ޔާމީނުގެ އުނަގަނޑުގައި މައްސަލަ ހުންނާތީ، މައްސަލަ ތާވަލު ކުރާއިރު އެކަމަށް ކޯޓުން ރިއާޔަތް ކުރާނެ
20 ސެޕްޓެމްބަރު 2021 | ހޯމަ 04:15ރައީސް ޔާމީނު ވަނީ ޝަރީއަތުގެ އަޑުއެހުމުގައި ކަންބޮޑުވުން ހިއްސާ ކުރައްވާފައި
ރައީސް ޔާމީނުގެ ޖަލު ޙުކުމުގެ އިސްތިއުނާފު އަޑުއެހުން ސުޕްރީމް ކޯޓުގައި ކުރިއަށްދަނީ
އުނަގަނޑުގައި މައްސަލަތަކެއް ހުރުމުގެ ސަބަބުން ޝަރީއަތުގެ އަޑުއެހުންތަކުގައި ގިނަ ވަގުތު އިންނަވަން ދަތިފުޅުވާކަމަށް މަނީ ލޯންޑަރިންގެ ކުށް ސާބިތުވެ ޖަލު ޙުކުމެއް ތަންފީޒު ކުރައްވަމުން ގެންދަވާ ކުރީގެ ރައީސް އަބްދުﷲ ޔާމީން ވިދާޅުވެފައިވާތީ ސުޕްރީމް ކޯޓުން އެކަމަށް ރިއާޔަތް ކުރުމަށް ނިންމައިފިއެވެ.
މި މައްސަލައިގައި ހޯމަ ދުވަހު ކުރިއަށް ދިޔަ އަޑުއެހުމަކީ ރައީސް ޔާމީނުގެ ފަރާތުން އިސްތިއުނާފު ކޮށްފައިވާ މައްސަލައިގައި ކުރިއަށްގެންދާ 4 ވަނަ އަޑުއެހުމެވެ. މި އަޑުއެހުން ފައްޓަވަމުން މައްސަލަ ބައްލަވާ ފަނޑިޔާރު މަޙާޒް އަލީ ޒާހިރު ވަނީ ރައީސް ޔާމީނުގެ ސިއްޙީ ހާލުކޮޅާއި ގުޅިގެން އެންމެ ފަހު އަޑުއެހުމުގައި ފާހަގަކުރި ކަންކަމާ ގުޅޭގޮތުން ޝަރީއަތުން ނިންމަވާފައިވާ ގޮތް ހިއްސާ ކުރައްވާފައެވެ. އެގޮތުން އުނަގަނޑުގައި މައްސަލަތަކެއް ހުރުމުގެ ސަބަބުން ޝަރީއަތުގެ އަޑުއެހުންތަކުގައި ގިނަ ވަގުތު އިންނަވަން ދަތިފުޅުވާކަމަށް ރައީސް ޔާމީނު ވަނީ އެންމެ ފަހުން ބޭއްވި އަޑުއެހުމުގައި ވިދާޅުވެފައެވެ.
ރައީސް ޔާމީން ވިދާޅުވީ، އެމަނިކުފާނަކީ އުނަގަނޑުގައި ވަރަށް ބޮޑު މައްސަލައެއް ހުންނަ ކަމަށާއި، 2 ގަޑިއިރުވަންދެން ގޮނޑިއެއްގައި އިންނަވަންވެސް އެމަނިކުފާނަށް ދަތިފުޅުވާ ކަމަށެވެ. ވުމާއެކު ޝަރީއަތުގައި އެހާ ގިނަވަގުތު އިންނެވުން ނުހަނު ދަތިފުޅުކަމަށް ރައީސް ޔާމީން ވިދާޅުވިއެވެ. ރައީސް ޔާމީންގެ ސިއްހީ ހާލުކޮޅާއި ގުޅޭ ލިޔެކިޔުންތައް ކޯޓަށް ހުށަހެޅުއްވުމަށް ފަނޑިޔާޒު މަހާޒު އޭރު ވަނީ އަންގަވާފައެވެ. އަދި ކޯޓަށް ލިޔެކިޔުންތައް ލިބުމުން ޝަރީއަތުން އެކަމާއި މެދު ގޮތެއް ނިންމަވާނެ ކަމަށް ފަނޑިޔާރު މަހާޒު އޭރު ވިދާޅުވިއެވެ.
ހޯމަ ދުވަހުގެ އަޑުއެހުން ފައްޓަވަމުން ފަނޑިޔާރު ވިދާޅުވީ، ރައީސް ޔާމީނުގެ ހުށައެޅުއްވުން ބަލައިގަނެ، މެންދުރު ފަސް ވަންދެން އަޑުއެހުންތައް ކުރިއަށް ނުގެންދިއުމަށް ނިންމަވާފައިވާ ކަމަށެވެ. އެހެންނަމަވެސް، އަޑުއެހުންތައް މާބޮޑަށް ފަސްވެ ދިގު ދެމިގެންދާނަމަ މެންދުރު ފަހުގެ ސެޝަންގައި ވެސް ޝަރީއަތް ކުރިއަށް ގެންދަން ޖެހިދާނެކަން ފަނޑިޔާރު ފާހަގަކުރެއްވިއެވެ.
ފަނޑިޔާރު މަހާޒް ވަނީ ވީހާވެސް ވަގުތު ސަލާމަތް ކުރެވޭނެ ގޮތަށް، ޝަރީއަތުގެ ވަގުތުތައް ބޭކާރުނުވާނެ ގޮތަށް ނުކުތާތައް ހުށައެޅުއްވުމަށް ހަނދުމަ ކޮށްދެއްވާފައެވެ.
ރައީސް ޔާމީނުގެ އިސްތިއުނާފު އަޑުއެހުންތައް މިހާރު ކުރިއަށްދާ ސްޕީޑަކީ ރަނގަޅު ސްޕީޑެއްކަމަށް ދެންނެވެން ނެތްކަމަށް މަހާޒް ވަނީ މީގެ ކުރިންވެސް ވިދާޅުވެފައެވެ. އެގޮތުން އިސްތިއުނާފީ ނުކުތާތަކުގެ ތަފްސީލަށް ބަލާއިރު 156 ސޮފްޙާ އެޕީލް ފޯމުގައި ހިމެނޭކަން ފާހަގަ ކުރައްވައި މަހާޒް ވަނީ ވީހާވެސް ވަގުތު ބޭކާރު ނުވާނެ ގޮތަށް މި މަޖިލީހުގައި ދައްކަވާ ވާހަކަތަކުގެ އަސާސްތައް ބިނާ ކުރެއްވުމަށް އެދިވަޑައިގަންނަވާފައެވެ.
