އިންޑިޔާގެ ވިޔަފާރީގެ މައި މަރުކަޒުކަމުގައި ބެލެވޭ މުމްބާއީގައި ދިރިއުޅެމުންދާ މީހުންގެ 90 އިންސައްތަ މީހުންގެ ގައިގައި ކޮވިޑް-19ގެ އެންޓޮބޮޑީސް އެބަހުރި ކަމަށް ސަރވޭއަކުން ހާމަވެއްޖެއެވެ.

ދަ ފިފްތު ބްލަޑް ސެރަމް އިން ކުރިޔަށް ގެންދިޔަ އެންޓިބޮޑީސް ޓެސްޓް ކުރިޔަށް ގެންގޮސްފައިވަނީ އޮގަސްޓް މަހުން ފެށިގެން ސެޕްޓެމްބަރ މަހުގެ ކުރީކޮޅާ ހަމައަށެވެ. މިސަރވޭގައި 8674 ބޮޑެތި މީހުން ބޭނުންކޮށްފައިވާއިރު ސަރވޭގައި ބައިވެރިވި މީހުންގެ 65 އިންސައްތަ މީހުންނަކީ ވެކްސިން ޖަހާފައިވާ މީހުންނެވެ.

ސަރވޭގެ ނަތީޖާ ހުކުރު ދުވަހު ވަނީ ހާމަކޮށްފައެވެ. މިނަތީޖާ ދައްކާގޮތުން ކޮވިޑް-19 އެންޓިބޮޑީސް ހުރި އަންހެނުންގެ އަދަދު ފިރިހެނުންނަށްވުރެ އިތުރެވެ. އަންހެނުންގެ ގައިގައި އެންޓިބޮޑީސް ހުރިކަމަށް ސަރވޭއިން ހާމަވެފައިވަނީ 88.29 އިންސައްތަ އަންހެނުންގެއެވެ. ފިރިހެނުންގެ އެއަދަދު ހުރީ 85.07 އިންސައްތައިގައެވެ.

މިސަރވޭއިން އިތުރަށް ހާމަވެފައިވާ ގޮތުގައި ވެކްސިންގެ އެއްވެސް ޑޯޒެއް ޖަހާފައިވާނަމަވެސް އެމީހުންގެ ހަށިގަނޑުގައި އެންޓިބޮޑީސް ހުރި މިންވަރު ވެކްސިން ނުޖަހާ މީހުންނަށްވުރެ އިތުރެވެ. އަދި ވެކްސިންގެ ދެ ޑޯޒް ޖަހާފައިވާ މީހުންގެ ގައިގައި އެންޓިބޮޑީސް ހުރި މިންވަރުވެސް އިތުރެވެ. އެހެންކަމުން މިހާރު ކުރިޔަށްގެންދާ ވެކްސިނޭޝަން ޕްރޮގްރާމް މިހާރަށްވުރެ ހަރުދަނާކޮށް ފުޅާކުރަން ޖެހޭކަމަށް ރިޕޯޓްގައި ބުނެފައިވެއެވެ.

މުމްބާއީއަކީ އިންޑިޔާއަށް ކުރިމަތިވި ކޮވިޑްގެ ނުރައްކާތެރި ދެ ވަނަ ރާޅުގެ އަސަރު އެންމެ ބޮޑަށް ކުރި ސަރަހައްދެވެ.

މިސަރވޭގެ ނަތީޖާ ހާމަވެފައިމިވަނީ ކޮވިޑްގެ ތިން ވަނަ ރާޅެއް އިންޑިޔާއަށް ކުރިމަތިވެދާނެކަމުގެ ކަންބޮޑުވުންތައް އިތުރުވެފައިވަނިކޮށެވެ. އިންޑިޔާގައި ހުކުރު ދުވަހު 34،403 މީހުންނަށް ވަނީ ކޮވިޑް ޖެހިފައެވެ.