން މިފަދަ މުބާރާތެއް މި ދަނޑިވަޅުގައި ރާއްޖޭގައި ބޭއްވުމުން ދިވެހިންނަށް އުފާވެރިކަން ލިބިގެންދާނެ ކަމަށްވެސް ނިޔާޒް ވަނީ ވިދާޅުވެފައެވެ.
މި ފަހަރުގެ ސާފް ޗެމްޕިއަންޝިޕުގެ ޓައިޓަލް ސްޕޮންސަރަކަށް އުރީދޫ ހަމަޖެއްސިއިރު، އެންމެ ފަހުން 2015 ވަނަ އަހަރު އިންޑިއާގައި ބޭއްވި މުބާރާތާއި 2018 ވަނަ އަހަރު ބަންގްލަދޭޝްގައި ބޭއްވި މުބާރާތުގެ ޓައިޓަލް ސްޕޮންސާޝިޕް ނެގީ ޖަޕާނުގެ ސުޒުކީ ކުންފުނިންނެވެ. އެހެންކަމުން އެ ދެ މުބާރާތް ބޭއްވީ "ސާފް ސުޒުކީ ކަޕް" ގެ ނަމުގައެވެ.
މި އަހަރުގެ އޮކްޓޯބަރު މަހުގެ ސާފް ޗެމްޕިއަންޝިޕް ރާއްޖޭގައި ބާއްވާއިރު، މިއީ ރާއްޖޭގައި މި މުބާރާތް ބާއްވާ ދެވަނަ ފަހަރެވެ. އެގޮތުން 2008 ވަނަ އަހަރުގެ މުބާރާތް ރާއްޖެ އާއި ސްރީ ލަންކާގައި ބޭއްވިއިރު، ރާއްޖެއިން ވަނީ އެ ފަހަރުގެ މުބާރާތް ކާމިޔާބުކޮށްފައެވެ. އެއީ ރާއްޖެއިން ސާފް ޗެމްޕިއަންޝިޕް ކާމިޔާބުކުރި ފުރަތަމަ ފަހަރެވެ. އަދި މި މުބާރާތް އެންމެ ފަހުން ބަންގްލަދޭޝްގައި ބޭއްވިއިރު، ރާއްޖެއިން ވަނީ ޑާކާގައި 2018 ވަނަ އަހަރު ބޭއްވި މުބާރާތުގެ ފައިނަލުގައި އިންޑިއާ ބަލިކޮށް ޗެމްޕިއަންކަން ހޯދާފައެވެ.
ސާފް ޗެމްޕިއަންޝިޕުގެ ކެމްޕެއިން ފަށާފައިވާއިރު، މި އަހަރުގެ އޮފިޝަލް ތީމް ނަމެއްގެ ގޮތުގައި "މަގޭ މަހަލްދީބް" ނަން ބޭނުންކުރުމަށް ވަނީ ނިންމާފައެވެ. އަދި މި އަހަރުގެ ސާފް ޗެމްޕިއަންޝިޕުގެ ކެމްޕެއިންގެ ސްލޯގަން އެއްގެ ގޮތުގައި ބޭނުންކުރާނީ، "ތިންވަނަ ފަހަރު، މީ އެ ފަހަރު" އެވެ.
