ގަވް ޑޮޓް އެމްވީ މެސެޖުގެ ޚިދުމަތް: ސަރުކާރުގެ ޚިދުމަތާ ގުޅިގެން ޝަކުވާތައް ހުށަހެޅުމުގެ ދޮރު، 24 ގަޑިއިރަށް
14 ސެޕްޓެމްބަރު 2021 | އަންގާރަ 06:29އޮފީސްތައް ބަންދު ގަނޑީގައި ވެސް ޚިދުމަތަށް ހުށަހެޅޭނެ
ގަވަމަންޓް އެމްވީ އިފްތިތާހު ކުރުން
ގަވް ޑޮޓް އެމްވީ މެސެޖުގެ ޚިދުމަތަކީ، ރައްޔިތުންނާ ވީހާ ގާތުން ޚިދުމަތް ދިނުމަށް ސަރުކާރުން ކަނޑައަޅާފައިވާ ސިޔާސަތު ތަންފީޒު ކުރުމުގައި ވަރަށް މުހިންމު ދައުރެއް އަދާކުރާނެ ޚިދުމަތެއް ކަމަށް ރައީސުލްޖުމްހޫރިއްޔާ އިބުރާހިމް މުހައްމަދު ޞާލިހް ވިދާޅުވެއްޖެއެވެ. އެމަނިކުފާނު އެހެން ވިދާޅުވީ ގަވް ޑޮޓް އެމްވީ މެސެޖުގެ ޚިދުމަތް އިފްތިތާހު ކުރެއްވުމަށް އަންގާރަ ދުވަހު ބޭއްވި ރަސްމިއްޔާތުގައި ވާހަކަ ދައްކަވަމުންނެވެ. މި ރަސްމިއްޔާތު އޮތީ އެންސީއައިޓީގައެވެ.
ރައީސުލްޖުމްހޫރިއްޔާ ވިދާޅުވީ މި ޚިދުމަތަކީ ރައްޔިތުންނާއި ސަރުކާރާ ދެމެދު، މިހާރަށްވުރެ ހަލުވިކޮށް މުވާޞަލާތު ކޮށްދޭނެ ވަރަށް ހަރުދަނާ ފާލަމަކަށް ވެގެންދާނެ ކަމަށެވެ. މި ޚިދުމަތުގެ ސަބަބުން ދުނިޔޭގެ ކޮންމެ ތަނެއްގައި ހުރެގެންވެސް، ސަރުކާރުގެ އޮފީހަކަށް، ޢާންމު ރައްޔިތަކު ހުށަހަޅަން ބޭނުންވާ ކަންކަމާއި، ސަރުކާރުގެ ޚިދުމަތްތަކާ ގުޅިގެން ހުށަހަޅަން ބޭނުންވާ ޝަކުވާތައް ފަސޭހަކަމާއެކު ހުށަހެޅުމުގެ ދޮރު، 24 ގަޑިއިރު ހުޅުވިފައި ހުންނާނެ ކަމަށް އެމަނިކުފާނު ވިދާޅުވިއެވެ. ކަމެއް ހުށަހެޅުމަށްޓަކައި މީހާ އެ އޮފީހަކަށް ދާން ނުޖެހުމާ އޮފީސް ހުޅުވެންދެން އިންތިޒާރު ކުރަން ނުޖެހުން މިއީ މި ޚިދުމަތުގެ ސަބަބުން ލިބޭނެ ފަސޭހައެއް ކަމަށް ވިދާޅުވިއެވެ. އަދި އޮފީސް ބަންދުކޮށްފައި ހުރުމުން، ހުށަހަޅަން ބޭނުންވާ ކަމެއް ހުށަނޭޅި ހުންނަން ޖެހުން މި ޚިދުމަތުގެ ސަބަބުން ނިމުމަކަށް އަންނާނެ ކަމަށް ރައީސް ޞާލިހް ވިދާޅުވިއެވެ.
ރައީސް ވިދާޅުވީ ދުނިޔެ މިހާރު އަންނަނީ ޑިޖިޓަލްވަމުން ކަމަށެވެ. އަދި ދިރިއުޅުމުގެ އަސާސީ ހުރިހާ ޚިދުމަތެއްހެން މިހާރު އެ އަންނަނީ، ޑިޖިޓަލް ކާޑެއްގެ އެހީގައި އިނގިލި ކުރިއާ ހަމައަށް ތިލަވަމުން ކަމަށް ވިދާޅުވިއެވެ. މީގެ އިތުރުން ފައިސާގެ މުޢާމަލާތްތަކާއި، ޤައުމުތަކަށް އެތެރެވެ ބޭރުވުމާއި، ދަރިންނަށް ކިޔަވައިދިނުމާއި، ބޭސްފަރުވާގެ ޚިދުމަތްތައްވެސް އަންނަނީ ޑިޖިޓަލް ވިއުގައިގެ ތެރެއިން ފަސޭހަކަމާއެކު ގުޅެމުން ކަމަށް އެމަނިކުފާނު ފާހަގަ ކުރެއްވިއެވެ.
