މަރޮށި ބަނދަރު ތަރައްގީކުރުމަށް ހެވީ ފޯސްއާ ހަވާލުކޮށްފި
މި މަޝްރޫއަކީ 43 މިލިއަން ރުފިޔާގެ މަޝްރޫއެއް
މަރޮށި ބަނދަރު ތަރައްގީކުރުމަށް ހެވީ ފޯސްއާ ހަވާލުކުރުން
ށ. މޮރޮށި ބަނދަރު ހެދުމަށް ހެވީ ފޯސް ޕްރައިވެޓް ލިމިޓެޑްއާ ހަވާލުކޮށްފިއެވެ.
މަރޮށި ބަނދަރު ހެދުމުގެ މަސައްކަތް ހެވީ ފޯސްއާ ހަވާލުކޮށްފައިވަނީ ބުދަ ދުވަހު މިނިސްޓްރީ އޮފް ނެޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރގައި ބޭއްވި ރަސްމިއްޔާތެއްގައެވެ. މި އެއްބަސްވުމުގައި މިނިސްޓްރީގެ ފަރާތުން ސޮއިކުރެއްވީ ޑިރެކްޓްރ ޖެނެރަލް އަލްފާޟިލާ ފާތިމަތު ޝާނާ ފާރޫގެވެ. އަދި ހެވީ ފޯސް ފަރާތުން ސޮއި ކުރެއްވީ ކުންފުނީގެ މެނޭޖިން ޑިރެކްޓަރ އަލްފާޟިލް އިބްރާހިމް ޒަމީރެވެ.
މިނިސްޓްރީގެ ފަރާތުން ހެވީ ފޯސްއާ ހަވާލުކުރި މި ކޮންޓްރެކްޓަކީ 43،316،792.23 (ސާޅީސް ތިން މިލިއަން ތިން ލައްކަ ސޯޅަ ހާސް ހަތަސްތޭކަ ނުވަދިހަ ދެ ރުފިޔާ ތޭވީސް ލާރި)ގެ މަޝްރޫއެކެވެ. މި މަޝްރޫއުގެ ދަށުން 26،330 ކިއުބިކް މީޓަރ ބަނދަރު އަދި ނެރު ފުންކުރުމާއި، 202 މީޓަރ ގްރޮއިންގ ޖެހުމާއި، 490 މީޓަރ ސޭންޑް-ފިލް ބްރޭކްވޯޓަރ ޖެހުން ހިމެނޭ ކަމަށް މިނިސްޓްރީން ބުނެފައިވެއެވެ. އަދި 131 މީޓަރު ބޮޑުހިލައިގެ ބޭރު ތޮށި ޖެހުމާއި، 268 މީޓަރ ރިވެޓްމެންޓް ޖެހުން އަދި 2 ނެވިގޭޝަން ލައިޓް ހަރުކުރުން ވެސް ހިމެނެއެވެ.
އޭގެ އިތުރުން 416 މީޓަރ އެއްގަމު ތޮށި ލުމާއި، 75 މޫރިންގ ރިންގު ހަރުކުރުމާއި، 12 މޫރިންގ ބޮއި ހަރުކުރުން މި މަޝްރޫއުގައި ހިމެނެއެވެ. އަދި އެއްގަމު ތޮށިން ބޭރުތޮއްޓަށް އެރުމަށް ބްރިޖެއް އެޅުމާއި، ރޭމްޕް ހެދުން އަދި 20 މަގު ބައްތި ހަރުކުރުން މި މަޝްރޫއުގެ ދަށުން ހިމެނޭ ކަމަށް މިނިސްޓްރީއިން ބުނެފައިވެއެވެ.
މިނިސްޓްރީން ހެވީ ފޯސްއާ ހަވާލުކޮއްފައި މިވާ މަޝްރޫއުގެ މުއްދަތަކީ 420 ދުވަހެވެ.
