އިޒްރާއީލުގެ ޖަލުން ފިލި އެންމެން ހައްޔަރުކޮށްފި
19 ސެޕްޓެމްބަރު 2021 | އާދީއްތަ 12:32ޖަލުން ފިލި ގައިދީން ހޯދުމަށް އިޒްރާއީލުން ވަނީ ވަރުގަދަ އޮޕަރޭޝަނެއް ކުރިޔަށް ގެންގޮސްފައި
އިސްރާއީލުގެ ސެކިއުރިޓީ އެންމެ ވަރުގަދަ ގިލޯބާ ޖަލު
އިޒްރާއީލުގެ ސެކިއުރިޓީ އެންމެ ވަރުގަދަ ޖަލު ކަމަށްވާ ގިލޯބާ ޖަލުން ފިލި ހުރިހާ ގައިދީން ހައްޔަރުކޮށްފައިވާ ކަމަށް އިޒްރާއީލުން ބުނެފިއެވެ.
އިޒްރާއީލުން ބުނީ ގިލޯބާ ޖަލުން ފިލި ހަ ގައިދީންނަކީ އެގައުމާއި ދެކޮޅަށް ހަމަލާ ދިނުމަށް ރޭވުމުގެ ތުހުމަތުގައި ހައްޔަރުކުރި ގައިދީން ކަމަށެވެ. މި ގައިދީން ޖަލުން ފިލާފައިވަނީ ސަމުސާ ފަދަ ތަކެތީން ބިމު އަޑީގައި މަގެއް ކޮނެގެންނެވެ. އެއާއިއެކު ފަލަސްތީނުގެ ރައްޔިތުން ވަނީ އެއީ ބަތަލުންތަކެއް ކަމަށް ބުނެފައެވެ.
މި ގައިދީން ހޯދުމަށް އިޒްރާއީލުން ވަރުގަދަ އޮޕަރޭޝަނެއް ކުރިޔަށް ގެންގޮސްފައިވާއިރު، މި އޮޕަރޭޝަނުގައި ޑްރޯންތަކާއި، މަގުމަތީ ޗެކްޕޮއިންޓްތައް ގާއިމުކޮށްފައިވެއެވެ.
އިޒްރާއީލުގެ ސިފައިން އާދީއްތަ ދުވަހު ކުރި ޓްވީޓެއްގައި ބުނީ ބާކީ ނުފެނިތިބި ދެ ގައިދީން ހޯދީ އެގައުމުގެ އިންޓެލްއަށް ލިބުނު މައުލޫމާތުގެ އަލީގައި ކަމަށެވެ. އަދި ސިފައިން ގޮސް އެ ދެ ގައިދީން ވަށާލުމުން އަމާންދީފައިވާ ކަމަށް ބުންޏެވެ.
ޖަލުން ފިލި ހަ ގައިދީންނަކީ ވެސް ފަލަސްތީނުގެ ޖަމިއްޔާތަކުގެ މެމްބަރުންނެވެ.
