ރައީސް ޞާލިހް އެމެރިކާއަށް ފުރާވަޑައިގަތުން ހޮނިހިރު ދުވަހު

އދ. ގެ އާންމު މަޖިލީހުގެ 76 ވަނަ ދައުރުގެ އާންމު ބަހުސް މިމަހުގެ 21 ވަނަ ދުވަހު އެމެރިކާގެ ނިއުޔޯކްގައި ފަށާއިރު އެމަޖިލީހުގައި ބައިވެރިވެވަޑައިގަތުމަށް ރައީސުލްޖުމްހޫރިއްޔާ އިބުރާހިމް މުހައްމަދު ޞާލިހް އެމެރިކާގެ ނިއުޔޯކަށް ފުރާވަޑައިގަންނަވާނީ މިމަހުގެ 18 ވާ ހޮނިހިރު ދުވަހު ކަމަށް ރާއްޖެއެމްވީއަށް މައުލޫމާތު ލިބިއްޖެއެވެ.

އދ. ގެ އާންމު މަޖިލީހުގެ 76 ވަނަ ދައުރުގެ އާންމު ބަހުސް މިމަހުގެ 21 ވަނަ ދުވަހު އެމެރިކާގެ ނިއުޔޯކްގައި ފަށާއިރު އެމަޖިލީހުގައި ރައީސް ޞާލިހް ތަގްރީރު ކުރައްވާނީ ތިންވަނައަށެވެ.

Advertisement

ރައީސް ޞާލިހް އެމަޖިލީހުގައި ތަގްރީރު ކުރައްވަން ހަމަޖެހިފައިވަނީ އެމެރިކާގެ ރައީސް ޖޯ ބައިޑެންއަށް ފަހުއެވެ. ރައީސް ޞާލިހް ތަގްރީރު ކުރައްވާ ސެޝަން އޮންނާނީ މިމަހުގެ 21 ވަނަ ދުވަހުގެ ރާއްޖެގަޑިން އިރުއޮއްސި 6 ން ރޭގަނޑު 11.45 ދެމެދުގައެވެ.

އދ. ގެ އާންމު މަޖިލީހުގެ 76 ވަނަ ދައުރުގެ އާންމު ބަހުސް މިމަހުގެ 21 ވަނަ ދުވަހު ފަށާއިރު ރިޔާސަތުގައި އިންނަވާނީ ރާއްޖޭގެ ފޮރިންގ މިނިސްޓަރ އަބުދުﷲ ޝާހިދެވެ. މިނިސްޓަރ ޝާހިދު އެމަޖިލީހުގެ ރިޔާސަތާ އަންގާރަ ދުވަހުގެ ރޭ ހަވާލުވެވަޑައިގަންނަވާނެއެވެ.

ރައީސް ޞާލިހް އެންމެ ފަހުން އދ ގެ އާންމު މަޖިލީހުގައި ތަގްރީރު ކުރައްވައިފައިވަނީ 2019 އަހަރުއެވެ. ރައީސް ޞާލިހްގެ ކުރިން ވެރިކަމުގައި ހުންނެވި ރައީސް ޔާމީނު އަބުދުލްގައްޔޫމުގެ ވެރިކަމުގެ 5 އަހަރުގެ ދައުރު ނިންމަވާލެއްވިއިރު އދ ގެ އާންމުމަޖިލީހަށް ވަޑައިގެން ތަގްރީރު ކުރައްވާފައެއް ނުވެއެވެ. އެމަނިކުފާނުގެ ބަދަލުގައި ތަގްރީރު ކުރެއްވީ ރައީސް މުހައްމަދު ވަހީދު ހަސަންމަނިކެވެ.