އަފްޣާނިސްތާނުގައި އެމެރިކާ ސިފައިން ހިންގާފައިވަނީ ލާއިންސާނީ ޖަރީމާތަކެއް ކަމަށާއި އެކަން ބައިނަލްއަގުވާމީ ގޮތުން ބަލައި ތަހުގީގު ކުރަން ޖެހޭ ކަމަށް ޗައިނާއިން ބުނެފިއެވެ.
އދ. ގެ އިންސާނީ ހައްގުތަކާބެހޭ ކައުންސިލްގެ ޖަލްސާއެއްގައި ވާހަކަ ދައްކަވަމުން އެކައުންސިލަށް ޗައިނާގެ ފަރާތުން ކަނޑައަޅާފައިވާ މަންދޫބު ޗެން ޒޫ ވިދާޅުވީ އަފްޣާނިސްތާނަށް އެމެރިކާގެ އަސްކަރިއްޔާއިން އަރައި ހިންގި ހަނގުރާމައިގައި އަފްޣާން އާންމުންނާ ދެކޮޅަށް ބޮޑެތި ޖަރީމާތަކެއް ހިންގާފައިވާކަން ބައިނަލްއަގުވާމީ ފަރާތްތަކާއި އިންސާނީ ހައްގުތަކަށް މަސައްކަތްކުރާ ފަރާތްތަކުންވެސް ކަށަވަރުކޮށްދޭ ކަމަށާއި އަދި އޭގެ ތެރެއިން ބައެއް ޖަރީމާތަކަށް އެމެރިކާއިން އަމިއްލައަށްވެސް އެއްބަސްވެފައިވާ ކަމަށެވެ.
އެކަމަކު މިއަދާއި ހަމައަށްވެސް އެމެރިކާއިން އަފްޣާނުގައި ހިންގާފައިވާ ޖަރީމާތައް ތަހުގީގުކުރެވި އިންސާފު ލިބިފައިނުވާ ކަމަށާއި، އެހެންކަމުން އދ. ގެ އިންސާނީ ހައްގުތަކާއި ބެހޭ ކައުންސިލުން އިސްނަގައިގެން އެމެރިކާއިން ހިންގާފައިވާ ލާއިންސާނީ އަމަލުތައް ތަހުގީގު ކުރެއްވުމަށް ޗެން ޒޫ ގޮވާލެއްވިއެވެ.
އެމެރިކާ އަފްޣާނިސްތާނަށް އަރައި ހިންގި ހަނގުރާމައިގެ ޖަރީމާތަކުގެ ތެރޭގައި އަފްޣާން އަންހެނުންނާއި ކުޑަކުދިންގެ އެތަށް ހާސްބަޔަކު މެރުމުގެ އިތުރުން އާންމުންގެ ގެދޮރާއި ސްކޫލްތަކާ އަދި ހޮސްޕިޓަލްތަކަށް ބޮންއެޅުން ހިމެނޭކަމަށް ރިޕޯޓް ކޮށްފައިވެއެވެ.
