ފުވައްމުލަކުގެ މަގު ހެދުމުގެ މަޝްރޫއު އަންނަ އަހަރުގެ ކުރީކޮޅު ނިންމާލެވޭނެ : އާޒިމް
މަގު ހެދުމުގެ މަސައްކަތްތައް ބާރު ސްޕީޑްގައި ކުރިއަށްދޭ
ފުވައްމުލައް ސިޓީގެ މަގު ހެދުމުގެ މަޝްރޫއުގެ ތެރެއިން،
ފުވައްމުލައް ސިޓީގެ މަގުތައް ހެދުމުގެ މަޝްރޫއު 2022 ވަނަ އަހަރުގެ ފެބްރުއަރީ މަހުގެ ތެރޭގައި ނިންމާލެވޭނެ ކަމަށް އުންމީދުކުރައްވާ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)ގެ ސީއީއޯ އާދަމް އާޒިމް ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި އާޒިމް ވިދާޅުވީ ފުވައްމުލައް ސިޓީގެ މަގު ހެދުމުގެ މަސައްކަތްތައް ބާރު ސްޕީޑްގައި ކުރިއަށްދާ ކަމަށެވެ. އެ މަޝްރޫޢަށް އެސިޓީން 80 ނުވަތަ 100އެއްހާ މުވައްޒަފުން ނަގާފައިވާކަން އާޒިމް ފާހަގަކުރެއްވިއެވެ.
އާޒިމް ވިދާޅުވީ މީގެ ކުރިން މަސައްކަތް ކުރީ ނޮވެންބަރު މަހުގެ ތެރޭގައި މި މަޝްރޫއު ނިންމާލުމަށް ކަމަށެވެ. އެހެންނަމަވެސް ކޮވިޑް-19އާ ގުޅިގެން ދިމާވި ދަތިތަކާހުރެ މަސައްކަތް ލަސްވީ ކަމަށް އޭނާ ވިދާޅުވިއެވެ. ނަމަވެސް މިހާރު މަސައްކަތްތައް ކުރިއަށްދާ ގޮތުން އަންނަ އަހަރުގެ ފެބްރުއަރީ މަހުގެ ތެރޭގައި މަސައްކަތްތައް ނިންމާލެވޭނެ ކަމަށް އުންމީދު ކުރާ ކަމަށް އާޒިމް ވިދާޅުވިއެވެ.
މަސައްކަތްތައް ކުރިއަށް ގެންދިއުމުގައި ދަތިތައް ކުރިމަތިވުމާއެކު ސަރުކާރާ މަޝްވަރާކުރާކަން ފާހަގަކުރައްވައި އާޒިމް ވިދާޅުވީ ސަރުކާރުގެ ފަރާތުން ވަރަށް ފުރިހަމަ އެއްބާރުލުމެއް ލިބޭ ކަމަށެވެ. ވަސީލަތްތައް ގެނައުމުގައި ދަތިވުމާ ގުޅިގެން ވެސް ސަރުކާރާ މަޝްވަރާ ކުރުމުން ހައްލު ހޯދައިދޭކަން އާޒިމް ފާހަގަކުރެއްވިއެވެ.
ފުވައްމުލައް ސިޓީގެ އެތެރޭގެ މަގުތައް ހެދުމުގެ މަޝްރޫޢުގެ އަމަލީ މަސައްކަތް ފަށާފައިވަނީ 20 ޖުލައި 2020 ގައެވެ. މި މަޝްރޫޢުގެ ދަށުން 31 މަގުގެ 15،932 މީޓަރުގެ ސަރަހައްދެއް ތަރައްގީކުރެވޭނެ ކަމަށް އެމްޓީސީސީން ބުނެއެވެ. މި މަސައްކަތުގެ ދަށުން 122،659 އަކަމީޓަރުގެ ސަބް ބޭސް ހެދުމާއި، 95،239 އަކަމީޓަރުގެ ތާރު އެޅުމާއި، ހިނގުމަށް ޚާއްޞަ ސަރަހައްދެއް ހެދުން ހިމެނެއެވެ. މީގެ އިތުރުން މަގުތަކުގައި ބައްތި ހަރުކުރުމާއި ފެން ހިންދާ ނިޒާމުގެ މަސައްކަތް ކުރާނެ ކަމަށް އެމްޓީސީސީން ބުނެއެވެ.
މި މަސައްކަތަށް 279.4 މިލިއަން ރުފިޔާ ހަރަދުވާނެއެވެ. މި މަޝްރޫއު އެމްޓީސީސީއާ ހަވާލުކޮށްފައިވަނީ 2019 ވަނަ އަހަރުގެ ޖުލައި މަހުގެ 04 ވަނަ ދުވަހެވެ.
