މެސެޖްތައް ސޯޝަލް މީޑިއާގައި އާއްމުވިގޮތް ބެލުމަށް ނާޒިމް އެދިވަޑައިގެންފި
އެ މެސެޖަކީ، އޭނާ ހައިކޯޓުގެ ރެޖިސްޓްރާއަށް ފޮނުއްވި މެސެޖެއް
ނާޒިމް އަބްދުއްސައްތާރު - ގާނޫނީ ވަކީލެއް
މެސެޖްތައް ސޯޝަލް މީޑިއާގައި އާއްމު ކުރުމުން ގާނޫނީ ވަކީލް، ނާޒިމް އަބްދުއްސައްތާރު ޑިޕާޓްމަންޓް އޮފް ޖުޑިޝަލް އެޑްމިނިސްޓްރޭޝަން (ޑީޖޭއޭ)އަށް މައްސަލަ ހުށަހަޅުއްވައިފިއެވެ.
ނާޒިމް ޑީޖޭއޭއަށް މައްސަލަ ހުށަހަޅުއްވާފައި ވަނީ ހައިކޯޓުގެ އިދާރީ ބޭފުޅަކަށް އޭނާ ކުރެއްވި ކަމަށް ބުނާ މެސެޖުތަކެއް ޝުޖާއު އުސްމާން ސޯޝަލް މީޑިއާގައި އާންމުކުރައްވާފައި ވަނިކޮށެވެ. މައްސަލަ ބައްލައިވައި ދެއްވުމަށް އެދި ޑީޖޭއޭއަށް ނާޒިމް ފޮނުއްވި ސިޓީގައި ވަނީ، ހައިކޯޓުގެ ކުރީގެ ފަނޑިޔާރު ޝުޖާއު އުސްމާން އާންމުކުރައްވާފައިވާ މެސެޖުތަކުގެ މައްސަލަ ބަލައިދިނުމަށެވެ. އަދި މެސެޖްތައް ލީކުވިގޮތް ބަލައިދިނުމަށް ނާޒިމް ވަނީ އެދިވަޑައިގެންފައެވެ.
ނާޒިމް ފޮނުއްވި ކަމަށް ބުނާ މެސެޖުގައި ވަނީ އޭނާ ވަކާލާތު ކުރައްވާ މައްސަލައެއްގެ އިސްތިއުނާފް ދެ ދުވަސް ތެރޭ ލިބޭނޭ ކަމަށް އުއްމީދުކުރައްވާ ކަމަށާއި އަދި މިފަހަރު މި މައްސަލަ ފަނޑިޔާރު ޝަހީދު / ފަނޑިޔާރު ފައިސަލަށް ނުދިނުމަށް އެދިވަޑައިގަންނަވާ ކަމަށް ވިދާޅުވެފައެވެ. އެ މެސެޖުތަކުގެ ސްކްރީން ޝޮޓްތައް ޝުޖާއު ސޯޝަލް މީޑިއާގައި އާންމުކުރެއްވީ އެއީ މައްސަލަތަކަށް ނުފޫޒު ފޯރުއްވުމަށް ނާޒިމް ކުރައްވާ ކަމެއް ކަމަށް ތުހުމަތުކުރެއްވުމަށްފަހުއެވެ.
މިކަމާ ގުޅިގެން ނާޒިމް ވިދާޅުވެފައިވަނީ، އެ މެސެޖަކީ، އޭނާ ހައިކޯޓުގެ ރެޖިސްޓްރާއަށް ފޮނުވި މެސެޖެއް ކަމަށާއި، އެގޮތަށް މެސެޖްކުރީ، އޭނާ ހުށަހަޅާ މައްސަލަތައް އަބަދުވެސް އެއް ފަނޑިޔާރަކާ ހަވާލުވާތީ ކަމަށެވެ. އެއި ނުފޫޒު ފޯރުވުމުގެ ގޮތުން ފޮނުވި މެސެޖެއް ނޫން ކަމަށެވެ.
ޝުޖާއު އުސްމާން ހައިކޯޓުގެ އިސް ފަނޑިޔާރު ކަމުގައި ހުންނަވަނިކޮށް އޭނާގެ މައްސަލައެއް ޖޭއެސްސީން ބެލުމަށްފަހު މަގާމުން ވަކިކުރުމަށް މަޖިލީހަށް ހުށަހެޅުމުން ޝުޖާއު ވަނީ މިދިޔަ އަހަރުގެ އޮގަސްޓް މަހުގެ ތެރޭގައި މަގާމުން އިސްތިއުފާ ދެއްވާފައެވެ. އިސްތިއުފާ ދެއްވީ ފަނޑިޔާރުންގެ މަސައްކަތްތަކަށް ސިޔާސީ ނުފޫޒު ވައްދާފައިވާ ކަމަށް ތުހުމަތުކުރެއްވުމަށްފަހުއެވެ.
