ފިޔަވަތީގައި ހިނގި ހާދިސާ ގާތުން މިދަނީ ބަލަމުން، ކުދިންގެ ކަރާމާތަށް ގެއްލުންވާ ކަމެއް ނުކުރުމަށް އިލްތިމާސްކުރަން: އޮމްބަޑްސްޕާސަން

ދައުލަތުގެ ބެލުމުގެ ދަށުގައިވާ ކުޑަކުދިން ތިބޭ މަރުކަޒުކަމަށްވާ ފިޔަވަތީގައި 17 ސެޕްޓެމްބަރ ވީ ހުކުރު ދުވަހު ހިނގާދިޔަ ހާދިސާއާ ގުޅިގެން، އެ ސަރަހައްދަށްގޮސް އެތަން މޮނިޓަރ ކުރުމުގެ މަސައްކަތް ޗިލްޑްރަންސް އޮމްބަޑްސްޕަރސަންގެ އޮފީހުން ކޮށްފައިވާކަމަށް އެ އޮފީހުން ބުނެފިއެވެ.

އެހާދިސާ އާ ގުޅިގެން އިތުރަށް ބަލަންޖެހޭ ކަންކަން ބެލުމުގެ މަސައްކަތްވެސް ކުރެވެމުންދާކަމަށް އެ އޮފީހުން ބުނެއެވެ. އަދި ކުޑަކުދިންގެ ހައްގުތައް ރައްކާތެރިކުރުމުގެ ގާނޫނުން ޗިލްޑްރަންސް އޮމްބަޑްސްޕާސަން އޮފީހަށް މަތިކޮށްފައިވާ މަސްއޫލިއްޔަތު އަދާކުރުމުގައި އެ ހާދިސާ ގާތުން މޮނިޓަރކޮށް އިވެލުއޭޓް ކުރަމުންދާކަމަށް އެކަމާއި ގުޅިގެން އެ އޮފީހުން ނެރުނު ބަޔާނުގައި ބުނެފައިވެއެވެ. މިފަދަ ހާދިސާތައް ތަކުރާރުވިޔަ ނުދިނުމަށް އަޅަންޖެހޭ އަވަސް ފިޔަވަޅުތައް އެޅުމަށް ކަމާބެހޭ އެންމެހައި އިދާރާތަކާއެކު ގާތުން މަސައްކަތްކުރަމުން ދާކަމަށްވެސް ބުނެއެވެ.

މީގެއިތުރުން މި ހާދިސާއާ ގުޅޭ ފޮޓޯ އަދި ވީޑިއޯ ބައެއް ނޫސްތަކުގައި، އަދި ސޯޝަލް މީޑިއާގެ އެކި ޕްލެޓްފޯމުތަކުގައި އެކިއެކި ފަރާތްތަކުން އާންމުކުރަމުން ގެންދިޔަކަން ހިތާމައާއެކު ފާހަގަކުރާކަމަށް އެއޮފީހުން ވަނީ ބުނެފައެވެ. އެހެންކަމުން، އެންމެހައި ފަރާތްތަކުންވެސް ފިޔަވަތީގައި ތިބޭ ކުޑަކުދިންގެ ކަރާމާތަށް ގެއްލުންވާ މިފަދަ ޢަމަލުތައް ނުކުރުމަށް ވަނީ އިލްތިމާސްކޮށްފައެވެ.

ދިވެހިރާއްޖޭގައި ކުޑަކުދިންގެ ހައްގުތައް ރައްކާތެރިކޮށްދީ އެ ކުދިންގެ މަސްލަހަތު ހިމާޔަތްކުރުމުގައި ހަރަކާތްތެރިވާ އެންމެހައި ފަރާތްތަކުން ކުޑަކުދިންގެ ހައްގުތައް ރައްކާތެރިކުރުމުގެ ގާނޫނު އަދި ކުޑަކުދިންގެ ހައްގުތައް ރައްކާތެރިކުރުމާ ގުޅޭ ބައިނަލްއަގުވާމީ މުއާހަދާއިން އެކުދިންނަށް ލިބިދޭންޖެހޭ އެންމެހައި ހައްގުތައް ކަށަވަރުކޮށްދިނުމުގައި ދެމިތިބުމަށް ޗިލްޑްރަންސް އޮމްބަޑްސްޕަރސަންގެ އޮފީހުން ވަނީ އިލްތިމާސްކޮށްފައެވެ. އަދި މިފަދަ ހާދިސާތަކާ ގުޅިގެން ދައުލަތުގެ މުއައްސަސާތަކާއި މުޅި މުޖުތަމައުގެ ފަރާތުން ކުދިންގެ ރައްކާތެރިކަން އިސްކޮށް އެކުދިންގެ މަސްލަޙަހަތު ހިމާޔަތްކޮށް، ހައްގުތައް ކަށަވަރުކޮށްދިނުމުގައި އެކުގައި މަސައްކަތްކުރުމަށާއި މިކަންކަން ހާސިލްކުރުމަށް އެއްބާރުލުން ދިނުމަކީ މުހިންމު ކަމެއްކަމަށް އެ އޮފީހުން ބުނެއެވެ.

2019 ވަނަ އަހަރު ފާސްކުރި ކުޑަކުދިންގެ ހައްގުތައް ރައްކާތެރިކުރުމުގެ ގާނުނުގެ ދަށުން ޗިލްޑްރަންސް އޮމްބަޑްސް ޕަރސަންގެ ނަމުގައި މިނިވަން ވަކި މަގާމެއް ވަނީ އުފައްދާފައެވެ. އެއީ މި ގާނޫނުގައި ބަޔާންކޮށްފައިވާ ކަންކަން ތަންފީޒުކުރާ މިންވަރު މޮނިޓަރކުރުމަށްޓަކައި ޢައްޔަންކޮށްފައިވާ މީހެކެވެ. އެމަގާމަށް މީހަކު އައްޔަން ކޮށްފައިވަނީ 2020 ވަނަ އަހަރުއެވެ.