ލިވަޕޫލް މޮޅުވިއިރު، ސިޓީ އެއްވަރު

އިނގިރޭސި ޕްރިމިއާ ލީގުގައި ހޮނިހިރު ދުވަހުގެރޭ ކުޅުނު މެޗުން ކްރިސްޓަލް ޕެލަސް އަތުން ލިވަޕޫލް މޮޅުވިއިރު، ސައުތެމްޓަނާ ވާދަކޮށް އެންމެ ފަހުގެ ޗެމްޕިއަން މެންޗެސްޓާ ސިޓީ އެއްވަރުވެއްޖެއެވެ.

އަމިއްލަ ދަނޑުގައި ކުޅުނު މެޗުން ލިވަޕޫލް މޮޅުވީ ޕެލަސް އަތުން 3-0 ގެ ނަތީޖާއަކުންނެވެ.

ފޯރިގަދަ ކުޅުމެއް ފެނިގެންދިޔަ މި މެޗުގެ ފުރަތަމަ ހާފުގައި ލިވަޕޫލުން ގިނަ ހަމަލާތަކެއް އުފެއްދިއިރު، މި ހަމަލާތައް ހުއްޓުވުމުގައި ޕެލަސްގެ ޑިފެންޑަރުން ވަނީ މުހިންމު ދައުރެއް އަދާކޮށްފައެވެ. އެކަމަކު ފުރަތަމަ ހާފު ނިމެން ދެ މިނެޓަށް ވެފައި ވަނިކޮށް ލިވަޕޫލުން ވަނީ މި މެޗުގައި ލީޑު ނަގާފައެވެ. އޭރިއާ ތެރެއިން ލިބުނު ފުރުސަތަކުން މި ލަނޑު އެ ޓީމަށް ކާމިޔާބުކޮށްދިނީ ސަޑިއޯ މާނޭއެވެ. މިއީ މާނޭ ލިވަޕޫލުގެ ޖާޒީގައި ކާމިޔާބުކުރި 100 ވަނަ ލަނެޑެވެ.

މި މެޗުގެ ދެވަނަ ހާފު ފަށައިގެންވެސް ލިވަޕޫލުން ގިނަ ހަމަލާތަކެއް ފޮނުވާލިއިރު، މެޗުގެ 78 ވަނަ މިނެޓުގައި އެ ޓީމުން ވަނީ ލީޑު ފުޅާކޮށްފައެވެ. ވާޖިލް ވެން ޑައިކުގެ އެހީތެރިކަމާއެކު މި ލަނޑު އެ ޓީމަށް ކާމިޔާބުކޮށްދިނީ މުހައްމަދު ސަލާހެވެ. ދެން މި މެޗުގައި ލިވަޕޫލުން ކާމިޔާބުކުރި ތިންވަނަ ލަނޑު މެޗު ނިމެން މިނެޓަކަށް ވެފައި ވަނިކޮށް ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން އެރި ނަބީ ކެއިޓާއެވެ.

މި މެޗުން ލިވަޕޫލް މޮޅުވިއިރު، ލީގުގައި ހޮނިހިރު ދުވަހުގެރޭ ސިޓީ އާއި ސައުތެމްޓަން ބައްދަލުކުރި މެޗު ނިމުނީ ދެ ޓީމުން ކުރެ ޓީމަކަށް ލަނޑެއް ނުޖެހިއެވެ.

އަމިއްލަ ދަނޑުގައި ކުޅުނު މެޗުގައި ސިޓީގެ ފަރާތުން އާދައިގެ ކުޅުމެއް ފެނިގެންދިޔައިރު، މެޗުގެ 90 މިނެޓު ހަމަވިއިރު ސިޓީއަށް ސައުތެމްޓަނުގެ ގޯލާ އަމާޒުކޮށް ހަމަލާއެއް އުފެއްދިފައެއް ނުވެއެވެ. އެގޮތުން ފުރަތަމަ ހާފުގައި ސިޓީގެ ރަހީމް ސްޓާލިން އާއި ގަބްރިއެލް ޖީސޫސުން ފޮނުވާލި ހަމަލާތައް ދިޔައީ ގޯލާ އަމާޒުނުވެއެވެ.

މި މެޗުގެ ދެވަނަ ހާފުގައި އޭރިއާ ތެރެއިން ސައުތެމްޓަނުގެ އެޑަމް އާމްސްޓްރޯންގަށް ސިޓީގެ ކައިލް ވޯކާ ފައުލްކުރި ކަމަށް ނިންމައި ރެފުރީ ވަނީ ސައުތެމްޓަނަށް ޕެނަލްޓީއެއް ދީ، ވޯކާއަށް ސީދާ ރަތް ކާޑެއް ދައްކާފައެވެ. އެކަމަކު ވީޑިއޯ އެސިސްޓަންޓް ރެފުރީ (ވީއޭއާރް) ބެލުމަށްފަހު ރެފުރީ ވަނީ އެ ދެ ނިންމުންވެސް ބަދަލުކޮށްފައެވެ. މި މެޗުގެ 90 މިނެޓާ ހަމައަށް ސިޓީއަށް ސައުތެމްޓަނުގެ ގޯލާ އަމާޒުކޮށް ހަމަލާއެއް އުފެއްދިފައެއް ނުވި ނަމަވެސް، މެޗުގެ އިތުރު ވަގުތުގައި ރަހީމް ސްޓާލިން ވަނީ ސިޓީއަށް ލަނޑެއް ޖަހައިދީފައެވެ. އެކަމަކު އޭނާ އޮފްސައިޑުގައި ހުރުމުން އެ ލަނޑު ބަލައިގެންފައެއް ނުވެއެވެ.

މި ނަތީޖާތަކާއެކު ތާވަލުގެ އެއްވަނައިގައި ލިވަޕޫލް އޮތީ ކުޅުނު ފަސް މެޗުން ލިބުނު 14 ޕޮއިންޓާއެކުއެވެ. ދެވަނައިގައި އޮތް ސިޓީއަށް ފަސް މެޗުން 10 ޕޮއިންޓް ލިބިފައިވާއިރު، ތިންވަނައިގައި އޮތް މެންޗެސްޓާ ޔުނައިޓެޑާއި، ހަތަރުވަނައިގައި އޮތް ޗެލްސީއަށް ވަނީ ހަތަރު މެޗުން އެ އަދަދަށް ޕޮއިންޓް ލިބިފައެވެ.