ޔޫއެންޑަބްލިއުޓީއޯގެ ސީއެސްއޭގެ ދެވަނަ ދައުރަކަށް ރާއްޖެ އިންތިޚާބުކޮށްފި

ޔުނައިޓެޑް ނޭޝަންސް ވޯރލްޑް ޓޫރިޒަމް އޯގަނައިޒޭޝަން (ޔޫއެންޑަބްލިއުޓީއޯ) ގެ ކޮމިޝަން ފޮރ ސައުތް އޭޝިއާގެ ރިޔާސަތަށް، ދެވަނަ ދައުރަކަށް ދިވެހިރާއްޖެ އިންތިޚާބުކޮށްފިއެވެ.

ޔޫއެންޑަބްލިއުޓީއޯގެ ކޮމިޝަން ފޮރ ސައުތު އޭޝިއާގެ 58 ވަނަ ބައްދަލުވުން 14 ސެޕްޓެމްބަރ 2021 ގައިވަނީ ބާއްވައިފައެވެ. މިނިސްޓަރ އޮފް ޓޫރިޒަމް، ޑރ. އަބްދުﷲ މައުސޫމް ރިޔާސަތު ބެލެހެއްޓެވި މި ބައްދަލުވުމުގައި ސައުތު އޭޝިއާގެ 7 ޤައުމަކުން 25 ބައިވެރިން ވަނީ ބައިވެރިވެފައެވެ.

މިބައްދަލުވުމުގައި ރީޖަނަލް ކޮމިޝަން ފޮރ ސައުތު އޭޝިއާގެ ރިޔާސަތަށް ދެވަނަ ދައުރަކަށް ދިވެހިރާއްޖެ އިންތިޚާބުކޮށްފައިވެއެވެ. ވައިސް ޗެއަރ ގެ މަޤާމަށް ބަންގްލަދޭޝް އަދި އިރާން ވަނީ އައްޔަންކޮށްފައެވެ.

މި ބައްދަލުވުމުގައި ޔޫއެންޑަބްލިއުޓީއޯގެ ސްޓެޗުއަޓަރީ އޯރގަންސް އަދިސަބްސިޑަރީ ބޮޑީސްއަށް ވަނީ ގައުމުތައް ހޮވައިފައެވެ. މީގެ ތެރޭގައި ޖެނެރަލް އެސެމްބްލީގެ ވައިސް ޕްރެޒިޑެންޓްގެ މަޤާމަށް އިންޑިއާ އަދި ކްރެޑެންޝިއަލްސް ކޮމިޓީއަށް ބޫޓާން ވަނީ ހޮވާފައެވެ. މީގެއިތުރުން، ސައުތް އޭޝިއާއަށް ކަނޑައަޅުއްވާފައިވާ އެގްޒެކެޓިވް ކައުންސިލްގެ 2 ގޮނޑިއަށް އީރާން އަދި އިންޑިއާ ވަނީ ހޮވާފައެވެ.