މިހާރު ކުރިއަށްދާ ޔޫއެސް އޯޕަން ޓެނިސް މުބާރާތުގެ އަންހެން ސިންގަލްސްގެ ޗެމްޕިއަންކަން ހޯދައި އުމުރުން 18 އަހަރުގެ އެމާ ރަޑުކާނީ ތާރީޚީ ގިނަ ރިކޯޑުތަކެއް ގާއިމުކޮށްފިއެވެ.

ޔޫއެސް އޯޕަންގެ ޗެމްޕިއަންކަން އެމާ ހޯދީ ހޮނިހިރު ދުވަހުގެރޭ ކުޅުނު ފައިނަލް މެޗުގައި ކެނަޑާގެ އުމުރުން 19 އަހަރުގެ ލޭލާ ފެނާންޑޭޒް އަތުން ސީދާ ދެ ސެޓުން މޮޅުވެގެންނެވެ. މި މެޗުގެ ސެޓުތައް އެމާ ގެންދިޔައީ 6-4 އަދި 6-3 އިންނެވެ. އެއާއެކު މި ފަހަރުގެ މުބާރާތް އެމާ ކާމިޔާބުކޮށްފައިވަނީ މުބާރާތުގެ ކޮލިފައިން ބުރުން ފެށިގެން އެއްވެސް މެޗެއްގައި ސެޓެއް ގެއްލުވާނުލައެވެ.

އެއާއެކު ކުރު މުއްދަތެއްގެ ތެރޭގައި ވިދާލި އެމާ މިހާރު ވެފައިވަނީ 44 އަހަރަށްފަހު ގްރޭންޑް ސްލޭމް ޓެނިސް މުބާރާތެއް ކާމިޔާބުކުރި ފުރަތަމަ އިނގިރޭސި އަންހެން ކުުުޅުންތެރިއާއަށެވެ. އަދި ޓެނިހުގެ އޯޕަން އިރާ ފެށުނު ފަހުން މިހާތަނަށް ކޮލިފައިން ބުރުން ފަށައިގެން އައިސް ގްރޭންޑް ސްލޭމެއް ކާމިޔާބުކުރި ފުރަތަމަ އަންހެން ކުޅުންތެރިޔާއަކީވެސް އެމާއެވެ. އަދި އެމާ ވެފައިވަނީ 2004 ވަނަ އަހަރަށްފަހު ގްރޭންޑް ސްލޭމެއް ކާމިޔާބުކުރި އެންމެ ޒުވާން އަންހެން ކުޅުންތެރިޔާއަށެވެ.

އަދި އެމާ އަކީ 2014 ވަަަނަ އަހަރުގެ ޔޫއެސް އޯޕަން ކާމިޔާބުކުރި ސެރީނާ ވިލިއަމްސްއަށްފަހު ސެޓެއް ނުގެއްލި މި މުބާރާތުގެ ޗެމްޕިއަންކަން ހޯދި ފުރަތަމަ އަންހެން ކުޅުންތެރިޔާއެވެ.

މި އަހަރުގެ ޔޫއެސް އޯޕަން އެމާ ކާމިޔާބުކުރިއިރު، މީގެ ދެ މަހެއްހާ ދުވަސް ކުރިން އޭ ލެވަލް ޓެސްޓުތައް ހަދައި ހިސާބާއި އިކޮނޮމިކްސްއިން އެންމެ މަތީ މާކްސް ހޯދި އެމާ ޕްރޮފެޝަނަލް ޓެނިހަށް ފުރަތަމަ ފަހަަރަށް ނުކުތީ މި އަހަރުގެ ގްރޭންޑް ސްލޭމް މުބާރާތެއް ކަމަށްވާ ވިމްބަލްޑަން ޓެނިސް މުބާރާތުގައެވެ. އެކަމަކު އެ މުބާރާތުގެ ގަދަ 16 ބުރުގެ މެޗުގެ ތެރެއިން އެމާއަށް ނޭވާލާން އުނދަގޫވެގެން މެޗު ދޫކޮށްލަން ޖެހުނެވެ.

މުޅިން އަލަށް އެމާ ގްރޭންޑް ސްލޭމް މުބާރާތެއް ކާމިޔާބުކުރުމާއެކު އޭނާ މިހާރު ވަނީ ދުނިޔޭގެ ރޭންކިންގެ 23 ވަނައަށް ޖެހިލާފައެވެ. އެއާއެކު އޭނާ ވެގެންގޮސްފައިވަނީ އިނގިރޭސި އަންހެން ކުުޅުންތެރިންނަށް ބަލާއިރު، އެއްވަނަ އަންހެން ޓެނިސް ކުޅުންތެރިޔާއަށެވެ.